أضف سؤال أو موضوع جديد          

كثرة الأعطال ببعض أنواع السيارات

up 29 down 22
صالح بن محمد. -21
قبل 4 شهر و 2 أسبوع



السلام عليكم ورحمة الله و بركاته

قال الحسن البصري: والله إني لأعلم ذنبي في خلق زوجتي وفي خلق دابتي

هذي إشارة بسيطه مما نشوفه مع بعض الأعضاء او بعض الناس بشكل عام

تجي لعضو تحصله يشتكي من مشكله بسيارة معينه و يسب فيها و يقول تتكرر أعطالها و خسر عليها

أكثر من قيمتها و تجلس بالورشه أكثر مما يستخدمها

و نفس نوع السيارة مع غيره تحصلها سالكه سنوات و تكد معاه بدون اي ملاحظات

تحصله بسبب ان دخل فيها مال حرام يا بقيمتها او قطع الغيار اللي يحطها فيها

يا أنه شاري السيارة بفلوس حرام

أو انه ركب قطع فيها بالحرام او غش فيها بأي طريقة كانت

اذكر لكم قصه حاصله معي شخصيا

كان معي كامري ولا قد شفت أهل الكوامري يشتكون من المراوح انها تتعطل

استخدمتها فترة و مره طحت بحفرة بسيطه تابعه لموبايلي السيارة ما تأثرت ما جاها شيء

كان بإمكاني اطلعها و استخدمها بدون ما احط عليها ريال

لكن قلت يلا موبايلي فرصه عليهم يلعبون على الناس خلني انصب عليهم

و اتصل بالمرور يجي و يكتب تقرير و ثاني يوم اروح اسعر السيارة

قبل ما اروح للتقديرات مريت محل زينه خليته يفك وجه السيارة كامل الصدام و الشمعات و الشبك

و يتركها عنده ساعه اروح اقدر السيارة و ارجع له

وانا رايح التقدير المسافه اقل من 5 دقايق و يبنشر علي كفر و الجو حار ما اذكر معي استبنه او لا

المهم اني ما وقفت مشيت حتى بنشر الا و الكفر تقطع و هذي اول الخساير

اوصل لمحل التقديرات يقدرون شغل اليد و يعطوني قطع الغيار اللي تحتاج غيار

كلها مفكوكه و موجوده صدام و شبك و شمعات

المهم سعر التقدير كامل كان حدود 6000 ريال و اوديها للمرور و خلال اسبوع الا مندوب موبايلي يتصل

و اتواجه انا و هو بالمرور عشان يسلمني الفلوس و اتنازل عن الدعوى

و من بعدها ما عاد شفت خير بالسيارة

كل شهر شهرين يحترق عندي دينمو المروحه و اغيره

و كل 3 شهور بالكثير يضرب علي الكمبروسر و اغيره

جلست ببهذله بالسيارة مراوح و كمبروسر و سلف مرتين خلال سنه حتى راحت السيارة

اللي اخذها تواصلت معاه بعد كم شهر كيف السيارة معك قال سالكه امورها و يمدح فيها

و المراوح اللي كانت مبهذلتني و المكيف قال كل شيء سليم

بعدها توبه كم سنه اخذتها درس ما احط بالسيارة ريال حرام

و فيه اعرف ناس شخصيا تحصله يسوي حادث بسيط وهو يكون غلطان و يحاول يلف و يدور

عشان ما يحسب الغلط عليه و يغرم الطرف الثاني و ياخذ تعويض منه

ما يمر فترة بسيطه الا هو حصل له مشكله بالسيارة يا حادث ثاني لحاله بدون طرف ثاني

ضارب رصيف او شيء او اعطال متكرره بالسيارة تكرهه بالسيارة كلها

سبحان الله كثير من الاحيان نفس المكان اللي حطيت فيه مال الحرام تحصله يتضرر

يعني لو احد دق سيارتك دقه بسيطه بالصدام و عندك الاسطب من زمان مكسور

خاصه لو اللي صدمك عنده تأمين تقول يلا فرصه اصلحها على حساب التأمين كامله

ما يمديك تصلحها فترة الا انصدمت بنفس المكان

و مثل ما اشوف بالمنتدى ناس تشتكي من سيارة معينه بتكرار خراباتها و يسب و يلعن فيها

و تحصلها مع غيره امورها طيبه ولا فيها خلاف

المشكله اشوف احيانا ناس على اشياء تافهه يبي ياكل حرام

تجي لتلميع الشمعات مثلا يتفق معاه على 40 ريال مثلا و الرجال يلمع و يخلص

يقوله شغلك ماهو مضبوط وهو شايف الشغل عاجبه لكن لازم يجيب اي عذر عشان يخصم من المبلغ

و تحصله يعطيه 30 ريال يعني يخصم 10 بحجة ان الشغل ماهو مضبوط

يجي بعدين يقول سيارتي خرابات و تعبتني

فيه سيارات فعلا عليها ملاحظات بشكل عام هذا شيء ما ننكره

مثل مكيف بعض السيارات الكوريه انه ما يبرد و سنه سنتين و يضرب الكمبروسر

هذا شيء عام بجميع السيارات نفس النوعيه

لكن المشكله باللي يشتكي من سيارة سالكه مع غيره و معاه كلها مشاكل و يذمها

تجي تتابع ردوده تعرف انه فعلا نص فلوسه حرام

واحد يستفسر عن مشكله معينه مثلا يجيك يرد عليه يحاول يجيب له اي حل حلال حرام ما يهم

المهم عنده يطلع من المشكله







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


وعليكم السلام

أتفق معك اخوي محمد وبالفعل كثير من الناس لايهتم بمصدر أمواله ان كانت حلال أو غلب عليها الحرام

قال عمر، رضي الله عنه: كنا ندع تسعة أعشار الحلال مخافة الوقوع في الحرام، وذلك امتثالاً لقول النبي، صلى الله عليه وسلم: «إن الحلال بيّن وإن الحرام بيّن وبينهما مشتبهات لا يعلمهن كثير من الناس، فمن اتقى الشبهات استبرأ لدينه وعرضه، ومن وقع في الشبهات وقع في الحرام كالراعي يرعى حول الحمى يوشك أن يرتع فيه».



up 4 down 2
يارب توفيقك 2014 1656
قبل 4 شهر و 2 أسبوع



وعندك بعد لصارت سياره مصكوكه عين مع واحد ما يتهنى فيها

مثلي انا واحد اعرفه نفس سيارتي قديمة وانا هو نفس موتر الله يهداه

موتره قرمبع وانا نظيف كل شوي يروح ويجي فيها خرب قفل شنطة لين اخرتها وجهيه راحت


up 0 down 0
mohammed1368 68
قبل 4 شهر و 2 أسبوع



الله عليك من زماااان ماقريت موضوع جميل مثل كذا

ليت الي ينزلون اعلانات ويقولك انسام بكذا وكذا وهو ما انسام عشان زياة كم الف قد يطلع دبلها عشر مرات بحادث او مشكلة

سبحان الله المال الحلال القليل بركته كثيييييره وشف شيباننا اول فلوسهم ورواتبهم طفسه وسبحان الله ماشيه امورهم ومبسوطين 

وناس رواتبها 30 الف وتتسلف اخر الشهر

الله يبارك لنا ولكم في اموالنا ويبعدنا عن المال الحرام


up 6 down 1
اودي666 144
قبل 4 شهر و 2 أسبوع



الظلم ظلمات
نعوذ بالله ان نظلم شخص ضعيف
ما يقدر ياخذ حقه الا (بالدعوة عليك ان الله ينتقم منك)
فاذا لجأ الى الله ....... اعرف ان الله سينتقم له


up 0 down 0
لا للغلاء 584
قبل 4 شهر و 2 أسبوع



اللهم اغننا بحلالك عن حرامك
.


up 0 down 0
فهد ابن حسين 47
قبل 4 شهر و 2 أسبوع



اعرف واحد من الجماعه باع له سيارة بمبلغ خيالي وهي ماتسوى هالمبالغ نصب له على واحد غشيم النصب مشي عليه
من باعها عليه واشترى له سيارة جديده بعد اسبوعين وهو ماشي فجاه اعترضت له تريله ونزلها صحراء وتقلبت فيه السيارة وراحت تالف وباعها تشليح
المال الحرام مافيه خير


up 3 down 0
هبووب الشمال 33
قبل 4 شهر و 2 أسبوع



طبعا انا ضد التعميم انك تقول ان اذا كثرت الخرابات اعرف ان ماله حرام ! قد تكون السيارة نفسها فيها عيوب مصنعية او يكون وداها لعامل عليمي بورشة وعدم كل شي وتعلم عليها وبعد فترة طلعت الخرابات قد يكون استخدام الشخص سيء وعدم السيارة او يكون ابتلاء !

لكن بشكل عام كلامك صحيح الله يجزاك خير ويكتب اجرك ويعفو عنا وعنك ويجنبنا الحرام .. والمال الحرام يدخل بالرشاوي بعض للي "بعض" موظفين البلدية والامانة خلاها عادة عشان يمشي للناس امورهم ويتغاضى عن المخالفات .. والعقاب قد لا يكون فالسيارة فقط قد يكون في البركة بالمال او الصحة او الابناء او يوم القيامة الله يكفينا الشر


up 3 down 0
ابو محمد 154 44
قبل 4 شهر و 2 أسبوع



موضوع جميل تشكر عليه ، واهم شيء انك اتعضت وتبت ..

وربي ان شاء الله يسامح ويغفر ذنوبنا وزلاتنا واخطاؤنا .. 

وفعلا مافيه بركه ولا رضى نفس ، وكثير من الاشياء تنشمل بالغش ، لكن انفس بعض الناس طماعه .. 

الله يهدينا ويهدي المسلمين .. 

ولك احلى لايك عالموضوع ،، 


up 1 down 0
m7md 33 653
قبل 4 شهر و 2 أسبوع



قصة جملية وموضوع متميز.

ويكمن سر النجاح والفلاح . في الحياة.
1- مخافة الله والعمل على طاعته ورضاه سبحانه وتعالى.وانه مُطلع عليك بكل الامور.
2- السعي الدؤوب لرضى الوالدين والعمل المتواصل لخدمتهما.
3- فعل الخيرات والاعمال الصالحة مع الجميع. وترك وتجنب المُنكرات والاثام والمعاصي .
________________________________________.

آللهم نسألك بركة المال والاولاد والاعمار وان تعطينا من الخير كُله وتُبعد عنا الشر كُله.


up 2 down 0
theuk1984 775
قبل 4 شهر و 2 أسبوع



اعجبني اعترافك بالذنب والخطا
وخير الخطائين التوابون
اللهم اغننا بحلالك عن حرامك


up 2 down 0
mohammad 13 506
قبل 4 شهر و 2 أسبوع



مال الحرام لن يتهنى به صاحبه بالدنيا قبل الآخر ، أكل مال السحت ستنعكس على صاحبه وبحياته في نهاية الأمر سواء في سيارته او صحته أو أمواله أو عياله .. إلخ


up 2 down 0
abb20 55
قبل 4 شهر و 2 أسبوع



اسلوب سرد الموضوع وتنسيق الاسطر يذكرني بواحد من اعضاء المنتدى 


up 7 down 2
ss super speed 103
قبل 4 شهر و 2 أسبوع



وعليكم السلام ورحمة الله وبركاته
موضوع رائع وكأني سبق وقرأته هنا نسيت من كتبه هل هو أنت أم غيرك.
أتفق معك ومع كل الشباب في كل كلامكم بارك الله فيكم جميعاً.
السؤال اللي يطرح نفسه ليش 17 دسلايك للموضوع!!!!؟؟؟؟


up 1 down 4
وليد م ع الدخيِّل 477
قبل 4 شهر و 2 أسبوع



ياحظه من يحلله الله قبل يوم القيامه قبل يعذبه بالمال الحرام في النار اجارنا الله واياكم منها

كان لي جار يحكي لي بلسانه يقول سرقت طيس سياره وركبتها على سيارتي يقول وصلت البيت تهاوشت مع زوجتي اليوم الثاني احترقت يد ولدي وتوالت على المشاكل عملي وبيتي حتى تذكرت الطيس اللي سرقتها وعرفت انها دعوة مظلوم يقول رحت ادور السياره ولقيت صاحبها عندها وانا اتاسف منه واستسمحه واعطيه طيس سيارته وما تركته حتى رضي علي وبعدها توبة

الرسول صل الله عليه وسلم يقول جسم نيت على السحت (اي مال الحرام) فالنار اولى به




up 1 down 0
fanar1 553
قبل 4 شهر و 2 أسبوع



اتفق معك تماما صاحب الموضوع
عسى الله أن يغننا بحلاله عن حرامه


up 1 down 0
abu rahaf55 1
قبل 4 شهر و أسبوع



لا زال المنتدى يعج بالمرضى نفسياً.
مشاركتي 4 دسلايكات وأحدهم رايح يكمل على مواضيعي ومشاركاتي فيها، والسبب؟؟ بلا سبب.
شفاك الله يا مريض.


up 0 down 0
وليد م ع الدخيِّل 477
قبل 4 شهر و أسبوع



بيض الله وجهك على الكلام الجميل ..




up 0 down 0
.حسبي الله. 16
قبل 3 شهر و 3 أسبوع