تجربتي في خرابات فورد تورس 2010 وقطع غيارها - للفائدة للجميع

44 3

لايمكنك التصويت حتى الحصول على 20 نقطة على الأقل
إضغط هنا للإخفاء

.. عبدالإله .. 419
قبل 8 سنه و شهر

السلام عليكم ورحمة الله وبركاته

كيف حالكم يا اخوان ..

اليوم حبيت اطرح لكم موضوع عن خرابات سيارة فورد تورس موديل 2010 م 
وهي سيارتي شاريها من الوكالة لحد الآن وهي معي

ومواصفاتها نص فل : SEL AWD 
دفع رباعي

هالموضوع عن عيوب السيارة والخرابات اللي صارت معي فيها خلال 6 سنوات من الآن 
بألخصها لكم بشكل مختصر ومفصل للفائدة لكم جميعا ً عن الموتر للي يبي يشتريه او اللي معه الموتر 
واللي معه فورد تورس وحصلت له خرابات غير اللي بأكتبها يطرحها هنا عشان يستفيد الناس منها وأولهم أنا .. 

بسم الله :

اول خراب حصل معي : 
خبطت المكينة !!
ادري مستغربين .. لكن خبطت بعد استخدام 3 سنوات تحديدا ً في 2013 م 
وكان الموتر ماشي 150,000 كيلو 
السبب الرئيسي في اعتقادي انه عيب مصنعي لأنها كانت اول دفعه للموتر في السوق ..
والسبب الثاني خلطت المكينة زيت بموية الاديتر بسبب اهمالي لها وعدم تشييكي على الاديتر بين فترة وفترة وكان فاضي له مدة وأمشي عليه لحد ما احترت المكينة وتكسرت الوجيه وراس المكينة وعمود الكرنك وامور ثانية من داخل وراحت تشليح ..
المهم اني ركبت مكينة من التشليح بقيمة 10.400 ريال عشرة آلاف واربعمية ريال - طبعا ً مكينة موديل 2011 م ماشية شوي وفاكها من الموتر قدامي .. وسعر القطع بدون التوضيب حول 9000 ريال فشفت الافضل اني اشتري لي مكينة تشليح واركبها بـ 1000 ريال واخلص من وجع الراس .. والحمدلله المكينة لها الان اكثر من 3 سنوات ما اشتكيت منها .. 

ثاني خراب :
خرب عندي الدبل !
الدبل طبعها ً هو الدفع الرباعي الواصل بين الدفرنس الامامي مع الخلفي وهي يسمونها كارونه ..
لأن الموتر ماهو دبل منفصل ولكن مستمر تمشي الكفرات بشكل كامل مع بعض 
المهم انه خرب علي .. قام يقرقع علي والموتر ما يمشي اكثر من 60 
وديته للصناعية قالي كارونة الدبل خربانه ويبيلها توضيب او تغيير والعكوس الداخلية يبيلها تغيير او تسنين .. 
وأروح للتشليح ولقيت الدبل هناك من 2500 ريال الى 3000 ريال وفي الوكالة جديد بقراطيسه قيمته بـ 3500 ريال
المهم كلفني تصليحه توضيب كامل مع العكوس الداخلية وكارونة القير حول 5500 ريال
مع اني شاك انه ناصب علي .. بس الشكوه لله .. 

ثالث خراب :
صدمة خلفية من الجنب .. 
تغيير الصدام الخلفي والجنط والمقصات الداخليه معها الهوبات والفحمات لأنها تكسرت بالصدمة 
الخطأ على اللي صدمني .. فصقعته بـ 14.000 ريال من شيخ المعارض والمرور : قطع قيمتها 8 الاف وكالة اصليه وشغل يد وبويه 6 الاف عند ورشة اخت الوكالة
والحمدلله على كل حال

رابع خراب : 
تهريب في طرمبة الدركسون - صار الدركسون ثقيل ويالله يتحرك 
تصليحه عند واحد تركي في الصناعية القديمة بـ 400 ريال
وهي علبة اصلاح دركسون .. والحمدلله بعدها ما عاد اشتكيت منها 

خامس خراب : 
عزم طايح + رجه بالموتر وهي واقفه او وأنا ماشي وكأنه بيطفى
فحصته قال يبيله تصفية مكينه
طبعا من شريتها الى ان وصلت الى 200.000 كيلو ما سويت لها اي صيانة لا بوكالة ولا غيرها
والمكينة اللي ركبتها ما صفيتها ولا شيكت عليها لكن ماشيه تمام لحد الان .. 
المهم صفينا المكينة بواجي + فلاتر هواء + تنظيف الثروتل بوابة الهواء + تنظيف البخاخات + تنظيف ثلاجة المكينة 
والحمدلله بعدها العزم قوى وصار عال العال وراحت الرجه
طبعا التصفيه حول 850 ريال مع القطع وشغل اليد

سادس خراب :
قرقعه في الموتر عند المطبات والشوارع اللي ماهي مستويه 
والخلل هو :
كراسي القير + كراسي المكينة + اذرعة الدركسون + مسامير التوازن + مساعدات خربانه + كراسي المساعدات
الموتر كان ماشي حول 200.000 كيلو وتوه يطلب هالامور علما ً بأني ما قد سويت لها اي صيانة بالوكالة من شريتها
المهم اني غيرت هالامور كلها بـ 5000 ريال
قطع حول 3500 ريال
شغل يد حول 1500 ريال

سابع خراب :
صوت طقطقه في الطبلون 
شيكت عليه عند كهربائي قالي من قسام المكيف .. رحت للوكالة قالي هذا خلل مصنعي دايم يجي بالتورس .. 
المهم قسام المكيف صغير واحد في الدرج عند فلتر المكيف والثاني تحت الدركسون مباشرة
وقيمة الواحد 35 ريال بالوكالة والثنين حول 70 ريال
وتقدر تغيرها بيدك : تفكه وتفصله وتشبك الجديد .. او تروح اقرب كهربائي يغيره لك من 50 الى 100 ريال

ثامن خراب وهو الأخير :
صدمة في الوجه - والحمدلله المكينة والقير انها سليمة بس راح علي الكبوت + الرفارف الثنين يمين ويسار + الصدام الامامي والشمعات والشبك والاديتر ودينمو المكينة وعلب الزيوت الفرامل والاديتر وامور كثيرة في الواجهة 
المهم اني ما رحت لقطع الغيار بالوكالة لأني عارف لو رحت يمكن ادفع قيمة السيارة وهي مستخدمة في قطع الغيار 
رحت للتشليح ادور قطع غيار وبالصعوبة لقيت واجهة (طبعا ً بالتلقيط) من كل محل قطعة .. المهم انها كلفت كامل القطع حوالي 15.000 ريال
وشغل يد الورشة حول 4000 ريال يعني الاجمالي حول 19,000 ريال
والحمدلله على كل حال .. مع ان قيمة السيارة مستخدمة بالمعارض من 35 الى 45 الف ريال 
يعني دافع نص قيمتها في التصليح .. ولو بتبيعها تشليح ما تجيب لك الا 22 الف الى 24 الف بالكثير 

نجي الآن عند الكفرات :
طبعا الجنط مقاسه 19 
والكفر حقه غالي مقارنه بمقاس 17 اللي يجي بالستاندر 
المهم الكفرات اللي غيرتها هي :
قوديير مقاس 255/45/19
قيمة الكفر الواحد في 2012 م : 1350 ريال 
في عام 2013 م صار الكفر الواحد بـ 870 ريال 
وفي عام 2016 م صار الكفر الواحد بـ 650 ريال
كفرات قوية وعمليه تجلس معك سنتين بالراحة بالكرف اليومي فيها طبعا ً 

والنوع الثاني للكفرات اللي غيرتها : 
دانلوب .. بس ما انصح فيه لأن مقاسه اقل من المطلوب 
وهو 245/45/19 
ولا يطول معك ويتقطع بسرعة ما كمل معي سنة وخمس شهور الا وهو متقطع هذا غير ان فيه شوية ازعاج بالموتر بسبب دعسته
وقيمته 550 ريال للكفر الواحد 

وفيه نوع ثالث ما بعد ركبته وهو :
هانكوك : 255/45/19 
قيمته حول 550 ريال 
ناس ينصحون فيه لكن ما جربته 

نجي الآن عند الزيوت :
الزيت المعروف للتورس والمقترح من شركة فورد في دليل المالك للشرق الاوسط هو :
5W30 موتوكرافت
وهو الافضل للمكينة ويريح المكينة ويمشيها اكثر من 8 الاف بالراحة
لكن الوكالة يقولك :
10w30 والغريب يقولك امش عليه 8 الاف 
ويمكن هذا سبب تعطل مكينتي وتكسرها من داخل والله اعلم .. لكن بالمكينة الجديدة اركب خمسة دبليو ثلاثين ومريح جدا للمكينة 
ويمشيني 8 الاف 

كرتون زيت 5w30 موتوكرافت من قطع الغيار بالوكالة عدد 12 علبة زيت مع 2 سيفون بـ 200 ريال
والتغيير عند اقرب ابو يمن بـ 30 ريال
طبعا التغيير 5 علب ونص مع السيفون .. ويبقى معك 6 علب للتغييره الثانية .. يعني يكون الكرتون حق تغييرتين للزيت ويمكن ما تغير الزيت الا بعد 3 شهور اذا استخدامك خفيف وتوفر على نفسك ..

..

هذا ملخص الخرابات وتجربتي في الموتر فورد تورس من 2010 م حتى اليوم .. بدون صيانة الوكالة نهائيا ً ..
وممشى الموتر الآن حول 250.000 كيلو 

موتر عملي وقوي ولكن قطع غيار البدي غالية جدا ً والله يكفينا وياكم شر الحوادث 
وسو له تشييك وصيانة دورية كل سنة مرة او كل سنة مرتين في اقرب ورشة محترمة وبيعيش معك مدة طويلة 

اتمنى اني افدتكم ولو بشيء قليل عن السيارة 
والله يوفقنا وياكم جميع 

..

إبلاغ

الردود