هل الفورد فعلا خدومه؟

بالنسبة للانوار ضعيفة هذا صحيح والحل عدسات
القطع رخيصة ومتوفرة والاهم انه ما تغير كثير قطع كثير متشابهة مثل جهاز المكيف من 98 الى2011 ومنتشر في التشاليح يعني ماراح تتعب من القطع
الصرفية معقولة يعني كل اسبوع 90 ريال تقريبا ,, بس مو مرة يعني الفل يمشيك حدود 300 - 400 داخل المدينة والخط فوق 500

الفرق بين ls و gs كثير بس بلخصها لك
( ls .. فيه abs ومانع انزلاق تقريب دواسات طبلون الكتروني مراتب جلد كونسل علوي تحكم كهرباء للمراتب الامامية مكيف الكتروني )
(gs .. مراتب مخمل طبلون عادي تحكم كهرباء لمرتبة السائق مكيف فرار فقط )

طبعا انا سهلتها لك واعطيتك الزبدة الا LS لها 4 فئات GS فئتين فقط
وكل فئة تزيد كم حاجة عن الي قبلها بس انا اعطيتك اهم المواصفات

بس نصيحة خذ ls وركز على الطبلون الالكتروني انا ندمان الى يومك اني ماشريت الطبلون الالكتروني

والله يوفقك

يعطيك العافية اخوي بما انك مجرب الموتر هل هو حق كد يعني ممكن استخدمه خمس سنوات او اكثر

ايه حق مكدة انا شاري الفورد من ثالث متوسط وبعد شهر بروح الجامعة وما راح افكه الين ما احصل وظيفة واخذ فورد ثاني هههههه

خدم معي 4 سنوات ومافي احسن منه وحاليا بخليه يشد الحزام على 5 سنوات زايدة ..

يعني خذه وانت مغمض بس خذ نظيف .

مشاء الله عليك اخوي اشكرك و تابعتك عندك مواضيع كويسة عن الفورد موسوعة مشاء الله نستفيد منك بإذن الله و نتعلم
و الله يكثر من امثالك

خدوم جداً وكفو خصوصا الموديلات هذي 2000 - 2002 سيارات جباره اذا كان نظيف ومربط من والى ومكينته صافيه يعيش معك حتى ماتقدر تستغني عنه يصير له مكانه بقلبك

بأختصار حمار مكده ,, اذا مربط ومكينته صافيه ولا راح يتعبك .

السلام عليكم شباب الفورد لمن اشغله اسمع فيه هوا من داخل كنه تنسيم من عند الدعاسات و يرتفع لمن ادعس ع الفرامل و لما ادعس الفرامل ينزل امبير البطارية شوي

انا ملي خبره ب السيارة و توني جربتها. و لاحظت ذا الشي فهل هو طبيعي او مشكلة بسيطة ولا حط رجلك هههههه

خذ لك فورد " نظيف " وراح تستمتع بالسواقه .. موتر يكرف معك وراحة ووسيع .. البنزين عن نفسي كل اسبوع 50 ريال من البيت للدوام ومشاوير خفيفه ومكفيني
اهم شي دعستك خلها خفيفه وانتبه على الموتر وصحيح نوره ضعيف .. واول رد صراحة ماقصر فصل لك تفصيل

تضغط فرامل وينزل الامبير تأكد ليكون فيه مشكله
اذكر قبل سنتين كنت ابشتري واحده 1999
حاده راعيه ب10الاف المهم كلمت واحده عنده اخوه
فكتوريا 2002قالي ابعد عنها كل شوي يخرب الدينمو
طبعا اللي كلمته عنده فورد 95اتوقع شكل القديم
يقول يكد احسن من حق اخوي لان حق اخوه كل شوي
يضرب الدينمو واللي بالسوق مجدد بس انت لو خرب
عليك ركب امريكي يقولون افضل من المجدد
المهم صرفت النظر عنها وكانت خيره لان البنزين ارتفع
والان اسعارهم 5الاف ريال
بس سعر سيارتك حلو 2002 وب5000اشوفها لقطه اذا نظيف
المهم اللون ليكون غامق عشان ماتمسك حراره
لان الفورد مكيفه مايجمل بالصيف بالشكل المطلوب
طبعا المكيف اكبر سبب خلاني مااشتريه ماعندي مشكله
بالدينمو يخرب بس ابي مكيف ثلاجه والفورد للاسف مكيفه لك عليه

والله يعينك على ادمانه سواقته جداا رهيبه وممتعه
بس لو يترهم عليه مكيف نيسان كان اطق 5فوردات ههههه
توضيب مكينته ممع شغل اليد 4الاف بالكثييييير
والقير 3الاف بالكثييييير مع الطنجره بعد
وتوظيبه مافي اسهل منه اغلب الورش يعرفون له
سهل توضيبه


كان ودي اقولك خذ فكتوريا لان شكلها ماتغير الى 2011
عكس الماركيز تغير بعام 2007 عن الموديلات اللي قبل
لكن دام فاحص وشايف مايحتاج تغيير للفكتوريا
وللعلم الماركيز افخم من الفكتوريا الفكتوريا ميزتها
حتى لو تاخذها شكل قديم ماتفرق عن 2011

هل فيه فرق بين الماركيز و الفكتوريا بتحمل و لا نفسها

نفس القطع والتحمل بس يفرق في الداخلية تخشيب وعداد الكتروني
والبدي الخارجي

ما يصلح دام الميزانية قليلة

يعطيكم العافيه شكرا لكم

الله يعطي العافية للجميع و مشكورين ما قصرتو

نعم خدومة وتجمل بس تحافظ عليها وقطعها رخيصة ومتوفرة في كل مكان 
انصحك تشتري النظيف من واحد تعرفه زين او استيراد امريكي  بطاقه مستعمل يجيك نظيف جدا 
وانا انصحك بالفكتوريا استخدمتها سنين   مريحة جدا وواسعة ومنظرها فخم  وهي رخيصة 
عيبها مكيف وسط بالصيف  الحار ومايجمل واجد بس لاباس  وقد خرب علي وغيرت كومبرسور وليات كلفني ١٣٠٠ تقريبا 
خراباتها بعد سنين  تنقص المكينة شوي  والقير احيانا يطلب توظيب ولكن بعد سنين  طويلة
وايضا ثلاجة المكينة تهرب موية وهي سهلة تغير يمكن ٧٠٠ هالكلام قبل الحين مادري عن الاسعار 

ياولدي ابنصحك نصيحة ان اعجبتك او اتركها : الماركيز ماعليه كلام وخراباته قليلة اذا اخذ تنظيف لكن نصيحة لوجه الله ابتعد عنه هذا ماهو وقته بسبب صرفية البنزين وانت شاب ومشاويرك كثيرة ...
عندي ماركيز هلكني بصرفية البنزين كل 3 او 4 أيام اعبية ب 80 ريال ... خذ سيارة صغيرة ماتستهلك ..
والله يوفقك

تستهلك بنزين 
بس والله موتر ومن داخل كنب تقول قاعد ف مجلس رهيب

إذا ما هو نضيف ابتعد عنه
الأمريكي يحتاج ميزانيه
الكامري 2002او 2001. مناسبه ترى