تغيير بعض القطع وكم سؤال في الفورد

1 6

لايمكنك التصويت حتى الحصول على 20 نقطة على الأقل
إضغط هنا للإخفاء

جاسم 12 -251
قبل 8 سنه و 8 شهر

السلام عليكم ورحمة الله وبركاته ...

اسمعوا سالفتي مع طقة الفورد ... قبل كم يوم حملت السيارة خلق الله كلهم رايح لزواج محمل نص العايله
المهم ونجيك عند اول مطب الا وصوت الطقه اللي يطق معه قلبك المهم انا عورني قلبي ولاتهنيت بالزواج خصوصا ان طلع صوت ثاني اذا كان الاسفلت منحدر وجينا لنهاية الانحدار وبداية الارتفاع يجي صوت احتكاك
وطول الزواج افكر المهم صبح اليوم الثاني افر ميزان ميزان
اتفقوا على جلد مقصات يسار واذرعه داخلي وخارجي
الاذرعه مالها علاقه بالطقه لكن لاحظت فيها فضاوة لما احركها بيدي قلت خلاص انتهى عمرها
المهم وقتها كنت طفشان وفيني نوم قلت خلها بكره خصوصا اني سهران ويجي بكره واسنتر عند صادق محمد حمزة من بعد الفجر لين 8 ونص يوم فتح وانقز بوجهه اول واحد عطني اذرعه وجلد مقصات فوق
وع الميزان قال باخذ عليك 300 ريال قلت تعوذ من ابليس قال مافي اقل ولا اكثر والله شغلتها صعبه و.. و.. قلت توكل ع الله اشتغل بس
المهم ومن 9 تقريبا بدا الين 11:30
يوم رفعنا السيارة نوزنها مادري ليه حركت عمود الدوران ولاحظت فضاوة فيه ناديته قلت شوف قالي الصليب الامامي قلت الحين اطفر وهلا بالتنتيف نصحني اغيره قال لاقدر الله انفلت عليك انت معرض للانقلاب ع سرعات عاليه وحتى السرعات المتوسطه فيها خطر واضرار المهم وادق كعابي لصادق محمد قريب من الميزان واخذ الصليب وارجع له قالي يزيد شغل يدي قلت توكل والله طفرت قال خلاص 300 والله يعين مثل ماتفقنا
ركبنا القطع اللي هي جلد مقصات يسار فوق اذرعه داخلي وخارجي صليب امامي استغليت الوضع قلت له شدالجلنط قالي مشدود لاخر شي قلت شده ولايكثر ليه مايمسك قال مافيه الا طريقه قلت هاتها ربط سلك الجلنط اللي يمر تحت السواق والراكب الخلفي ربطه بسلك حديد ع الجنب وصار مشدود نزلت السيارة ووقفتها ع منحدر جامد وكانت اول اذا وقفتها ع منحدر ع وجهها توقف بعد ماتعطعط اما اذا خليت وجهها فوق والله مايردها الا العمود تدحدر وقفتها ورفعت الجلنط كان مشدود بقوة لدرجة اول كانت رجلي شوي وتطلع من الكبوت :)) اما الان ماتكاد توصل حتى قريب الدعاسات بعيده عنها
ووقفت السيارة وانحلت المشكله
انصكيت بمبلغ وقدره كالتالي
جلد المقصات فوق 100ريال موج بس اليسار اذرعه داخلي وخارجي كامله الاربع 480
صليب امامي 270 طبعا فيه نوعين بالنسبه للاذرعه والصليب اصلي وامريكي الامريكي يغري الطفارى مثلي تخيل الصليب اصلي 270 امريكي 70 ريال اغراء > لكن قدمت الجودة واخترت اصلي مابي اغامر خصوصا اني طالب ودام جت الفلوس خلها هي مرة
شغل اليد كامل مع الوزن كلفني 300 ريال
طبعا قاعد اناقش المعلم حقهم طول وقت الشغل وتوصلنا ان صوت الاحتكاك والطقه من جلد البدي مهلوكة عندي ويبيلها تغيير كامله الطقه احسها عند رجلي قالي هذا البدي يضرب بالشاص ويحك فيه خصوصا اذا انت محمل السيارة ينزل عليه قلت هل من ضرر ع مدى شهرين ثلاث قال لا قلت اجل خلي ولي
يبي فيها شغل يد 200 ريال ناهيك عن سعرها وانا مطفر اجلتها
طبعا بعد التغيير اختفت عندي رجه بين سرعه 70 و 80 بعد البحث الرجه طلعت من عمود الدوران فيه فضاوة بسبب الصليب منتهي ويسبب الرجه اختفت من عندي الدركسون عادي ماحسيت فرق لكن فكيت نفسي من الاذرعه جلد المقصات منتهيه برضه اليسار وافتكيت منها غير امور مالها علاقه بالطقه بس استفدت منها الطقه حاليا ماسمعه لانها ماتجي الا لاصرت مثقل او مسرع واكلت المطب
هذي سالفة طقة الفورد

-----------------------------------------------------------------------------


واخيرا عندي كم سؤال محيريني شوي
انا سمعت ان زيت الفرامل اذا اضيف للدركسون يوقف التهريب اذا كان بسيط هل هذا صحيح؟
السؤال الثاني
عندي عيار زيت المكينة اوكيه تمام لكن لادخلته لازم ادفه بيدي امسكه وادخله اذكر كان معي قبل جيب برادو وابيكا العيار تطلعه واذا تدخله بس تتركه ويروح يسقط من حاله للاخير الفورد هل هو كذا يعني لازم تمسكه بيدك وتدفه خايف العيار ماهو حقها ؟
للمعلوميه السيارة جراند ماركيز 1999 ويَ حبذا اللي عنده ماركيز نفس الموديل يصور شكل المعيار حق المكينة اكون شاكر له ابي اتاكد
السؤال الاخير انا طول مالسيارة مرفوعه كنت ادقق ببطن السسيارة ابي اخذ نظرة عن عمر القطع وكم باقي لها ابي احسب لها من الان ولاحظت الكفر الخلفي يسار من الداخل نفس الكليبر مدري الهوب علي تندية زيت الايسر فقط خفت يكون الرمان حق العكس لكني فحصته بالطرق التقليديه وهي هز الكفر واصوات الطقه والنتائج سليمه هل فيه طريقه اكيده لفحص الرمان او صوفته واذا ماهو منها التنديه من ايش ممكن تكون؟
وسلامتكم

إبلاغ

الردود