النصيحة لا هنتم

ما شاء الله كان معك كورفيت ومتعود على السيارات الرياضية

والشباب هنا يحكمون على الشكل وش عرفنا

انت اللي استخدمت وتقدر تقارن وش افضل او ترجع تاخذ كورفيت اوتوماتيك

ما احد بيفيدك وانت خبرتك اعلى

اخر مرة كان معي موستنج كان ايام 2008 والحين 2015 وماجربتها كيف تبيني اعرف !

والله ابراهيم كلامه صح . عني انا ولا مره سقت هذي او هذي ... لكن اللي له فيها توماهووؤك . بالمنتدى

جزاك الله خير 

أقصد كان معك كورفيت قريب بعتها

تقدر تسوق الموستينق و تشوف الفرق

وين احصل اماكن تأجرها 

^^^ في دبي هنا مافي 

معارض تأجير يا رجل

الافضل انت تحدد رغباتك

بالقوة
الشكل
المتعة بالقيادة
الصيانة
الوكيل

والافضل انت الي تحددها 

روح الوكالة و اطلب test drive 

انا شفتها 
والسيارة قوية ( 5.0 لتر 435 حصان ) 
شكلها عجبني 
وجربت قبل موديل 2008 ممتع في القيادة 
والصيانة القطع سعرها مناسب وفي الي يعرفون لها 
ووكيلها توكيلات الجزيرة وكيل قوي ومعروف 

السياره قويه مافيها كلام واريح طبعا وفيها مقاعد بالخلف والفورد ماعليه غبار حق استخدام يومي لااحد يضحك عليك يفيدك في قطع الغيار السياره توها نازله وبالحجز وماشضفت منها الاوحده فقط والسعر اواسعار الصيانه اكيد غاليه الفل منها يوصل 188الف يعني اكيد بتكون قطعها غاليه لكن مقارنه بالكورفت اتوقع ارخص الدق والكلتش حق الكورفت اظن سعره 5000الف تقريبا والموستنج ماتوصل ذا السعر خذها وتوكل على الله سياره حلوه

والله شوف انكانك بتشتري الموستنغ عشان مظهر و مدري وش لا تشتريها انكانك بتشري عشان عزم وقه خذ كابرس رويال 2015 وريح راسك بلا موستنغ بلا خرابيط مع احترامي لملاك الموستنغ

يالبيه يالموستنج 

والله انه موتر كفو اشتر ولا تشاور وانا اخوك 

تبي نغمة شكمان تبي قيادة تبي رساوة تبي ثبات تبي عزم وفزة v8  المعروفه ..... كلها بتلقاها 

اخوي سليمان الله يحفظك وش جاب الكابرس للموستنج 

الموستنج موتر رياضي وعزم مجنون وشكل سبورت بحت خصوصا الجديدة روعه بشكل غير طبيعي 

انت لو مُلم بالسيارات اكثر ما راح تنصحه بالكابريس لانه يختلف اختلاف جذري عن طلب الرجال صاحب الموضوع 

وثانيا الكابريس ما يستاهل قيمته حد الرويال 130 ويالله تشتريه لا فيه تقنيه ولا مواصفات مجرد مكينة نشيطه وشكل شبه كلاسيكي 

لو نصحته بالتشالنجر SRT بحكم انه نفس القيمه ممكن تمشي لكن كابريس ؟؟؟

حبيبنا صاحب الموضوع اذا انت معزم ع الموستنج خذها تراها موتر يُعتمد عليه 

Camry grandi: كلامك صحيح 
سليمان: الكابرس معقدة وكلها خرابات وتسخين وما 
تكرف 
يكفيك تاريخ الموستنيج وعلامة فورد 

وعليكم السلام 

أنصحك تدخل منتدى فورد وتسأل ملاكها 
( اسأل مجرب ولا تسأل طبيب ) 
بخصوص محلات الإيجار تحصل عند روتانا لتأجير السيارات 
عنده أغلب السيارات الرياضية والفارهة والدفع الرباعي وعنده ميزة الكيلو المفتوح

موفق 

اتوقع لو بدخل موضوع واحد يقول انصحوني بسيارة ب 20 الف قالوا له خذ كابرس 2005 طرب

يعني وش جاب لجاب يا سليمان ، الموستنق موتر رياضي بحت وتعليق رياضي

ويختلف كلياً في القير والمكينة والدفرنس عن الكابرس وين تقارن معه الله يجزاك خير


وبعدين الرجال كان معه كورفت وما باعها الا انه مال من القير العايدي وحب تغيير تبيه ياخذ كابرس عشان 8 سلندر


ترى ما يستاهل هالسعهر ، ولو بتدفع صح


اشتري الكرايسلر اطلق من ذا الاسترالي بمليون مرررة


الكابرس من 2000 من وجهة نظري ماعاد يعجبني في اعتماديته ابد

وخراباته معقدة بيجي الحين واحد شاطح ويقول انا معي 2012 ولا اشتكى من شي بقول له اصبر

اذا انتوا بانفسكم ياهل الكوابرس تذمون في 2007 و2008 عشان مبرده وكل سنة يطلع الجديد تقول خذه احسن من القديم ذاك في خراباته لين توصل للوكالة


الموستنق سيارة شبابية ورياضية بحته وفي نفس الوقت عملية وانا اعرف 2 مستخدمين لها ولله الحمد كنك تسوق فورد بس بطابع رياضي وبقوة مكينة جبارة يعني توفر قطعها ولله الحمد موجودة


زميلي كان يداوم عليها يومياً موديلها 2008 ولله الحمد ما صادفته اي مشاكل وتختلف كلياً عن الكابرس ولا يمكن المقارنة


بالتوفيق

جزاكم الله خير 

بأذن الله اليوم رايح اسال

الحمدلله استاجرت وركبته 
السيارة طررررب
والله متعة ياخي 
والى شي درفت وتسخين كفرات 
والله تستاهل السعر