شرح مبسط ومختصر عن حساس الكفرات

15 7

لايمكنك التصويت حتى الحصول على 20 نقطة على الأقل
إضغط هنا للإخفاء

الكامل وجهه الله 36
قبل 7 سنه و 7 شهر

بسم الله الرحمن الرحيم
السلام عليكم ورحمة الله وبركاته












أنا كتبت موضوع عن حسّاس ضغط الهواء في الكفرات فيه شرح مبسط ومختصر عن فائدة هذا النظام




هنا




وفي هذا الموضوع راح أكتب لكم عن بعض المشاكل اللّي واجهتني بخصوص هذا النظام
وبعض الحلول المناسبة من ناحية البلوف والحساسات اللي في الكفر 
وأيضا الحل في لمبة التحذير الخاصة بنظام حسّاس الهواء في الطبلون "برمجة نظام حساس الهواء"




أحب أنوّه ان سيّارتي فورد فيوجن 2010 قير عادي












# أولاً # المشاكل اللي واجهتني في البلوف والحساسات وحلول لها #




1. البلوف المزودة بها الفورد فيوجن 2010 ربل ومن الداخل مزودة بالحساس




اللي صار معايا انه بعد مرور سنه ونص بعد استخدام الكفرات صار فيه تنسيم والسبب البلوف
رحت ادور بلوف وفي البداية ماحصلت الا من عند الوكالة والواحد يجي سعره 160 - 200 ريال
وغيّرت بلفين بحول الـ 370 ريال بدون التركيب ولا الترصيص... خذ لك تكلفة!
المهم ركبتها وأمري لله وبعد مابدلت البلوف القديمة مع حساساتها مع البلوف الجديدة وحساساتها صارت لمبة التحذير الخاصة بالنظام مولعه على طول في الطبلون... وهنا صارت المشكلة الأولى




2. بعدها بكم يوم صار عندي تنسيم في الكفر الثالث وقلت ماني رايح اشتري من الوكالة وجلست احوس في محلات البنشر في الرياض
الين حصلت محل في الضباب حق كفرات ميشيلين يبيع لك البلف لحاله الحبه بـ 30 - 40 ريال وشكله بيكون زي ماهو موضح ادناه




والميزة في هذا البلف أول شي انك توفّر على نفسك قيمة البلف الكامل من الوكالة "توفير حول الـ 110 ريال"
وغير كذا إن هذا البلف اللي تسويه انك تجيب مفك وتفك الحساس من البلف القديم وترجع تثبته في الجديد واللهم لكم الحمد والشكر












# ثانياً # المشكلة في برمجة حساس ضغط الهواء ولمبة التحذير في الطبلون #




1. بعد ماركبت بلفين مع حساساتهم الجديدة صارت اللمبة التحذيري في الطبلون شغالة طوال الوقت وصارت تسبب لي أزمه!
رحت الوكالة وسألتهم عن البرمجة وقالوا لي اذا انت مغير بلف واحد بحساسه يبيلك برمجه جديدة لجميع الكفرات قلت طيب ماهي مشكلة طيب تسونها لي الآن!
قال لي ابد مالك الا تحجز موعد ونسويه لك ويكلفك حول ال250 على الكفر الواحد < ماأدري هو صرف لي رقم من مخه والا ايش بس المهم الحكاية مادخلت مخي ابداً




رحت أنا وسويت بحث بسيط بخصوص البرمجة لنظام حساس ضغط الهواء وجلست أشوف وش الأنسب الى ان وصلت للحل ولله الحمد وهو برمجة بنفسك وهي سهله...




================================================== ======
تنويه بسيط: اذا كنت مغير طقم كامل لجميع البلوف مع الحساسات... 
ماراح تحتاج لانك تسوي برمجة...
راح تظهر عندك اللمبة التحذيرية في الطبلون وراح تختفي بعد ماتمشي بالسيارة على الطقم الجديد لمدة 3 - 5 دقائق فقط!




أنا بنفسي مجربها لأني كنت مركب طقم جنوط 20 مع كفراتها بطقم بلوف وحساسات الوكالة
وكانت زي السمن على العسل وما احتجت لبرمجة ولا أي هم ووجع راس ماشاء الله!
================================================== ======




الطريقة الخاصة ببرمجة نظام حساس ضغط الهواء بسيط وسهله وغير مكلفة مقارنه بالتكلفة الخاصة بالوكالة من الناحية المادية ومن ناحية الوقت ايضاً




كل اللي تحتاجه هو شراء ريموت برمجة حساسات الكفرات من شركة توكيلات الجزيرة (وهي بالمناسبة قطعة تأتي من ضمن تجهيزات السيارة لفئة فورد إيكولاين E-Series)




رقم القطعة
Motorcrft TPMS-19
8C2T-1A203-AB












# طريقة برمجة نظام حساس ضغط الهواء #




قبل البرمجة: ايقاف السيارة في مكان آمن والتأكد أن ضغط الكفرات الاربع متساوٍ وبالكمية المناسبة للسيارة 
حط السيارة على "P للسيارات الأوتوماتيك" و "القير الأول للسيارات العادي"
بعد ذلك اتبع التعليمات التالية لادخال السيارة في مرحلة البرمجة - the learning mode:




1. ضع المفتاح في السويتش وهو في وضعية OFF ثم اضغط على دواسة الفرامل وافلتها




2. حرك المفتاح من OFF الى ON (بدون ماتشغل السيارة) وبعدها رجع المفتاح الى وضع OFF
3. حرك المفتاح من OFF الى ON (بدون ماتشغل السيارة) وبعدها رجع المفتاح الى وضع OFF




4. حرك المفتاح من OFF الى ON (بدون ماتشغل السيارة) وبعدها اضغط على دواسة الفرامل وافلتها .. وبعدها رجع المفتاح الى وضع OFF




5. حرك المفتاح من OFF الى ON (بدون ماتشغل السيارة) وبعدها رجع المفتاح الى وضع OFF
6. حرك المفتاح من OFF الى ON (بدون ماتشغل السيارة) وبعدها رجع المفتاح الى وضع OFF




7. حرك المفتاح من OFF الى ON (بدون ماتشغل السيارة) وخلي المفتاح على هذه الوضعية




راح تسمع السيارة تعطيك بوري مره واحده يبين لك ان السيارة دخلت نظام البرمجة
وتطلع لك رسالة في طبلون السيارة يبين لك انك دخلت الـ"learning mode" وهو مود البرمجة




خذ الجهاز واطلع عند الكفرات 
- إبدأ من الكفر الأمامي الأيسر واضغط الزر في الجهاز ومرره من جهة البلف "مكان وجود الحساس"
راح تسمع بعدها صوت البوري هذا يدل ان السيارة برمجة الكفر الأمامي الأيسر
- بعدها روح الكفر الأمامي الأيمن وكرر الحركة السابقة الى ان تسمع صوت البوري
- بعدها روح الكفر الأيمن الخلفي وكرر مافعلته في الكفرين السابقين الى ان تسمع صوت البوري
- بعدها روح الكفر الأيسر الخلفي وكرر مافعلته في الكفرات السابقة الى ان تسمع صوت البوري




هنا تكون خلصت برمجة ولما تركب السيارة بتلقى رساله في الطبلون تدلّك على نجاح عملية البرمجة 




مابقى لك الا انك تطفي السويتش وتشغل السيارة وأمورك سمحة بإذن الله!




================================================== ======
س: ماهي السيارات اللي تنفع لها هذه الحلول؟
ج: نتيجة لقرائتي فهذه الطريقة نافعه لسيارات فورد وميركوري ولنكون باذن الله 
================================================== ======




انشالله أكون افدتكم جميعا بخصوص هذا النظام لأني لاحظت أغلب الناس تطلع لهم اشارة الكفرات
ومايهتموا فيها وهذي الطريقة انشالله تفككّم من هذا الهم




3. < قم بتشخيص وتصليح مشكلة حساسات الكفرات لسيارت الفورد بنفسك - منتديات مكشات ****












ودعواتكم وما بغينا غير سلامتكم

إبلاغ

الردود