ترهيم ماركيز

اذا تبغى ترهيم كامل تحتاج الاتي /

رفرفين / 300-400 من التشاليح
صدام امامي / 180 تايوان
تحتاج ايضا الجسر الي يجي خلف الشبك مباشرة والفايبر الي يركب فيه الشبك
شمعات وكشفات / 500 تزيد تنقص حسب شطارتك
شبك / 120 تايوان
اركان جانبيه / 180

انتهينا من الوجهية وهيا المعقدة

جنب السيارة //

جلد الابواب / ....
الجنوط مقاس 17 تكون اصليه ثم اصليه ركز عليها تخذها من التشاليح الاربع بحدود 800
وخذ كفر دعسته صغيرة علشان يطلع الجنط كبير وشكله جميل

الخلفيه //
تبدل الاسطبات مع العاكس فقط / .....

طيب كم التكلفه / حسب بس حاول توازن بس التشاليح وقطع التايوان في جميع القطع
الا الجسر الي يربط الرفرفين ويجي خلف الشبك مباشرة خذه اصلي وكاله نصيحه تقدر تقول بيكلفك حدود 5000 ريال شغل محترم وقطع جوده ممتازة مثل التايوان

كيف ينكشف انه مرهم هاذي للخبيرين بالفورد //
1- غطاء التانكي يختلف عن الموديل الحديث
2 - ازياق الابواب الي بين القزازين تجي اسود اما في الموديل الحديث تجي على اللون السيارة


ايضا // تحتاج رش و ازياق على كامل الصدامات والجلد + كهرباء علشان تولف الكشافات وممكن الانوار في حال اختلاف الفيش

بختصار ابعد افضل لان الترهيم الكويس مكلف بس شغل طبطب ليس ما ينفع وخاصة موترك على كلامك انه وردة

اذا مصر ابدا في الوجهية + جلد الابواب علشان الرش ,, يبقالك الجنوط والخلفيه

انشاء الله ما اكون نسيت شي

كفيت ووفيت يااخوي الله يبيض وجهك مدري الكبوت لازم يتغير ولالا ف ناس قالو الرفارف تنقص حسب الاركان يعني مااحتاج اغيرها م اادري والله والتشاليح احسهم بيفلقوني اشرايك ف قطع الغيار التايوان 

انت لا تاخذ من التشاليح الا الجسر والرفارف والجنوط هذول اساسي يكونو وكاله والباقي تايوان كويس
بالنسبه لقص الرفرف ما انصحك فيه لانها ماراح تزبط ,, والكبوت ما تغير من 98 ال 11

كفى ووفى اخونا وحبيبنا / mercy_sa 
وماشاء الله عليه دايم يتحفنا بمواضيعه وشغل يده في سيارته والشاهد الله اني استفدت منه الكثير ماشاء الله عليه

وعموما الرجال اعطاك بالتفصيل الطلبات كاملة للتعديل والاسعار  التقريبيه وماقصر ولكن  أضيف على كلامه نقطه وحده وفي وجهة نظري انها اولى من دفع هالمبلغ ع تعديل الشكل 

• اذا كان موترك نظيف ويستاهل الاقتناء والاستخدام فأنصحك تبدأ تشيك عليه ميكانيكيا في بطن السياره كامله من ( جوزات - واذرعه - ومقصات - وعمود توازن - وكراسي قير ومكينه وملاحظة اذا يوجد تهريبات في الصوفة ( القير - المكينة )  لا قدر الله.
• زيوت القير والدفرنس اذا طولت عليها غيرها بزيت من الوكااااالة.
• شيك ع كهرباء السياره من بواجي وكويلات واسلاكها.
• غير الاشياء الاستهلاكية اذا كان مطول ما غيرتها ( سير الدينمو - بلف الحراره - صفاية البنزين - تغيير موية الرديتر جيك اصلي من الوكالة مع 4 علب ماء مقطر - بواجي )

ويمكن نسيت شي ماذكرته لك لكن وانا اخوك دامك بتدفع فوق 5000 ع تعديل الشكل وع حسب كلامك الموتر نظيف فصيانتها اللي ذكرتها لك فوق اولى وأهم وبيصير يخدمك كم سنة قدام وانت مرتاح خصوصاً ان الماركيز النظييييف خدوم ويكرف ويريح صاحبه من الصيانة والخرابات المكلفة هذا اذا كان نظيييف.


اذا والله وانا اخوك بتقول ابداً كل هالاشياء اللي ذكرتها مشيك عليها ومعي فلوس ماني محتاجها فعدل شكله الى 2011 وبيكون اجمل وعسى الله يعطيك خيره ويكفيك شره

واعذرني اني شطحت شوي عن استفسارك  بس حبيت اقدم لك شور واعتذر ع الاطالة 

المشكلة لو عدلته بيكلفك مبلغ وقدره .. ولو بعته مستقبلا بيكون مرهم ومعدل اشياء كثيرة فيه

وما قصر اخونا mercy_sa عطاك بالتفصيل الممل

ولكن كلامي مع كلام الأخ ياسر الياسر

انفض الموتر ميكانيكيا واستخدمه دامه نظيف على قولتك .. وانا أشوف 2002 جميل جدا كشكل

فيه شخص نفس شكل موترك بس أضاف عليها جنوط اللينكون التاون كار اللي يجي حجمه 20 أتوقع او 18 ... يجي نيكل

صراحة اعطاها منظر جمالي رائع

هذي صورة الجنط
https://images.mstaml.com/items/i147152353560450092.jpg

انا وجهة نظري أن الجنط ان كان اعطى حجم كبير ونقشه جميله بيعطي منظر للسيارة

واذا نويت تعدل لا تنسى الجنوط

موفق خير

طيب فكرت ترهمه على شكل مارودر ؟

اذا الفرد نظيف لا تفرط فيه وترهمه