الزحمة ماراح تخف حتى بعد ارتفاع البنزين - قراءة بسيطة -

44 12

لايمكنك التصويت حتى الحصول على 20 نقطة على الأقل
إضغط هنا للإخفاء

mr.tahoe 1190
قبل 8 سنه و 3 شهر

بسم الله الرحمن الرحيم

ملاحظات :

- قبل ان تدرعم اقرأ كلامي كاملاً

- انا ماني مع او ضد ارتفاع البنزين , الموضوع هذا ماله علاقة بها الشأن 
خاصة من ناحية اقتصادية , الموضوع عن الزحمة .

بعد ارتفاع اسعار البنزين , خرجت نسبة كثيرة من الناس تهلل وتمدح
بها الشيء لاسباب عديدة , مايهمنا هو سبب واحد هنا , الي هو قناعة
البعض ان هذا سيخفف من الزحمة .

هذا الكلام منطقي ان " ارتفاع البنزين سيقلل من الزحمة في الشوارع "
لكن مو شرط ان الاشياء المنطقية دائم تصير !

المنطق انك اذا اجتهدت هذا الترم وتعبت ستحصل , لكن كم منا في
احد الفترات اجتهد في مادة وتعب وقدم افضل ماعنده وبالاخير ما حصل ؟
رغم انه المنطق يقول انك تحصل

ايام ماطلع الجمس الجديد , توقعنا انه ماراح ينتشر وان انتشر سينتشر
بشكل طفيف جداً , لعدة اسباب منها ارتفاع سعره لاقل فئة الى 160 الف
بينما كان في السابق سعره بـ130 ( 2014)

ووجود بدائل عديدة مثل الفورد اكسبيدشن مثلا والي سعره بـ130 للموديل
الجديد ومتوفر بدبل عكس الآخر الي بـ160 وبدون دبل 

او السكويا وسعره بـ138 وتقدر تاخذ نص فل بـ158 مع دبل
الي هي مازالت ارخص من اقل فئة من الجمس

ليست قضيتنا ان الجمس يستحق 160 الف او لا , أو ان الاكسبيدشن افضل او لا
المقصود انه المنطق انه ما ينتشر بالشكل الجنوني الي حنا شايفينه الان وخاصة
في شوارع الرياض 

كان الواحد يروح الجميح اول ماطلع ويقول اصبر 45 يوم , للدفعة الجاية
كل المؤشرات والدلائل ترجح انه ما ينتشر ومع ذلك مو انتشر بس انتشار طبيعي
لا كان بشكل كثيف جداً

كثيرون في المجالس بدأو بالتنظير والكلام وكأن كل واحد دارس اقتصاد
وبدأ يطرحون وجهات نظر غريبة

البعض يقول الحمدلله ماراح نشوف هالعمال هم وسياراتهم الرديئة 

سؤالي البسيط :

هذا الي يقول كذا , ما فكر ان هالعامل اساسا بيأخذ فرق البنزين من جيبه هو؟
ويكمل تمشية بالدائري ( هذا اذا فرق معه سعر البنزين )

والبعض الآخر يعلل ان اصحاب السيارات الكبيرة ممن يستهلكون قدر كبير
من البنزين ويكلفهم , سيبدأون بتقليل مشواريهم وخروجهم من المنزل
وهذا شيء بعيد كل البعد انه يصير

شخص تعود على نظام كل هذه السنوات صعب ان يغيره , سيتجه لحل آخر سهل
سيوقف سيارته الكبيرة عند باب بيته , ويشتري سيارة اخرى صغيرة لتأدية مشاويره
ولم يتغير شيء .

خفة الزحمة من عدمها تحتاج تغيير بعض السلوكيات , ورفع البنزين او لا ماراح يغير
بها السلوكيات 

ناخذ اقرب مثال :
ليه بعض الرجال المتقاعدين ما يؤدي مشاويره لو تلاحظون الا الظهر
وقت خروج المدارس وبعض الجامعات اي وقت الذروة
رغم انه قايم من الساعة 7 الصباح 

مب لو طلع وصلح مشاويره الساعة 10 احسن؟
يرتاح هو من الازعاج + بنفس الوقت يخفف على الناس الي مضطرة تطلع هذاك
الوقت 

وهذا اكثر شيء ملاحظ

بعض البيوت يروحون للسوبر ماركت اكثر من مرة باليوم او البقالة
لانهم اما ينسون يجيبون بعض الاشياء او تأجيل غير مبرر
مب الاولى لو الواحد جاب الاغراض مرة وحدة

لو توقف عند اشارة فيها 8 سيارات , صدقني 4 منهم هم المضطرين يوقفون
الـ4 الآخرين هذي المرة الخامسة الي يوقفون فيها عندها بسبب انهم قاعدين
يدورون بلا سبب 

مب الاولى انت ومن معك من الاصدقاء تجلسون في مكان تتكلمون فيه اريح لكم
بدال الدوران , او حتى اذا مب راحة لك , راحة للسيارة ! ويمكن الناس بعد منك

حتى الوضع ماكان زي زمان , الواحد لو جلس بالبيت ماعنده شيء يسويه
الان فيه فرص كثيرة صارت واشياء متنوعة يقدر يسويها الواحد 

احيانا فيه زحمات تصير بسبب مشروع او مشكلة بشارع او حادث
كلامي ماهو عن هذي النوعية , كلامي عن الي نقدر نقلل منها
الي هي بسبب زيادة غير مبررة في الاعداد

يا اخي هل تتصور وانت ماسك طريق خريص رايح لدوامك الصباح
في قمة الزحمة الساعة 7 , ان فيه ناس كثير حولك طالعين بلا سبب
ماعندهم دوام او اي شيء , تخيل ! يزاحمونك

او حتى بعضهم يبغى يجرب فوال في الملز وهو جاي من اقصى شرق الرياض؟
مب هذا شيء يقهر ؟!
هو من حقه يروح للي يبي , لكن اختر وقت آخر , لا تصير اناني

ليه فيه 20 سيارة مثلا عند اشارة الضباب , المضطرين يوقفون 14 مثلا
لا تقولي 6 سيارات مب فارقة , الا تفرق 

ليه فيه ناس تشغل السيارة وتضرب مشوار مع العالم وتروح لمكتبة جرير مثلا
بس عشان يشوف بكم سعر جهاز معين .. لاحظ معي قلت يشوف بكم سعره
مب عشان يعاينه او يختبره حتى


وهو يقدر يدخل على موقعهم ويشوف الاسعار لكل شيء حتى الاوراق ..
ونفس الشيء بالنسبة لاغلب المحلات , تقدر من مواقعهم تشوف كل شيء.

ترى وجود نظام ابشر وان اغلب الاشياء الحكومية صارت في البيت تسويها
مب عشان التقنية فقط والتطور الخ.. لا عشان التسهيل على الناس 
خاصة بالروحة والجية

الان كثير من كبيرات السن صاروا يشتكون اذا صاروا يروحون لمواعيدهم
من بعض الزحمات الغير مبررة والي سببها مثلا واحد قاعد يدور له 3 ساعات
وسوا حادث مثلا , وهو اهله لهم يومين يترجونه يبغون مشوار واحد بس
وهو طول اليوم يدور 

لو هذا الان ماقعد يدور كان ما سوا هالحادث الي وقف خدمة خريص المقابلة
لمستشفى شهير , وكان هالحرمة الكبيرة بالسن ماتعذبت هالتعذيب الغير مبرر

كل الي ذكرته فوق هو امثلة على ما اقصده ببعض السلوكيات

إن اعجبك الموضوع , فـ ارجو ان تقوم بنشره , لنحاول ان نتعاون في الحد
من هذه المشكلة 

شكراً لوقتك 

إبلاغ

الردود