افادة جزاكم الله خير

عندي في الكامري تولع لمبة الزيت على 7000
وابرمجها من نفس العداد وتطفي ولا عاد تولع الا بعد ماغير الزيت
وامشي علية 7000 وهاكذا
 مع ان الزيت لاينقص ولا شي
مادري اذا الفورد فية نفس النضام يفيدونك اهل الفوردات

انتبه لطرمبة الزيت لايكون بداية خراب وش الزيت اللي تحطه اذا ثقيل اتوقع من نوع الزيت المشكله

جزاك الله خير 
وانا كنت نفس النظام بس بدون برمجه لاني ماادري هل لمبة الزيت تتبرمج او لا ماعندي مشكلة مشيت علها لين ماصارت الحرارة ترتفع تعدي النص وتوصل H بعدها وقفتها

الزيت الي غيرته سوبر شُل 

اخوي منخشق وش وظيفة طرمبة الزيت جزاك الله خير 

زي ماقلتلك الشغلة برمجه وتبرمجها من الاعدادات 
موترك مافية الا العافية بس فية كيلوات محددة
ممكن في الفورد اذا وصلت 5000 او 6000 
تولع لمبة التحذير ولا راح تطفي لو تغيرة 20 مرة
الا لما تسوي الاعدادات وتصفر العداد
وشوف في قوقل اكيد بتحصل طريقة الاعدادات

اخوي الرفاعي لو المشكلة في البرمجة الامر بسيط لكن المشكلة في ارتفاع الحرارة ترتفع بشك غير طبيعي والطبيعي النص وتحت

اذا متاكد ان الزيت مضبوط وكل شي اوكي افصل اصبع البطارية لمدة 10 دقايق ورجعه تروح اللمبه

انت لما تسحب العيار تشم ريحة زيت محروق ؟
اذا كان الجواب نعم معناته شيك على طرومبة الزيت
من معلوماتي المحدودة اذا لمبة الزيت لونها احمر فمعنته انه ضعف في طرمبة الزيت واتوقع انه يزيد عندك الاحتكاك في المكينة
بسبب انه الزيت ما يوصل لكافة المكينة فترتفع الحرارة 

مرحبا
كيف نكتشف ان طرمبة الزيت عطلانة او شبه عطلانة
رقم واحد لما تشغل الموتر سواء مشيت علية او كان واقف
اسحب عيار الزيت اذا كان مستوا الزيت ع العيار ماتغير
حتا لو دعست بنص معناتوه ان الطرمبه عطلانة وماترفع الزيت
وكذالك لو كانت بداية عطل يبقا اغلب الزيت ع العيار
واذا شكيت وطلعت الطرمبة كويسة
عاد الحرارة شغلته مطولة اسبابه كثيرة
وباالتوفيق

الطرمبه لو ضعيفه عطها شهر وتخرب واذا خربت بتوضب المكينه وتغير الطرمبه
فايده الطرمبه للزيت ضخ الزيت لاعلى وبدون الطرمبه المكينه حديد يحك ببعضه

الله يعطيكم العافية جميعا وجزاكم الله خير على المعلومات القيمة واشكركم كل واحد باسمه على الافادة

اذا سيارتك ما لها برمجة لتغيير الزيت فا فك الكرتير و نظف شخال الطرمبة لانه ينسد و بتشوف تحسن باذن الله 

موديل كم الفورد ؟ والتحذير اللي يطّلع لك على شكل كتابه ولا علامة ؟

انا ماعندي لمبة زيت عندي الامبير والله يلعب لعب لدرجة واحد شافه وحنا نمشي 120 قال بتخبط سيارتك ي ولد قلت تعوذ من ابليس
لها شهر بهالحال
والمكينه مافيها اصوات
والطرمبة يقولون سليمة
لذلك اعتقد بقي شئ واحد وهو حساس الزيت
قيمته بحدود40 ريال انت جرب غيره وشوف يضبط معك والا لا تحصله جنب الفلتر وترا مشكلته تصير لناس ويغيرون طرمبة ولاتضبط ويروح ييوضب والا يعدم حاله غير الحساس انت اول وشيك ع السلك حقه يمكن يكون ماهو راكب مضبوط

الفورد من اذا من موديل 2006 وفوق  لمبه الزيت عادي برمجه بالعداد  وسهله
 اما موضوع الحراره الطبيعي النص اكثر من كذا مدري فيه اسباب كثيره للحراره ابدا بالسهل منها مويه الرديتر اذا فيها وسخ يمكن يحتاج تسييخ  او غير المويه بمويه اصليه ومعها مويه مقطر 

اتفق تماما ً مع أخي جاسم 12 بخصوص حساس الزيت او التسمية الأخرى لها ساعة الزيت تجده بجانب الفلتر او سيفون .وجدته بقيمة 50 ريال .
تستطيع بنفسك تغييره ،بس فكه بتمهل على أساس لا ينشعر عليك السن .وغيره بجديد بلفه بيدك ثم بمفك بتمهل لا تشد عليه مرة ،وراح ينقص عليك ربع علبه بسبب خروج الزيت من الحساس القديم .

حياكم الله جميعا وجزاكم الله خير 
ياجماعة الخير المشكلة مهي في برمجة الزيت المشكلة في لمبة الزيت تولع لو على البرمجة سهله نبرمجها من الإعدادات. العداد حق السيارة إلكتروني ولون الكتابات اخضر واللمبة الي تولع لمبة حمرا حقت الزيت والحرارة ترتفع ماتروح مشوار قريب الا اللمبة تولع والحرارة ترتفع والموديل موديل ٢٠٠١ فكتوريا والتحذير علامه

السيارة ماكان فيها الحرارة ولا شي فجأة طلعت علامة الزيت وشيكت على الزيت تقريبا على هذا الحال ٥ايام اللمبة تولع والزيت بالمكينة تمام الا ان ارتفعت الحرارة وتعدت النص وصارت توصل الا H تقريبا بعدها اهدي السيارة وامشي على مهلي وتنزل الى الطبيعي النص

بكرة ان شاء الله بابدا بالسهل  الي أفادونا فيه الشباب الله يعطيكم العافية والله يكتب مافيه الخير لنا ولكم