أضف سؤال أو موضوع جديد          

الفرق بين المواصفات أو المميزات والاكسسوارات

up 37 down 32
ابراهيم التركـي 1068
قبل 5 سنه و 10 شهر



السلام عليكم ورحمة الله وبركاته

الكثير مننا يسأل عن مواصفات السياره ويذكر بأن سياره اخرى افضل مواصفات بنفس السعر

بغض النظر عن ماركة السياره او قوة تحملها وكرفها

ولكن الكثير لا يفرق بين الاكسسوارات والمواصفات الفعلية المميزة

وتحصل الواحد يدفع مبلغ كبير مقابل الاكسسوارات الموجوده بالسياره وهي غير اصلية من الشركة

ولو اخذ نفس السياره بأكسسوارات أقل وركب الاكسسوارات على ذوقة واختيارة

من محلات الزينه الكبيرة كان وفر مبلغ كبير 

من المميزات الفعلية التي تستحق دفع مبلغ عند الشراء

حجم المكينه بين سيارتين بنفس النوع

يعني مازدا 2.0 سي سي 

و 2.5 سي سي  هنا الفرق يستحق دفع مبلغ اكبر بالسعر

سقف بانوراما مثلا هنا يعتبر ميزة

مراتب تحكم كهربائيه كاملة 

النقطة العمياء وبعض المميزات التي تستحق دفع المبلغ الاضافي

ولكن هناك اكسسوارات لا تستحق والناس تعتقد بأنها مميزات اساسية

مثل الكشافات والجناح الخلفي ونوع المسجل مثلا

تحصل فرضا سياره قيمتها 70 ألف ستاندر 

مع اضافة كشافات فرضا 300 ريال و جناح خلفي 700 ريال و مسجل شاشة لمس 1000 ريال

هذي اسعارها بالسوق الانواع الممتازة يعني اجمالي المبلغ 2000 ريال

ولكن الوكالة تبيعها بزيادة بدل 70 ألف تصبح 85 ألف مثلا

وهي تعتبر اكسسوارات لا تكلف الا مبلغ بسيط جدا مقارنه بالوكالة لو ركبتها انت بنفسك خارج الوكالة

رغم ان المواصفات الاساسية نفسها المكينه والقير والداخلية 

تجي تسأل المشتري يقولك فل كامل ومبسوط انه انضحك عليه
____________________________________________________

وقت شراء الاكسبديشن وهو موديل 2005 او 2006 اللي كنت ابحث عنه

نزلت المعارض وبحثت بموقع حراج حصلت الايدي باور اللي يعتبر فل كامل سعره 35 الف تقريبا

والاستاندر ما احد يطالع فيه وانا بنفسي حصلت نفس الاكسبديشن اللي معي حاليا

معروض بموقع حراج بنفس سعر الفل كامل ولا اعطيته اي اهتمام وبعد البحث اسبوعين

ما لقيت النظيف قلت بكلمه اشوف يمكن يناسبني وناسبني الحمد لله

الفرق بين الفل كامل والاستاندر بالاكسبديشن موديلات 2006 وتحت

مواصفات فعليه مافيها فرق مرتبة السائق كهربائية بالفل كامل والاستاندر

وكلها مكيف بالوسط والخلف والامام

المكينه والقير نفسها وكلها جنوط مثل بعض

الفرق الفل كامل مراتب جلد ولها 10 سنوات يعني ما تحصلها نظيفه 

يعني ما تعتبر ميزة على موديلها لأنك بتضطر تنجدها اصبحت قديمة

شاشة سقف للأطفال ولا تعتبر ميزة ابدا

شاشة لها 10 سنوات اغلب الموجوده لقيتها ما تشتغل اصلا ولو اشتغلت مافيها اي شيء

لا خرائط ولا بلوتوث ولا فيها اي ميزة تركب سي دي ولازم يكون اصلي قيمته 200 ريال الواحد

عشان يشتغل معك 

يعني اكسسوارات تعتبر ما تستحق زيادة السعر

بينما الشاشات الحالية الموجوده بالسوق أفضل الانواع بها الكثير من المواصفات الاضافية

1200 ريال مع ضمان سنه وفرق كبير عن شاشة الوكالة القديمة

مكيف لمس بالفل كامل ومعروف مشاكل مكيفات اللمس بالفورد بشكل عام فكتوريا او ماركيز او اكسبديشن

كلها تتعطل وتغيرها وتكلف عليك او تعلق وحاله بينما اليدوي عملي اكثر

خصوصا ان عمره اصبح 10 سنوات ماهو جديد تعتمد عليه

مراتب الصف الثالث بالفل كامل طي كهربائي وهي فعلا ميزة

ولكن 10 سنوات كلها فيها صوت او تعلق ولازم ترجع تدفعها بيدك يعني اصبحت نصف اوتوماتيك

ولو خربت خلاص تعلق ما تقدر تسفطها او ترفعها

بينما الاستاندر طي يدوي وعلى سياره عمرها 10 سنوات تكون عملية اكثر واضمن

الشكل الخارجي نفس الجنوط ونفس كل شيء

الداخليه الفل كامل كلها أمريكي اللي حصلتها مراتب الصف الثاني مرتبتين فقط منفصلة نظام امريكي

بينما السعودي اللي معي 3 مراتب يعني صف مراتب كاملة 

فكرت فيها بالعقل سعودي ستاندر ولكن نظيف ولا فيه لا رش تجميلي ولا رش كف اليد مثل ما نسمع

افضل من امريكي فل كامل بأكسسوارات ما تستاهل وكلها مرشوشة كامل تجميلي وعداد بالميل

والسعر نفسه 

ولكن تجي للناس اقوله اخذته بالمبلغ الفلاني يقول ليش ما اخذت فل كامل بنفس المبلغ

اخذ فل كامل واروح انجد مراتب واركب شاشة غير حقت الوكالة القديمة وش الفايدة صار ستاندر

المهم يلا كنت طفشان توني صاحي من النوم انتظر تجي الساعه 5 عشان بروح النادي هههههههههه

قلت انزل موضوع لاني شايف الناس طايرة بالفل كامل وبفرق سعر شيء كبير وهي اكسسوارات







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


خخخخخخخخخخخخخخخخخخخخخخخ

اقل من دقيقة وديسلايك

بس حبيت اقولكم شيء

نظرا لكثرة الديسلايك بدون سبب على عضوياتي قررت التالي :

أستمراري بالمنتدى لرفع ضغط بعض الاعضاء حتى لو المشاركة بضحكة او اي شيء عشان كل ما يشوفون

عضويتي يرتفع ضغطهم يعني لا تحاول تستفزني بالديسلايك خخخخخخخخخخخخخخخخخخ


up 20 down 15
ابراهيم التركـي 1068
قبل 5 سنه و 10 شهر



بغض النظر اذا في ناس حاقدين بس انا استفدت من وشكرا 



up 7 down 7
goood boy 290
قبل 5 سنه و 10 شهر



والله صحيح كلامك اهم شي النظافه استاندر نظيف افضل من فل كامل بنفس السعر لاكن مرشوش وكل شوي بورشه



up 6 down 4
ا هـ م 1 1022
قبل 5 سنه و 10 شهر



يعني انا قلت استفدت من الموضوع 
في بعض المريضين الله يشفيهم امين 
داخل في مواضيعي القديمه 
ويضغط ديس لايك !!!!


up 2 down 10
goood boy 290
قبل 5 سنه و 10 شهر



ابراهيم انا دايم اوزع لايكات على ردودك حتى لو ماعجبتني

لأني اخاف تعتزل المنتدى 
إذا دخلت المنتدى والقاك غايب فترة احس بإكتئاب مدري ليه

بس يالله عاد انتبه لاينتفش ريشك هههههههه


up 2 down 11
في السماء غيم 220
قبل 5 سنه و 10 شهر



على فكرة موضوعك هذا ممتاز واوافقك الرأي بشدة
مع اني ماقريته كامل الحين اقراه


up 3 down 6
في السماء غيم 220
قبل 5 سنه و 10 شهر



كلام سليم نظافة السيارة اهم من مواصفاتها 





up 2 down 2
الصمت كبرياء 328
قبل 5 سنه و 10 شهر



كفيت ووفيت اخ ابراهيم يعطيك العافية **+1



up 1 down 3
hosam200 1742
قبل 5 سنه و 10 شهر



اخوي ابراهيم كيف الاكسبديشن حلو يخدم واي موديل احسن شي 


up 1 down 1
السفير ss 459
قبل 5 سنه و 10 شهر



السياره لها اسبوعين معي باقي ما اقدر احكم عليها

ولكن كسواقة حلوة ومريحه يعني موديل 2005 و 2006 اللي هو الشكل القديم

تقارنها بالجمس الموديل الاحدث 2007 و 2008 

هذي من ناحية السواقه 

ومن ناحية المساحه الداخليه اوسع من الجمس والمراتب افضل ومريحه اكثر

الرساوة بالخط ممتاز جيت عليه من القصيم لجدة امشي كامل طبلونه حتى وصلت جده

لا فيه هواء ولا يلعب مع الهواء لو مريت من شاحنات ولا شيء

وتحس انك مسيطر على السياره افضل من الجمس 2006 و 2005

من ناحية العزم اشوفه ما شاء الله حلو ونشيط ولا يحتاج تدعس عشان يمشي

يكفي ربع الدعسة او اقل بكثير يكون تسارعه ممتاز هو تقريبا 335 حصان

هذا موديل 2005 اللي اتكلم عنه

بالنسبة لأفضل موديل حسب فلوسك يعني الميزانيه طيبه خذ الشكل الجديد

الميزانيه تحت 40 خذ 2006 والافضل يكون سعودي لان البرمجه كاملة تختلف والعزم يختلف

2007 الشكل نفس 2014 مكينته نفس 2006 و 2005

ولكن موديل 2008 المكينه تغيرت

انا جربت موديل 2014 احس عزمه بارد ما يمشي حتى تدعس له يكون عزمه حلو

ولكن حتى نصف الدعسة تحسه ما يمشي ابدا

مثل الجمس الجديد 2015 وحتى 2009 اللي جاي قير 6 غيارات عزمه ما يمشي ثقيل حتى تدعس كامل الدعسة

يفز معك وينطلق ولكن بسواقتك العادية تتضايق من ضعف العزم فيه

الاكسبديشن النوع القديم حلو والجمس 2007 و 2008 افضل بالعزم من الجديد

اختصار الكلام الشكل القديم الاكسبديشن حلو وخفيف كأنك تسوق سياره صغيرة وسواقته سهله ما تحسه كبير


up 2 down 5
ابراهيم التركـي 1068
قبل 5 سنه و 10 شهر



يعطيك الف عافيه اخوي ابراهيم كفيت وفيت 


up 3 down 1
السفير ss 459
قبل 5 سنه و 10 شهر



تسلكك لنفسك لانك شريت استنادر خخخخخخ المهم ع البركة اكثر يعجبني ب الاكسبدشن المراتب نتطوي كهرب 


up 2 down 2
صهيب أحمد 31
قبل 5 سنه و 10 شهر