أضف سؤال أو موضوع جديد          

كم يسوى الاكسبديشن

up 2 down 1
الحميدي وليد 121
قبل 2 شهر و أسبوع



السلام عليكم ورحمة الله وبركاته
سؤال يا اخوان
بسبب كثرة السومات في حراج وعدم جدية معظمها نصل لحيرة في اعطاء الشي سعره المناسب .
ابحث عن اكسبديشن والسومات طالعه نازله ماتدري الصادق من الكذاب.
المهم حصلت لي واحد فل كامل ٢٠٠٨ قصير بدون دبل وممشاه في بحر ال١٠٠ الف وعليها
فبرايكم كم يسوى له مع العلم ان راعيه يقول ٣٠ الف
طبعا هو المالك من الوكالة
ياليت تساعدوني بالاستقرار بخيار السعر المناسب وشكر ا







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


احسن شي تشوف لك شريطي من اصحاب المعارض يكون امين 
يسعر لك الموتر لانه مافيه احد يفهم باسعار السيارت مثلهم .


up 1 down 0
صمناعي 114
قبل 2 شهر و أسبوع



اكثر من واحد يقول ١٥ الف طيب من يقنع الرجال بالعشرين وانا شراي حد شي يحير


up 0 down 0
الحميدي وليد 121
قبل 2 شهر و أسبوع



١٥ ما تجيب لك ستاندر نظيف فما بالك فل كامل حسب كلامك
اللي قالوا لك ١٥ قولهم جيبوا لي نظيف بالقيمه هذي و لكم سعي ٢٠٠٠ ريال راعين سوالف بس


up 5 down 3
صالح بن محمد. -32
قبل 2 شهر و أسبوع



قلت لواحد منهم بعطيك عشرين الف اشتره لي ب ١٥ الف والباقي حلال عليك


up 2 down 0
الحميدي وليد 121
قبل 2 شهر و أسبوع



هذي عروض الوكالة عالمستعمل موديل 2012 نص فل من 40 ل 50 الف
http://www.yabila.com/ajax_image.php?id=70927



up 1 down 0
rashidy 417
قبل 2 شهر و أسبوع



عزيزي شف بقولك شغله ترى الشغله تقديريه قبل ماتكون حدود بمعنى


جب لي أي سيارة كانت خلنا نضرب مثال على الاكسبدشن بحكم انك ذكرته وراغب شراءه


يعني اول شي اللي قالولك ب 15 هذا لاعاد تكلمه لأنه يلعب عليك ويجيب كلام من راسه يعني بعض الناس ترى يطير في العجه ترى السيارات نزلت وترى 8 سلندر ماعاد يسوى ومحد يبيه والمفروض سعره كذا


ترى السيارات انت تقدرها من عدة جوانب مهب من جانب واحد يعني بعضهم يقولك 2008 خلاص يسوى 15 الى 20 طيب ال 2008 اللي ماشي 400 وفيه وجهيه يختلف عن اللي ماشي 200 الف مافيه الا رشة رفرف وصدام مثلاً نظافة الداخلية محركاته الخ ..... يعني احياناً ممكن موديل 2008 ياخذ قيمة 2010 من نظافته والعكس صحيح احياناً تاخذ 2010 بقيمة 2008 والسبب انه متهالك


وبعدين بوضح لك شغله في سيارات وخاصةً زي السيارات الكبار اللي تطول ما يتغير شكلها جموس اكسبدشن وتقريباً تلقى موديل موديلين نفس كل شي مثل الجمس 2011 على 2012 وهكذا وصلت الفكرة تلقى اسعارها متخالطة مع بعض والنظافة هي رئيسة الحكم يعني لو جاني 2011 ماشي 150 بدي بلد ونظافه داخلية ويصفط باخذه منيب ماخذ 2012 ماشي 190 فيه رفرف وفيه تهريب بسيط بيكلفني مبلغ مثلاً لأنهم زي بعض حتى لو فرق سنة في الموديل مهب كل شي الموديل


يعني هذا اللي انت ذكرته مانقدر نحكم انه ما يستاهل ولا يستاهل من كلام لابد من الوقوف على الموتر وينظر له من جميع الجوانب يعني اللي يقولك بجيب لك ب 15 ولو انه لو يفحط ماجاب لك واحد نظيف جاهز للاستخدام بهالسعر وخذيته وحطيت فيه كفرات وصيانات وتهاريب قل ب 5000 ولا 6000 وفوق على صيانتك له مهب مثل نظافة ذا ابو 30 كممشى وداخلي وركزة بدي ورشوش الخ .... يعني هل المنطق يقول ادفع فرق 5000 مثلاً الى 7000 واشتر هالنظيف جاهز واريح دماغي واكسب الجهتين ولا اخذ ذاك واصلح وفوق على كذا ما بثق فيه مثل النظيف هذا وحتى مظهرة خارجياً وداخلياً وميكانيكا مهب نفسه


لكن لا يعني اني ابالغ بعد بسعره يعني مثلاً يشطح ويرفعه فوق مرة واشتريه منه عشانه نظيف لا اقدر انا واشوف ف ترى تقدير السيارة كم تستحق تحديداً صعب جداً حتى على شيخ المعارض احياناً تنظلم



يعني بضرب لك مثال لو جتني سوناتا تالفه مثلاً تشليح مامشت الا 50 الف مثلاً وبديها بلد قبل الحادث وقدرها شيخ المعارض ب 50 مثلاً وهي لو كانت نظيفة وبايعها بنظافته تجيب له 60 هو انظلم

ويجي غيره ماشي موتره 120 جالدها وقد جتها حكات وراش باب ورفرف وقد خبط بها رصيف وقدرها شيخ المعارض ب 45 ولا عليها وهي هذا حقها في السوق او اقل بعد ويمكن يتعب على مايبيعها ف هو ربحان افتك منها وخذا حقها وزود


اسف على الاطالة ، اتمنى افدتك واذا تبي تعرف كم يستحق الموتر ادخل السوق بعمق وقدر كم يسوون زملائه مع مراعاة النظافة العامة كممشى ونظافة بدي وميكانيكا الخ .... وشف الموديلات اللي بعده كم تسوى واذا هو في الحدود الطبيعية ونظيف مرة توكل على الله الحين وانا اخوك والله من الصعب جداً تحصل الموتر النظيف صراحة واقولها بكل امانة انا ادور على سيارة 2015 او كذا لواحد زميلي والله عجزت القى بدي وكالة الا يمكن تنعد على الاصابع وحتى لو لقيت بدي وكالة تلقاها مدموره من جوا ومغبره ورايحه فيها موتري 2009 يمكن انظف منها داخلي ف صراحة الناس اختلف استخدامها للسيارات وصارت ماعاد تهتم الا من رحم ربي وان اهتم من جهة اهمل الجهة الثانية يعني بعضهم يهتم ميكانيكا وكذا بس البدي ماتاخذه بريال مايهتم خارجياً ولا تلقى عياله ولا هو معدم الداخلي ومكسر ومفكك يعني سالفة طويلة عريضة توجع الراس


تحياتي


up 4 down 0
a.ibrahem 3043
قبل 2 شهر و أسبوع



اشور عليك انك تنزل المعارض
شغلة 3 زيارات واظمن لك باذن الله تعرف
اسعارها والنظيف.....والممشى ...
واسأل اصحابها اللي يدورون ...بشرط ما يكون شريطي
وراح تعرف الشريطي من كلامه ومبالغته في اظهار
نظافة الموتر .....واسأل عن السياره الواقفه في المعارض
وراح تتعرف باذن الله وتاخذ فكره شامله


up 2 down 0
لا للغلاء 513
قبل 2 شهر و أسبوع



ابراهيم ماشاء الله عليك والله انك جبتها بالمختصر المفيد
بحاول به ب ٢٧ الف فقط ارضاء لنفسي وبشوف كيف
والا الموتر وقفته شيخ وباكر لي موعد معه اجرب السيارة وافحصها ان شاء الله


up 0 down 0
الحميدي وليد 121
قبل 2 شهر و أسبوع



الحميدي
حسب خبرتي المتواضعه الموتر اللي انت ذكرت ما يقل سعره عن
٢٥ الف بالوقت الحالي اذا بديه سليم من الرش والسمكره ولو يخليه
لك ب ٢٠ خذه وانت مغمض لان الموترممشاه قليل بالنسبه لموديله

انا قبل اسبوع تقريبا سمت مثله لكن موديل ٧ من راعيه ٢٠ ولا باع 
نزول السيارات اللي انت تسمع عنه طفيف ولا يستحق الذكر لكن
السوق (اقصد حركة البيع والشراء) هي اللي حصل فيها فتور شديد .



up 1 down 0
صمناعي 114
قبل 2 شهر و أسبوع



٢٠٠٧ مختلف عن ٢٠٠٨
الشكل نفسه لكن ٢٠٠٧ مكينه و قير نفس ٢٠٠٦ و تحت المكينه القديمه
و اللي يعرف الفروقات بيعرف كم يدفع على ٢٠٠٧ و ٢٠٠٨


up 1 down 0
صالح بن محمد. -32
قبل 2 شهر و أسبوع



صالح متاكد ان في فرق في المكاين والجيرات بين ٢٠٠٧ و ٢٠٠٨


up 0 down 0
الحميدي وليد 121
قبل 2 شهر و أسبوع



نفس نظام التشارجر
٢٠١١ شكل مختلف تماما عن ٢٠١٠ لكن نفس المحركات

٢٠١٢ نفس شكل ٢٠١١ لكن محركات مختلفه


up 1 down 0
صالح بن محمد. -32
قبل 2 شهر و أسبوع



يعني لازم اركز على موديل ٢٠٠٨ وطالع
يعطييك العافية على هالمعلومة


up 0 down 0
الحميدي وليد 121
قبل 2 شهر و أسبوع