زيارتي للمعارض اليوم

الافلون نصيحه لا تعتمد ع كلام موقع حراج ولا على الموقفه بالمعارض 
شوف الساحه وشوف الناس الي بتبيع الشراء يبي لك تتركد وتلقى الي تبي 
وبسعر مناسب 

شف يالغالي : كنت املك افالون 2012 ماشيه 31 ورده لون لؤلؤي مراتب جلد تبريد تسخين كامير خلفية شاشه مواصفات البازعي
بدي وكالةةةةة : دخلت المعارض اول ماجوني الشريطية فتحو بابه بي 45 وكلن يعزز لثاني بعه بعه : ويجيب الله ذاك الصامل
ويقول بي 90 صافيه انا قمت اتصارع مع نفسي اقول بارك له واقول اصبر قلت سومة طيب ولانيب بعيد. قال حدها قلت مالي بالحد
ويمسكني قال يشهد الله اني مستخدم واني اشوف الشريطية من اليوم وهم يبخسون لك حد حده :ويوم شفت كلامه كذا دريت انه شريطي كبير
قلت توني على البيع والموتر يسوى أكثر وانتم أبخص : يوم شافني قال وانتم ابخص عرف اني قفطته انه شريطي
قال 92 قلت توني قال 93 قلت توني : قال شكلك من بيأع قلت بيأع لزبون المستخدم : قال انا مستخدم قلت على العين والراس
والله ويروح وكل شوي جايني كم سيم اقول 93 . ويجيني واحد شباب قال كم سيم قلت 93 قام يفحص الموتر :ويقلبه قال انا باخذه عن طريق البنك
عندك اشكاليه قلت اذ الشغله ماتطول ماعندي اشكاليه قال لابكره بخلص : قلت سم : قال بفرق بخمسه قالت هات عربونك
ويعطيني العربون ثلاثه.. وابيعه 98 : وقبل يومين أتمشى بالمعارض ادورلي جمس : لقيت أخو موتري بس مامشى الا 15 محدود بي 110

التورس حصلته بالمعارض الاسبوع الماضي فرق عن كلامك
لقيت ٢٠١٠ نص فل امريكي كاميرا بالمراية ب ٥٠ ويبي ينقص للصامل شامل اللوحات والاستمارة والتأمين
ولقيت ٢٠١٤ شاشة نفيقيشن بدون كاميرا لون ابيض داخلية جملي ب ٦٢ شامل اللوحات والاستمارة والتأمين وللصامل اكيد راح ينقص

وكلها بطايق جمركية ونيصحة تركد السوق ركوووود بمعنى الكلمة

الصالات تجيب الامريكي.   والنظيف مبالغ بسعره. والليمتد ممتاز.  السعودي يبالغون بسعره
انا لو خيرت اخذ امريكي.  لكن من صاله محترمه.  زي العوهلي الملحم
لأن فيه صالات نصابه وفيها جنسيه محدده. الله يفرج لهم ويلعن بشار.     هؤلاء يتلاعبون بالعداد
والله في يوم هالجمعه اني صادق فيما سأورده
وصتني ارمله في الجبيل تبي تاهو.  بحكم عمل بنتها مدرسه بالدمام.  وتبيه فل وال تي زد. وتقول لازم صاله
مريت ومريت.  وتوقفت عند صالة مزايا في الدمام.  تاهو.  التي زِد.  لون حلو عمري ماشفت زيه او قليل زي
لاهو ذهبي ولافضي ولاتفاحي لون رائع البدي  كنظره اوليه ممتاز.   ماشي ٨٠ الف ميل. 
مني ومنهم. طبعا موديل ٢٠٠٩.   اتفقنا على ١٠٢٠٠٠.  سعر صاله جدا حلو.     
اخذت رقم الهيكل.    اقسم بالله العلي العظيم انهم منقصين ١٠٧٠٠٠ ميل حول ١٧٠ الف كيلو. حسب كارفكس
رحت لهم قلت فلوسي جاهزه. جاني سعودي شكله واجهه فقط  عطاني المفتاح. شغلته شفت العداد. طلع ماشي ٨١ الف ميل وكسور قلت
تقول ماشي ٨٠ قال لاتدقق زياده الف الفين عادي. قلت اقول شف واطلع له الجوال.   قال ههه والله ماندري واللي يجيبهن باقي له فلوس عندنا ويعزموني على قهوه تركيه وابلغ التجاره  ولانفعوا
طبعا تكررت غش الصاله في تونكار مع ظابط باكستاني.  ويوم بلغته كم منقصين بغا ينجلط.   بايعينه على انه ماشي ٥٥٠٠٠. وهو مصدر للامارات ماشي ١٦٠ الف 

انا قبل اسبوع حصلت تورس 2013 امريكي بدي وكاله بحدود 51 الف بمعارض جده

دور على مهلك و انتبه من التلاعب بالعداد

المستغرب ان التورسات كثير جدا المستورده لا اعلم هل هو بسبب السعر او ايش ..!؟

انا ابيع التورس ستاندر 2014 ب 54/58 
سعودية وومشاها ماتعدا ال 100 

يالغالي نصيحتي
ابعد عن التورس
الوالد معاه ٢٠١٤ فل الفل
ممشاها الآن ٥٤ ألف
السيارة أغلبها كهرب و كهربائيات
بالإضافة قطع غيارها نار و غالية جداً
الصدام الخلفي سعره وكالة ٤٥٥٠ ريال
غير الشمعات و الكشافات الليد 
لكن ككرف و مكدة و راحة أبصم لك بالعشرة انها عز و راحة

يعطيكم العافية

الأفالون أغلب اللي شفتها مرشوشة ومكروفة 

التورس موديلات 2010 وفوق الشكل القديم

يقولون فيها مشاكل مصنعية وداخليتها الصراحة ما تعجبني

ولا هي أسعارها نازلة  

اخوي ليزو لو تبي تبيع سيارتك كلمني خاص بس تكون بجدة 

الاخ عبدالله الشفيعي ما تخاف الله في الارملة تشتري لها موديل 2009 ب 102 الف ريال وسعره في السوق النظيف جدا ما يتعدى 70 الف وادخل موقع حراج وشاهد الاسعار بنفسك
والله كارثة

انا من اهل الرياض الله يسعدك 
تورس ستاندر ما ابيعها اغلى من 56 الا اذا ممشاها 30/40 
لموديلات 14 
قبل كم يوم بعت وحده ب 54 ابيض بدي بلد فيها تعديل بالباب شي بسيط لا يذكر ماشية 82
وهذي اسعار السوق
اما المعارض توصل 60 اخت موتري بالزبط
حاليا ماعندي تورسات 
عندي كوابرس 2013 و 2015 

قطع غيار البدي غالية جدا ً .. لكن القطع الاستهلاكية رخيصة وفي متناول اليد يعني من 20 ريال الى 1000 ريال كحد اقصى بحسب القطعة .
لكن قطع البدي غالي مثل الكبوت بـ 3900 ريال الصدام الخلفي بـ 4000 ريال الشمعة الامامية بـ 2600 ريال للوحدة الشبك الامامي بـ 2000 ريال الاديتر بـ 900 ريال الواحد المراوح بـ 1200 ريال ( كلها اصليه من الوكالة )
والمشكلة ان قطع البدي التجاري نادر تلاقيه .. والتشليح مقارب لسعر الجديد .. يعني لو صدمت عليه لاسمح الله ولا عندك تأمين راح تتحمل مبالغ كبيرة بالاصلاح .. او تأمن شامل كل سنة وتريح راسك .
لكن السيارة عملية وقوية ومميزاتها كثير : عزل صوت - عزم - رساوة عجيبه في الخط - في الدفع الرباعي تمشي في البر بجنب الجيوب لأن فيها دبل مستمر - والسيارة عملية وصرفية البنزين معقولة وكبيرة بالحجم .
لي موضوع عنها اذا حاب تشوف ادخل على اسمي .. المشاكل اللي واجهتني والمميزات اللي فيها .

سيف البدو.   ههههه الكلام هذا قديم.                    وفريت الصالات.   وعندي شوية خبره
الحمدلله.  عندي اسكاليد.  وفورد.    ماتشكي.    ولاوصتني الا تعرف اني  ابخص.  علما بأنني نصحتها.  بالبعد عن الصالات
كان وقتها.  ال ال تي التاهو.  ٢٠٠٨ ب ٩٠ النظيف وكان الدينالي ب ١١٠ موديل ٢٠٠٨

وسعر الصالات مختلف.    وال تي زد فل.   ولو مهوب ماشي هالمشي دون ١١٥٠٠٠ ماتاخذه ايامها

لا تشتري الا من الساحات وترى الأسعار نازلة للي يبي يبيع ولاتفكر تأخذ من معرض أبدا  الا اذا كانت جديدة أصفار
دور ولا تستعجل قبل فترة حصلت افالون 14 ب 77 فل خرايط في تعديل بسيط بالرفرف اليمين والسيارة نظيفة جداً

والتورس بتحصل 14 و13  سعودي نظيف بالساحات ممشى قليل وسعر مغري
وخل المستورد الغالي يقعد