أضف سؤال أو موضوع جديد          

مشكلة بحرارة الفورد في الخط بصرفية زائدة للبنزين بشكل كبير

up 2 down 0



السلام عليكم ورحمة الله وبركاته

اخوان انا عندي ماركيز 98

الموتر كان واقف لمدة تقريبا شهرين وجيت الاسبوع هذا استخدمة وواجهتني مشكلتين

المشكلة الاولى البنزين

طبعا يوم جيت اشغله كانت اللمبة مولعة حقت البنزين ورحت عبيته فل لكن تفاجأت بان عداد الكيلومترات اللي متوقع يقطعها وصل 280 بس

استغربت دايما يكون 450 الى 500 لكن مدري ليش طلع 280 قلت مو مشكلة عشانه واقف فترة واخطا في قراءة قلت لامشيت بيزين لكن اتفاجأ بصرفية بنزين كبيرة جدا ماتوقعتها البنزين ينشفط شفط وفي شوي يروح مايقعد
حتى قبل لا اوقفة ماكان يسوي كذا ما ادري وش صار
الموتر له معي 9 سنوات واول مرة اشوف الصرفية هذي ما ادري وش المشكلة افيدوني فيها

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,

المشكلة الثانية الحرارة مسكت خط ابو عشر دقايق بالليل وبسرعة تقريبا 160 عشان اشوف عزم الموتر الا اتفاجأ بعداد الحرارة يلعب فوق النص وينزل يلعب وينزل وشوي فوق النص بشرطة يثبت دقيقة ثم ينزل وعلى هالحال استغربت

قلت لازم اشيك ع الموتر ورحت حق الرديدرات وسويت تسييخ مع العلم اني شارية جديد قبل سنة مكسيكي ومالقيت فيه اي تهريب ومع العلم ايضا اني مغير الطرمبة حقت الموية مع تغيير الرديتر اصلي وكالة

لقيتة وسخ شوي ونظفناه وطلعنا الماء القديم وحتى العامل اخذ يعبي موية في خرطوش اللي يودي للمكينة وينفخ فيه الين مانزل الموية القديمة كلها

وعبيته ماء فورد الاصلي والبلف مشيول من اول

وقلت اجربة من جديد ونفس المشكلة بعد خمس دقايق وانا امشي 160 في الليل الحرارة تلعب فوق النص ومرة تثبت فوق النص وشوي تنزل وقفت على جنب وافتح الكبوت الا المروحة شغالة وجلست ابو عشر دقايق تقريبا والسيارة شغالة الا الحرارة نزلت وصارت ثلاث شرطات

ما ادري عاد وش المشكلة

ليش ترتفع اذا مسكت خط

وش المشكلة منه هل المروحة ماتبرد زين ولا فيه مشكلة بنظام التبريد ولا وش العلة افيدوني اذا عندكم علم

وسلامتكم







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


بخصوص صرفية البنزين شيك ع البخاخات
لان اغلب مشاكل صرفية البنزين بسببها

الحرارة مع المشي سببها رأس المكينة او الرديتر
وتأكد اذا كان فيه تهريب او لا

وعلمنا اش يصير معك عشان نستفيد


up 0 down 0
كورولا111 141
قبل 3 شهر



بخصوص الحراره رجع بلف الحرارة ليش فاك البلف
وثاني شي يمكن عداد الحراره خربان او حساس الحراره فيه مشكله 
وعندك الشكمان اذا مقفل او منعفط ترتفع الحرارة وأنت ماشي 
ودامك وقف السياره ومافيها شي لاتغير فيها شي الا وأنت متأكد منه
افتح الكبوت وشف الافياش والكويلات يمكن مرتخيه افياش البخاخات 
ويمكن بس يبي لها تنظيف من الغبار


up 0 down 0
w.asa 2098
قبل 3 شهر



يمكن العدادات ماتقرا صح لان الوقفه مالها علاقه بالخرابات اللي ذكرتها


up 0 down 0
راكان443 54
قبل 3 شهر



اولا رجع البلف حق الحراره 
ثانيا تأكد من الخراطيش احتمال واحد ينصفط مع السرعه 
ثالثا لاتسرع ياخي السرعه مو زينه



up 0 down 1
mmbbhh63 -1
قبل 3 شهر



الي اعرفه اذا فاك بلف الحراره  الحراره ما تسير ثابته 
رجع البلف  افضل للموتر مو بس للحراره حتى في صرفية 
البنزين 


up 0 down 0
-ابو نوف 3
قبل 3 شهر



تأكد من طرمبة الموية كانت عندي نفس مشكلتك بالفورد تنزل و شوي تطلع ثانية وكذا
غير الطرمبة أكيد خربانه انا عندي ٢٠٠٢ و لقيتها منتهية يوم غيرتها و ضبط الموتر من بعدها 


يعطيكم العافية ياشباب واشكركم جميعا واشكر كل من رد علي

بالنسبة للحرارة ماخليت ورشة ماجيتها وكلن يفتي من راسة محد متأكد

اخر ورشة متخصص امريكي قال شوف بشكل مبدئي عندك الخراطيش لينة جدا ممكن مع الدعس تنسفط ومايمر الموية وهذى اللي يسبب الحرارة لادعست واذا فكيت رجلك رجعت الحرارة طبيعية

غير الخراطيش , طبعا الموتر له معي تسع سنوات ومن يوم شريته ماقد غيرت الخراطيش قلت يمكن منها

واروح ابدل الخراطيش وكالة واجرب امسك خط

بالاول بعد خمس دقايق من الدعس على الخط ترتفع الحرارة لكن مع الخراطيش الجديدة خذيت عشر دقايق وانا ماشي خط ورجعت للمشكلة الاولى

وارجع للميكانيكي قال بركب معاك ابغى اتأكد من حاجة وامشي بدون ماتشغل المكيف

وامسك خط معاه ربع ساعة وانا امشي 160 والحرارة ما ارتفعت نهائيا

قال شوف المشكلة في المروحة عندك ضعيفة او بالأصح تماتيك المروحة اذا شغلت المكيف ماتشبك معاك السرعة الثانية حقت المروحة يشتغل بس السرعة الاولى لان اذا شغلت المكيف يضعف الدينموا حق المروحة ومايشتغل عندك السرعة الثانية

لكن اذا ماشغلت المكيف ماعندك ضغط على المكينة وبالتالي تشتغل معاك السرعة الثانية

ما ادري عاد هل كلامة صدق ولا صرفلي من راسة

قلت طيب اغير تماتيك المروحة قال شوف تماتيك لحالة ماتلقى اصلي امريكي بس والافضل تشتري مروحة كاملة اضمن لك

وانتوا عارفين مروحة كاملة مايقارب 950 ريال اذكرها قبل كم سنة

ونزلته ورحت

وقلت خليني اجرب اليوم امسك خط بدون ما اشغل المكيف وامسك خط 40 كيلوا وانا مثبت السرعة على 160 الحرارة ما ارتفعت نهائيا مع اني اول امشي وانا مشغل المكيف مايمديني امشي 10 كيلوا الا والحرارة مرتفعة

بعد ماقطعت 40 كيلو وقفت مباشرة ابي اشوف المروحة واتفاجأ بأن المروحة مو شغالة نهائيا !!!!!

طيب كيف مع هالسرعة والمسافة ما ارتفعت الحرارة وانا شاد حزم الموتر

قلت طيب خليني ارجع وانا مشغل المكيف وما امداني اكمل 10 كيلوا الا والحرارة مرتفعة واوقف على جنب وعلطول افتح الكبوت والمروحة شغالة قلت خلني اتاكد من كلام الرجال السرعة الثانية شغالة ولا لا

يعني دفع الهوا ماهوب ذا القوة مدري انا اتوهم

وارجع البيت واوقف السيارة ساعة ونص عشان تبرد وارجع اشغلها وما اشتغلت المروحة واشغل المكيف وفكيت الكبوت ابي اشوف هل دفع الهوا نفس قبل يوم ارتفعت الحرارة ولا اقل

واتفاجأ بأن دفع الهوا هو هو ماتغير يوم ارتفعت الحرارة ما ادري هل هو يشبك على السرعة الثانية علطول او بس يشتغل ع السرعة الاولى

وش العلم الحين

طفشت من مكثر ما افر بالورش وما ابي اتكلف واشتري شي وماتضبط

اللي مر عليه مشكلتي يفيدني


اما بالنسبة للبنزين غيرت بواجي ونظفت البخاخات والحمد الله تعدلت الصرفية بشكل ملحوظ لكن مازالت الصرفية باقية لكن افضل من اول


up 0 down 0



بخصوص الصرفية صفاية البانزين لها دخل غيرها اصليه ب 35 ريال وفلتر هواء المكينة له دخل بعد اما عن الحرارة الله يعينك لو المراوح ماتشتغل يعني منها بس انت ماترتفع عندك الحرارة وانت تمشي معناته وحده منهم تشتغل مضبوط والثانية يمكن نص ونص الله اعلم


up 0 down 0
فيصل طلال... 157
قبل 3 شهر



يا خوي غير كتوت المروحه المشكله صاره معي رالحمدالله غيره الكتوت في ١٢٠ريال اصلي وصلرت تمام ًً


up 0 down 0
بركات ا
قبل 2 شهر و 3 أسبوع



لاتستغرب اذا كنت مسرع ومااشتغلت المروحة 

الهوا الخارجي يكفي غالبا.

برايي كيف تختبر المروحة شغل السياره وشغل المكيف اذا تغير صوت المروحة 

معناه تمام..ولو المروحة عطلانه او ضعيفه اتوقع المكيف تقل برودته

ثاني شغله شيك على كتاوت المروحة..وشيك على مويه الرديتر

باستمرار هالفتره خاصه انك مغيرها يمكن معبيه هوا ..ودليل انها معبيه هوا تسمع خشخشه


مويه عند الطبلون.... زود المويه كم لتر لايغرك المعيار ترى بتشرب مابتقول لا لحد مايطلع الهوا


up 0 down 0
abdullah.ags 288
قبل 2 شهر و 3 أسبوع



الحمد الله انحلت مشكلة الحرارة

اشكر كل من ساعدني ومن عاوني على حل مشكلة الحرارة

اشكركم جزيل الشكر

طبعا المشكلة طلعت من الدينموا حق المروحة ضعيف وماتبرد المروحة زين

طبعا بالأول قلت بغير مروحة كاملة تشليح وخذيت مروحة تشليح لكن للأسف لقيت الديكور حقها الاسود فيه بعض الكسور

قلت مو مشكلة انا ديكوري سليم بفك الدينموا والمروحة من دون الديكور وبركبها في ديكور المروحة حقي السليم

لكن تفاجات بحاجتين

المروحة اللي جبتها تشليح يقول الكهربائي فيها حساس وشفته انا لكن مروحتي انا اللي بسيارتي مافيها حساس ولا اي شي مجرد ديكور

حتى انا تأكدت من هالشي يوم جيت ابركب المرحة مجرد الكهربائي سقطها في السيارة وركب فيش المروحة بس ماركب شي ثاني

صورته هنا بالرابط نفس مكان هالصورة محطوط علية بالاحمر

http://www.ford4arab.com/upload/i/00000/ahl3gpo446um.jpg

والمشكلة الثانية ان الدينموا اللي فكيته من المروحة حقت التشليح مايركب على ديكور المروحة حقي

شكيت عاد قلت اما مروحتي تجاري ولا المروحة اللي جبتها من التشليح تجاري لان موتري شاريه مستورد

مع انها نفس الموديل وحتى نفس لون موتري والموديل 98 نفس موتري

احترت وبالنهاية شريت دينموا تجاري لان مافيه اصلي وركبته ومسكت خط طويل وعلى سرعة 160 واختفت مشكلة الحرارة نهائيا وما ارتفعت الحرارة خير شر ماشاء الله

لكن باقي مشكلة المروحة اللي خذيتها انا محيرتي

احد عنده علم فيها


up 1 down 0
عامر الدوسرى 59
قبل 2 شهر و 2 أسبوع



بيض الله وجهك ياخوي عامر على الإفادة
أنا عندي نففس مشكلتك الآن وموتري ماركيز 99 ... ترتفع الحرارة شرطة فوق النص وتنزل وع ذا الحال
مع العلم إني لما أخذت الموتر ولمدة سنة أو أكثر ماا قد شفت شرطة إضافية فوق النص مهممما كرفت السيارة في الظهر او في خط او زحمة
بعد مدة صارت تلعب تطلع شرطة فوق النص وتنزل توقعتها طبيعي لكن مع المكيف تروح للH أحياناً وخصوصاً إذا كنت واقف
لين انحرق عندي الكمبروسر والظاهر منه
والآن بدون مكيف ومازالت تطلع شرطة فوق النص وتنزل وع ذا الحال

بغير دينمو المروحة واجرب إن شاء الله


up 0 down 0
dehme999 160
قبل 2 شهر



ولك أحلى لايك ............


up 0 down 0
dehme999 160
قبل 2 شهر