حل مشكلة مكيف فورد اكسبدشن الهواء كان يطلع من تحت ومسدود فوق

8 0

لايمكنك التصويت حتى الحصول على 20 نقطة على الأقل
إضغط هنا للإخفاء

ابوخالد1397 2893
قبل 4 سنه و 4 شهر

السلام عليكم ورحمة الله وبركاته

اليوم عندي موضوع ان شاء الله يفيدكم ككل وخصوصا أصحاب الفورد الاكسبدشن

المسأله ومافيها.. ان التكيف الخلفي تعطل بالكامل.. وصار الهواء يطلع فقط من عند الاقدام فقط.. حاولنا نخلي من السقف ولكن بدون فائده..حتى اني خليت التحكم من الامام ولا فاد وخليت التحكم من الخلف ولا فاد..الهواء سواء بارد او حار يطلع من الاسفل.. ومن فوق مافيه هواء نهائيا

سالت كذا واحد واستفسرت بالمنتدى هنا وبحثت بالنت.. بس مالقيت اجابه كافيه ووافيه.. اغلبهم يتكلمون عن الفورد فكتوريا والماركيز.. والاغلب اجمعوا على حل واحد فقط وهو

اني أسد مجرى التكيف اللي من الاسفل.. وبيصير الهواء يطلع من الأعلى..

البعض قال انها جلده تفصل بين التكييف اللي بالاسفل عن اللي بالاعلي.. وأحيانا تنكسر وتسد شيء منها.. سواء من فوق او تحت.. واللي عليك فقط تشتري هالجلده وتعيد تركيبها ويرجع كل شيء كما كان.. ولكن للاسف.. ماندري وين محل هالجلده اللي يقصدونها.. لان المشكله اصلا كانت في فورد ماركيز وكان المتعطل مكيفها الامامي.. وشتان ما بينهما

وللاسف قعدت على هالحاله بدون اصلاح.. والحين يوم اشتد الحر والصيف.. قررت اصلحه باللي يكون.. ونصحني احد الزملاء بورشه صغيره بالحي اللي ساكن فيه.. متعامل معهم من فتره طويله جدا.. وامين اللي يشتغل فيها.. وقلت اجل بمرهم واشوف

والحمدلله مريتهم واكتشف المشكله وهي كتاوت بحجم الكف.. مسؤول عن التكيف العلوي والسفلي.. طلع خربان.. محله بالديكور الداخلي الخلفي فوق الكفر الخلفي الايمن.. ينفك الديكور بسهوله بكلبسات..مثل علبة الفيوزات.. فكه بسيط ججا.. وفيها كتاوت كثيره.. فيها المسؤول عن التكيف الحار وفيه المسؤول عن التكييف العلوي والسفلي وفيه كذا كتاوت لها وضائف واعتقد منها دفع الهواء للي مثلا المكيف عنده مايشتغل الا على طقه ٣.. فلازم يشيك على هالكتاوت

وقيمته ١٤٠ ريال والتركيب ١٥٠ ريال حتى ماكاسرتهم بشيء.. لاني احترم الامانه واقدرها..

لان بعضهم يقولك فيه كذا وكذا وبتكلف ٥٠٠ او ٦٠٠ ويجي يغير لك هالقطعه ١٤٠ وقال خلاص صلحت لك السياره


وبس.. حبينا نفيدكم.. ولا تنسونا ووالدي من دعاكم

ملاحظه.. حتى التكييف الامامي للسائق والراكب.. فيه كتاوت مثل الكتاوت الخلفيه بالظبط.. اذا احد تعطل عليه التكيف الحار.. او صار بس يطلع الهواء من تحت او بس من فوق وهو يبغاها مكس فوق تحت.. فاعرف ان السبب كتاوت.. ولا يحتاج فك ديكورات او سد مجاري ولا شيء.. لها محل خاص بكلبسات ويتم تغير الكتاوت الخربان وبس

إبلاغ

الردود