حسد محلات تغير الزيوت واتمنى نلقى حل

45 17

لايمكنك التصويت حتى الحصول على 20 نقطة على الأقل
إضغط هنا للإخفاء

ابو يزيد 000 8714
قبل 8 سنه و 7 شهر

السلام عليكم ورحمة الله وبركاته
مساء الخير على الكل

اليوم موضوعي عن شيء مضايقني جدا جدا
وللاسف ما لقيت حل , فباظطر افضفض لكم , لعلي اجد الحل عندكم

طبعا الموضوع عن الزيوت واسعارها بشكل عام واسعار شغل اليد
لكن ملاحظه ( بــالــخــط الــعــريــض )
ما اقصد بكلامي جنسيه محدده , ورب البيت ما اقصد اي جنسيه , لكن المقصد في هذا : هم رواد هالتجاره , ومحلاتهم الخاصه لبيع وتغير الزيوت , بكل الجنسيات والالوان والاعراق , ولا يعني ان لو جنسيه واحده طغت على هذا المجال وسيطرت عليه , اني اقصدها , لا والف لا , موضوعي عن مشكله واتمنى حلها , بدون التدخل بأي جنسيه

قبل ممكن 9 اشهر , كنت اشتري لسيارتي فورد كرتونين زيت من محلات الجمله
وكانت تكفيني من سنه الى سنتين

طبعا الكرتون فيه 12 علبه يعني كرتونين فيها 24 علبه , من نوع موتر كرفت حق الوكاله لشركة فورد , ويمشي 10 الاف كيلو

والعلبه بسعر 14 ريال فقط , والكرتونين اخذهم تقريبا بحوالي 335 ريال فيهم 24 علبه , تكفيني تقريبا 5 غيارات لانها تاخذ سيارتي حوالي 5 علب في كل تغيره , يعني هالكرتونين يكفوني 50000 الف كيلو مشي

وكنت اغيره عند محلات الزيوت , وكانت الامور ماشيه عادي , وكان شغل اليد ياخذ 20 ريال , وبعد فتره بسيطه , ارتفع السعر لـ 25 ورحت محطات ثانيه , ونفس الاسعار , من هنا من هناك , مرره السعر ثابت , وقلنا امرنا لله وسرنا نغير ب 25 ريال
وقبل شهرين ارتفعت فجأه 30 الى 35 ريال !!!

المشكله لا جيت تبغا تعرف السبب المنطقي للارتفاع المفاجيء , ما راح تلقى

يعني مثال : ممكن يرتفع سعر اللبن من ريال الى ريالين , تروح تدور للسبب , تلقى ميه سبب ممكن البقر بدأ يموت , وما عاد فيه الا القليل , فاظطروا يرفعون السعر , او ماعاد فيه حظائر للبقر بالمملكه وسار فقط استيراد خارجي , وممكن ان الحكومه فرضت على الشركات ضرائب فاظطرت ترفع السعر , او الحكومه اجبرت الشركات انها ترفع رواتب العمال وان الحد الادنى مثلا 5000 الاف ريال , فاظطرت ترفع سعر اللبن من ريال الى ريالين عشان تعوض خساريها وتوفر الرواتب

اما لو جيت تدور سبب مقنع للعامل اللي يغير لك الزيت , ما تحصل !! يعني راس مالها حفره , وراح بس ينزل ويفك السره , وينزل الزيت , ويعبي لك من فوق , ويقولك الله يستر عليك !!

يعني هل عامل الزيوت , اصبح شخص نادر جدا بالمملكه , فارتفع سعره فجأه !!
او ان عمل تغير الزيت تحتاج شهادات من جامعات ومتطلباتها صعبه جدا , فمن حقه يرفع سعره !!
ولا يمكن رفعوا سعر يدهم لانهم ساروا يعطون ضمان على شغلهم !!
ولا تصدقون نسيت شيء مهم , ممكن يـده سـحـريـه , فارتفع سعرها من 20 الى 35 ريال !! شيء منطقي صح هههههه !!

للاسف تدور لهم العذر , لكن ما تلقى !!

الاجابه في الاخير , انهم حاسدينك , ويبغون يسرقونك غصب , ما اتوقع فيه تفسير اخر لهالشيء !!, ياتشتري منهم , وعاد شف ربحهم فوق 70% وانت ماتدري بس تجي وتغير , او يعوضون خسارتهم ب 35 او 40 ريال
واللي يغبنك , انك تقول يابن الحلال 30 يقولك ما ارضى باقل من 35 او 40 !! ياخي والله واحلف بالله وانا واثق , لو ب 10 ريال , بتكون ربحان , اش بتخسر !! والله مافيه خساره حتى لو ب 5 ريال , بس بوقف فوق الحفره , ما راح اكلفهم شيء ولا فيه عداد يحسب فلوس على وقفتي ولا راح اخذ منهم زيوت ولا فلتر ولا شيء , كل شيء معاي

يعني ليه ينشب بسعر 35 او 40 ولا قلت له ب 30 ريال , قال لا انا كذا خسران !! يا بني ادم , خسران في ايش , ما راح تدفع شيء , بس بتنزل تفك السره وتنزل الزيت وتطلع تعبي زيت جديد وتقولي مع السلامه , اقسم بالله شيء يغبن من جد

لو قلنا فيها تعب ومن حقه ياخذ 40 ريال , كان قلت , لكن والله مافيها تعب وكلها ربع ساعه الا وانت مخلص !! يعني اشوف 20ريال مناسبه لي وله , هو والله ما راح يخسر , حتى لو ب 5 ريال لانه بس بيستعمل يده ما راح اكلفه شيء لان انا دافع كل شيء وعليه شغل يده ولا باجحده بشغل يده , لكن بعطيه شغل يده اللي يستحقه , لا ظالم ولا مظلوم


واقسم بجلال الله لو فيه حفره للايجار مثلا ب 10 او 15 ريال لمده ربع ساعه , لاكون اول من يدعمها , اقسم بالله ما تحتاج شيء , كلها ربع ساعه الا وانت مخلص

ابعرف ليه كذا الحسد وصل في التجار !! ما اقصد اي جنسيه او اي شيء محدد , كلامي عن محلات الزيوت واصحابها بكل الجنسيات !! لانهم تقريبا مثل العصابات , ترتفع اسعارهم كلهم وتدور على اكثر من محل وبعيده عن بعضها تلاقي اسعارهم وحده !!

ليه ما تشوف وزارة التجاره لموضوعهم !!
يعني شيء مهم جدا جدا مثله مثل البنزين , ليه مايتلفتون على هالموضوع !!

تصدقون بترومين , عندها الزيت A1 5W30 التخليقي الخاص بها , بسعر 60 ريال للعلبه , وبالمحطات بسعر 45 الى 50 واحيانا تجده ب 60 نفس اسعار بترومين

وفي محلات الجمله تاخذ كرتون 12 حبه , والحبه بسعر 21 ريال تقريبا

شفتوا الاستغلال كيف , شفتوا كيف نسبة ربحهم في العلبه الوحده , تقريبا نسبة الربح 200%

يعني دام محلات الجمله تبيعه ب 21 ريال وهم كسبانين اقل شيء نسبة 20% , كم يكلف الشركه الام , كم يكلف راعين المحطات , والله يمكن يكلفهم 15 ريال , ويجون يبيعون بسعره 3 مرات , بقوه 3 ادبال , ويزعلون لا جبنا زيت من عندنا وقعدوا يتغلوا علينا ولا يبون يغيرونه او يطلبون سعر عالي عشان يكرهونك في هالشيء وتسير تغير من عندهم , وكل هذا بدافع الحسد وعدم محبة الخير للغير

والله توي ابغا اغير زيت لإكسبدشن الوالد , ومعاي الزيت والسيفون , مريت الروضه بالرياض , وواحد طلب 50 ريال , والثاني قال مانغير نهائيا , لازم تشتري من عندنا, ونزلت للربوه لانها تقريبا ارخص منطقه , وكانت الاسعار 50 ريال و 45 ريال و40 و اقلها 35 ريال , واظطريت غصب عني اغيره ب 35 لانهم مثل العصابات , والله لو تحوس راح تلاقي اسعارهم متقاربه , ولو كان في حل والله انا اول واحد اسويه , لكني مظطر ومشيت على الزيت حوالي 12 الف كيلو

فنبغا الحل , علمونا كيف نغير الزيت بنفوسنا , وعلى ما يقول المثل , التغير يبدأ بك انت , لا تقول انا وش بامثل نسبه , قدام الناس اللي يغيرون عند هالمحطات , صدقني لو انت بديت بنفسك , ترا غيرك بيبدأ , وبعدها , تسيرون فعلا تمثلون نسبه تنتف جبهات الحساد وهالتجار اعوذ بالله

غبونني والله

عاد البعض يقول كلها زياده 10 ريال ولا 15 ريال , ماتستاهل هذا كله , اجي اقولك , والله لو يستحقونها ماعندي مشكله , لكن ياخذونها بغير وجهه حق , ما ارضى , ويمكن اقدر انا , لكن غيري ما يقدر , ولو جيت تحسب الزياده الـ10 ريال , ولا 15 ريال على الاشخاص اللي دفعوها خلال سنه , راح تحصل ميزانيه تعادل مئات الالاف او توصل للملاين

والله ادفع 15 او 10 لفقير او عامل نظافه , افضل بمليون مره من اني ادفعها لناس حساد وما يتمنون لي الخير

واذا ما تكلمنا ولا سوينا شيء , راح ترتفع الاسعار وتوصل الى 100 ريال , مين بيوقفهم !! دام الناس تدفع ولا تتكلم , وتجي تسالهم لين تدعموا الغلا يجون يقولون مافيه حل وش تبينا نسوي , فلازم احنا نوجد الحل عشان نوقف بشع هالتجار , ونوقف عذرنا القبيح , لاننا خلاص حاربنا جلهنا وطلعنا الحل

يعني انا لو اغير على السعر القديم ب 20 ريال

نجي نحسبها : ( معاي 24 علبه بسعر 335 ريال , تكفيني 5 تغيرات , وسعر شغل اليد 20 ريال يعني 5 تغيرات بسعر 100 ريال ) الناتج النهائي 435 ريال

435 ريال , تدفعها للزيت , لمده سنتين , او 50000 الف كيلو متر !!
شف مبلغ التوفير اللي راح يكون بجيبك وتستفيد منه او تنفقه لناس يستاهلونه !!

اعتقد البعض ممكن 435 ريال تكلفه بتغيره زيت او ثنتين , في المقابل لو حاربنا شوي الغلا , كان قعدت سنتين وماكلفتك 435 ريال

وبس هذا كانت فضفضه من القلب اليكم , اتمنى تشاركونا افكاركم وارائكم بتعليقات الموضوع , وفي الختام , ما ننسى كفارة المجلس , ماندري اذا غلطنا بكلامنا على احد , فلعل هالكفاره تكفر ما صدر مني من غلط ( سبحانك اللهم وبحمدك اشهد ان لا اله الا انت استغفرك واتوب اليك )

إبلاغ

الردود