تجربة شراء سيارة عطلانه واصلاحها و بيعها

السلام عليكم و رحمه الله و بركاته
تعقيباً على موضوعي السابق عن الفورد قلت بنزل تجربتي فيها للفائدة و للنصيحه

طبعاً شريت السيارة و بداخلي نيه للبيع و للربح و ايضاً لتجربة السيارة خصوصا اني اول مرة اشري فورد

بسم الله نبدأ :
اولاً السيارة كانت عند خويي و كان عارضها للبيع و بعد تفكير طويل قررت اشتريها على بركة الله
كلمت خويي و قلتله عندي رغبه بالفورد الي عندك
طبعاً السيارة موديل 2000 لون اسود

طبعاً قاللي افحص السيارة انا قلتله ما يحتاج ادري السيارة يبيلها شغل و عندي علم فيها
اصر علي افحصها و انا رفضت و بالنهاية رفض ياخذ فلوس و قاللي خلها معك 3 ايام و اذا قررت تغير رأيك رجع الموتر
انا ضحكت و قلتله طيب زين تعالي فيها و انا ارجعك

المهم جاني و تقهوى عندي و سلمني السيارة مع الاستمارة و باركلي و قمت و وصلته فيها
طبعاً اتفقنا على سعر 4 الاف ريال بدون كتابه اي اوراق او اي حاجه لانه خويي من فترة طويله و معرفتنا قديمه و انا اعتبره مثل اخوي
الرجال طيب شرواكم و خصوصا انه قاللي جربها اول
انا يوم شفت اسلوبه كذا كان عندي قناعه داخليه لو السيارة سكراب ما راح ارجعها لانه الانسان باسلوبه و طيبه و يوم شفت طيبته شريت السيارة بدون اي نيه ارجاع
حتى كلمته ثاني يوم و بسياق الحديث قلتله بغير زيت للسيارة رفض وقال يابن الحلال جرب السيارة اول لا تتخسر عليها شي هههههه

المهم علشان لا نطول عليكم ما راح اذكر الخرابات الي فيها راح اذكر الي صلحته مباشرةعلى مدى عام كامل مو مرة وحده
راح اكتب بشكل مختصر مع اجور اليد
اولاً المكينة و القير على الفحص ما كان بهن خلاف و هذا الشي كان مقنعني بالسيارة الصراحه
و ايضاً ما فيها رش او سمكرة سوى فوق الكفر الخلفي يمين اثر بنشر و هذا الكلام بعد ما فحصته اكثر من مرة

الحاجات الي صلحتها مع ذكر التكلفه :
1- تغيير دفرنس بقيمه 2000 ريال
2- تغيير ميزان كامل 2500 ريال
3- ثلاجة مكينة اصلي 1300 ريال
4- كمبروسر مكيف اصلي مع الفريون 1300 ريال
5- طرمبه بنزين مع صفاية 350 ريال
6- طرمبة ماء 300 ريال
7- كويلات عدد 4 مع التركيب 400 ريال
8- تغيير مكاين درايش عدد 3 مع التركيب 400 ريال
9- تصييخ رديتر مع ماء اصلي 200 ريال
10- تنجيد داخلي 300 ريال
11- تجليد كبوت و تندة و شنطه اصلي ضمان سنه 400 ريال
12- قزاز امامي 250 ريال
13- جسر الي يمسك الانوار و الشبك الامامي 200 ريال
14- تلميع انوار مع لبمات 80 واط 150
15- فتلر قير مع زيت 250
16- جنوط 17 مع كفرات 1500
18- سماعات مسجل 200
19- قماش امامي و خلفي و خرط هوبات 500
20- مرايه يمين 150
---------------------------
التكلفه الاجمالية 12650 ريال + قيمه السيارة 4000 الاف = 16650 ريال

حاجات لسه ما صلحتها :
تعديل رفارف قدام و تغيير صدامات و يبغالها رشه للجوانب او كنت بكملها تجليد و لسه ما قررت

هذا الي صلحته بالسيارة بالعربي نفضتها كامل و ظبطتها و رجعت شبه وكاله

بعد عرض السيارة للبيع انسامت ب مبالغ متفاوته منها 10 الاف و منها 9 الاف و منها 8 الاف

تقييم للتجربة :

للتجارة : فاشلة
للأستخدام : ممتازة

نصائح و ملاحظات :

انتبه انتبه تشتري سيارة فقط لانه المكينة و القير نظاف

افحص السيارة من كل النواحي ولا تستهين بالخرابات الثانية زي ما تشوف التجربة قدامك التكلفه هذا كله و ما قربت للمكينة و القير !!
ان كان تبي تستخدم او تبيع افحص السيارة و قيم كل شيئ فيها قبل الشراء

ملاحظه 2 :
ايضاً لا تنغر بقيمه السيارة الرخيصه مهما كان نوعها انا شريت السيارة ب 4 الاف مكينة قير نظيف بدون سمكرة او رش !

ملاحظه 3 : مهما بغيت من سيارة ان كانت اكسنت او رولز رايز لا تاخذ السيارة المكروفه
بعض السيارات تكون عطلانه و لكن غير مكروفه و محافظ عليها
و بعض السيارات تكون محركاتها زينة لكن مكروفه لين عضت الارض و راح تكلفك كثير على حاجات تافهة

في الختام ما الوم خويي نهائياً على اي شيئ القرار قراري كان و الرجال ما قصر و نصحني افحص الموتر و رفض ياخذ فلوس بالبدايه علشان ما يظلمني الله يذكرة بالخير

و انا حالياً محتار ابيع السيارة ب10 الاف او استخدمها بما اني عارف كل شيئ فيها و السيارة راح تخدم 3 سنوات بالراحه بدون ما تكلفني شيئ بعون الله سوى بنزين و زيت
و لكن احياناً افكر ابيعها للتغيير

و بالنسبه لرأيي بالفورد بشكل عام السيارة ممتازة للكرف و التحمل و موتر خدوم و هادئ جداً و يصلح للديرة و للسفر و للكشخه و للكرف و لكل شيئ
اعتقد انه اكثر سيارة يجمع كل الاحتياجات بسيارة وحده

شاكر لكم مروركم الكريم و اتمنى مشاركتي تعليقاتكم و نصائحكم و السلام عليكم .