أضف سؤال أو موضوع جديد          

أحبتي حذاري من ورش الفحص التي هدفها الماده

up 13 down 2
السهل الممتنع 6399
قبل 6 سنه و 11 شهر



السلام عليكم ورحمة الله وبركاته
اخواني 
اخوكم السهل الممتنع احب ان ينقل لكم ما يعتقد ان البعض قد يجهله( وان قلت الاكثريه تجهله )
عند شرائك سياره من السوق 
اول مايخطر ببالك هو ان تذهب للفحص قبل الشراء 
وهذا هو الصحيح وهو القرار السليم
ولكن 
وإنني لا أُعمم  
!!!!!!!!!!!
لا أعمم 
بل أخص مع انهم على الغالب هم الاكثريه 
( اقصد المراكز التي تنتشر بجانب المعارض ) 
انا بحكم شرائي للكثير من السيارات وبحكم انني قد بعت الكثير
أصبحت  لدي خبره جيده جدا اعرف كذبهم من صدقهم في شرح الاعطال
التي يقولون عنها ( بعد الفحص والتجريب )
وان اكثرهم لايوجد لديه ذمه ( وأشهد الله على ذلك من واقع تجربه )
يعني تماماً مثل غش الشريطيه لان الغالبيه من الشريطيه غشاشون
ولا اعمم ( يوجد نسبه تريد الكسب الحلال )

ندخل بالموضوع وعفواً على الاطاله 

1

..................................................................

سياره موديل على سبيل المثال ؟؟ 2011
تكون شبه وكاله 
في حال انه لم يجد اعطال يبدأ بالتذاكي على الشاري وبعض اخواننا لايعرف 
ولايقتنع لانه يعتبر ان اي بائع هدفه البيع والغش
ويعتبر المركز هو كاشف الغش ( حسبي الله ونعم الوكيل ) 

يكتب لك تصفيه 400 ريال او 500  اجور يد + بواجي  + + الخ .......
مع ان السياره صافيه لدرجة انك تحس انها طافيه ( هدوء التشغيل ) 
ويوم تقول له يا اخوي السياره صافيه وعزمها تمام ولافيها كربون ولا ولا 
يقول لك 
الكمبروتر قال كذا ( الكمبيوتر  قال كذا بعضهم والله مايعرف يتكلم بس جايبينه يتعلم بنا )
والشاري يخاف ويهون
وبه منهم يعرف ان السياره مابها شي ويجلس يحاول ينزل 
وبعضعم يرجع يسوي لها تصفيه لانه فرحان بموتره الجيد ويقول خلني استخدم مو خساره 
وهو مايدري انهم ضحكوا عليه !!!!!!!!!!!!!!!!!!
وأشهد الله انها صارت كثييير بمواتر وكاله ( شهادتي انا السهل الممتنع الموضوع ليس منقول )
..........................................................................................................

2

.......................................................................................

سياره على سبيل المثال 2007
حالتها في الطريق ممتازه لاحذف ولارجه ولا تسمع اصوات في الطريق الترابي 
تروح السياره لفحص 
ويقول لك 
ياشاري 
السياره هذي تبي تربيط كامل وتغيير اذرعه هي حالتها طيبه بس ننصحك لازم تربطها
والشاري بعضهم يشري لانه يعرف انه كلام فاضي
وبعضهم يحاول ينزل 
وبعضهم يهون يبي شي مابه شي يحسب ان كلامهم صحيح 
يقول لك هذي سياره منهكه رايحه بر 

..........................................................................................

3

.........................................................................................

سياره على سبيل المثال 2006
وتبديل قيرها رايق وسلس وممتاز وقوي ولاطقه ولا ولا ولا ولا 100%

بعد الفحص يقول 
ياشاري 
غير زيت قير وفلتر قير 
والشاري كالعاده  يخاف او يهون او يستذكي وينزل وهو عارف انه مافيها شي 

....................................................................................

4

......................................................................................

سياره على سبيل المثال 2000
مافيها اي تهريب زيت  وبطنها نظيف يعني 95% حالة بطنها
وبعد الفحص 
ياشاري 
لازم تغير صوف ال وال وال وال و
سوا الموتر تشليح 
مع انك مافيه الا شبه تنديه مثلا بوجه او !
يعني ان غسلته راح سنه ماطلع بداله 
وكالعاده خاف الشاري او هون او حاول ينزل 

................................................................................

5

.................................................................................

سياره حالتها ممتازه جدا 
بعد الفحص للمحرك 
ياشاري الموتر مكينته طيب
ولكن لازم نشيك على وجه الراس ( شلون يمدح ويذم والله العظيم هذي صارت معي عدة مرات )
ولازم نشيك على الدينمو ( طيب الدينمو كهربه ممتاز )
يعني على اساس انه يعطونه نصائح قبل الشرا )
ولازم تغيير السيور 
والشدادات 
................................................................

والكثير الكثير من القصص 
ما ابي اطول الموضوع الى حد الملل 

...............................................................

اكيد تقولون ليه يسوون كذا
1 الزباين اللي يهونون عن الشريه يرجعون يفحصون عندهم واجرة فحص من جديد 

2 ان شرا اللي فحص راح وسوا تصفيه وتربيط وتغيير سيور ومشدادات وبكرات 
وهفي يا فوتير اسعارهم سياحيه ( بسياره مابها شي ) تغيير بلاوجع قلب

أكتفي بهذا الشرح 
وأشهد الله مره اخرى انني لا ابالغ بلعكس انني قد اختصرت الكثير الكثير
من غشهم ولعبهم

ولا اعمم قلت البعض او الاكثريه 
تحياتي لكم 







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


كلامك 100%
غالبا يطلع عندهم تصفية ماكينه بس واحيانا مساعدات فقط
سيارات سالفج والله مضروبه واكلم الزبون واقوله واحيانا في صور متوفره وقت الصدمه والله يقولي ان الفحص قال سليمه من الحوادث
والله فحص الكومبيوتر كلام فاضي((الا بعض الاجهزه الخاصه بالالماني))
الفحص يبيله 
ميكانيكي شاطر +سمكري فقط والكهرباء تقدر تفحصها من الظفاير والفيوزات


up 3 down 0
pt 2011 1389
قبل 6 سنه و 11 شهر



دائما تتألق يا السهل الممتنع في طرح مواضيعك 

وفعلا كلامك صحيح مليون بالميه وحصلت معي كثير وانا متعامل مع واحد فلبيني من 5 سنين اعرفه والحمد لله كل السيارات اللي نفحصها عنده سليمه ويعلمنا الملاحظات البسيطه اللي فيها 

وبالنسبه لاخوي شيخ المعارض انا انبهك من ساسكو لانه فحص فااااااااااااااااااااااااااااشل وهقني في موتر اقسم بالله للحين ادعي عليهم ولما مره جيت ببيع سياره قال عمود الكرنك خربان اقوله موتري من 5 سنين استخدمه تستهبل انت قال والله انه خربان 

ورحنا انا واللي بيشتري لفحص ثاني قال السياره سليمه والصوت هذا اسمه بلانسر وقيمته 500 ريال مع التركيب والحمد لله ركبه صاحب الموتر واتصل علي وقال راح الصوت وذاك النصاب خلاه عمود كرنك الله لا يوفقه يارب 

وانا انصحكم بفحص بهجة عسير ممتاز جدا جدا والفلبيني اللي فيه مجنون ومتعاملين معه نااااااس كثييييييييييييييييييييييييييييييير 

وبالتوفيق لي ولكم والله يرزقنا بالرزق الحلال 


up 3 down 0
camry grandi 99 7278
قبل 6 سنه و 11 شهر



بخصوص محلات الفحص اللي بجانب المعارض. مستحييييل استحاله تامه افحص عندهم  لأنهم يبونك تخلص بسرعه عشان ياخذون اللي بعدك. ومايبين شي وفحصهم كلاااام فاضي ومايبي يزخل نفسه في مشاكل فتلقاه غالباً ساكت وانت الاي مسكين تجلس تنشده كل شوي وهو يهز لك راسه حتى  لو انه فلبيني او غيره

خذ الموتر اللي تبيه واتفق مع راعي السياره ورح انت وياه افحص في تي محل يعجبك واذا. رفض فهي خيره اعرف ان موتره فيه بلا

من مراكز الفحص بالخبر في الصناعيه الثقبه / الشبل
في الدمام ورشة سهم 
بالتوفيق


up 3 down 0
شكلين مابحكي 3159
قبل 6 سنه و 11 شهر



فحص الكمبيوتر لايهمني كثيرا
اهم شي الموتر وقفته طيبه ومشيته حلوه
وبعد كذا فحص سمكره عند سمكري مختص 
وفحص ميكانيك وكهرب واذرعه ومقصات وخلافه وانتهى
اصلا الكمبيوتر مجرد قرائه لشغلات معينه 


up 2 down 0
Ahmad356 510
قبل 6 سنه و 11 شهر



موضوع راائع .. ودائما لك بصمة خااصة بمواضيعك .. بالنسبة لي فحصت قبل كذا عند ساسكو .. ومع ذلك فحصهم مو مزبوووط ابدااا .. وخلوني اشتري سيارة شبه منتهية .. خسرت فيها خلال اسبوع 4000 ريال .. لكن حسبي الله عليهم ..


up 1 down 0
صاحب السمو 2 1501
قبل 6 سنه و 11 شهر



ساسكو أكبر نصاب.


up 2 down 0
دفتر 220
قبل 6 سنه و 11 شهر



تسلم على الموضوع وحسبي الله على كل غشاش


up 2 down 0
ابــو ســنــد 10639
قبل 6 سنه و 11 شهر



موضوع ممتاز 

تم تقييمك


up 1 down 0
راااضي 2525
قبل 6 سنه و 11 شهر



لك أحلا لايك ياسهل دايم مبدع كعادتك 


up 1 down 0
أستشاري الحب 6471
قبل 6 سنه و 11 شهر



متألق مششاء الله بموضيع صراحه مواضيعك ممتازه ولكك اللايك عاد تصدق حطيت اللايك وانا اقراء ولك جزيل الشكر تقبل مروري



up 1 down 0
ابوهنادي01 1539
قبل 6 سنه و 11 شهر



ساسكو سى جدا لاني شرايت فورد الفين واربعه كان فيه صوت البلوف يم جيت اشتري السياره قالو توضيب ورحت كمميوتر قالو تكيات


up 1 down 0
محمد ال سلمان 816
قبل 6 سنه و 11 شهر



هذا هو الواقع المر ولكن الناس من غش الشريطية واخفاء عيوب السيارات من قبل مالكيها اضطروا ان يلجأو لهم


up 1 down 0
0580006336 262
قبل 6 سنه و 11 شهر



اقول لكم بالعربي العمالة تتعلم فينا كان عندي فورد العداد ما يشتغل ويوم لفت جميع الورش جميعهم يعتذرون بعضهم يقول كمبيوتر وبعضهم يقول الظفيرة الموصلة من الكمبيوتر الى العداد وبعضهم يقول الحساسات وبعضهم يقول الطبلون يعني كل واحد يفتي من راسة وفي الاخير فكيت الطبلون عند البيت حصلت سلك مفصول شبكته ورجعت كل شي زي ماهو فلا تعطي راسك لغيرك


بيض الله وجهك وجمل الله حالك على هذي المعلومات 
لاهنت



up 1 down 0
www.fahad.com -10
قبل 4 سنه و 4 شهر



السلام عليكم 
اخواني الكرام بالنسبة لموضوع الفحص موضوع جدير بالاهتمام لأنك كزبون ما تدري وتخاف من الشريطي وتخاف من محل الفحص ومع كثر المحلات ما تدري منهو الصادق ولكن هناك معلومه لازم الكل يعرفها وهي ان جميع اجهزة الكمبيوتر الموجود تفحص الأجزاء الكهربائية والإلكترونية 
وليس لها دخل بتاتا في الأجزاء الميكانيكية ومن هنا لازم نعرف ان التهريبات والحذف والاصوات  تعتمد وبشكل كامل على الفني اللي قاعد يفحص  وعلى خبرته وقد تختلف المعلومة من فني لآخر 
والشي الاخر المهم ان هناك اجزاء واشياء استهلاكيه يجب تغييرها بدون اللجوء للفني وبقرار من صاحب السياره كما هو مسجل في كتالوج السياره مثل صفاية البنزين وزيت المكينه والقير وفلتر الهواء وفلاتر المكينه والقير وسير التيمن وسير المكينه طبعا من واقع خبرة فحصت عند محل اتجاهات امان فحصهم ممتاز جدا ودقيق ويشرح لك كل كبيره وصغيره بعد وكالة الفلاح ع اليمين انصحكم به
وجوالهم 0555750389


up 0 down 0
shaaf2004 3
قبل 2 سنه و 11 شهر