فقدت الراحه ..

السلام عليكم ..
صبحكم الله بالخير..
ابي اشاركم بتجربتي .. انا قبل عشر سنين شريت سياره فكتوريا 2003 شبه وكاله استخدمته حوالي سنتين, اثناء استخدامي له كنت امسكه خطوط رايج جاي شبه يومي.. ماصلحت فيه شي.. وكان مريح نسبياً لأنه مساعدات,, المهم قدر الله وراح تشليح بحادث على يد واحد من الزملاء واللحمد لله وغطاه التأمين .

وعطيها بواحد ثاني فكتوريا سعودي 2004 سبورت قير علاقي هيدروليك ولاكنت متخوف من الهيدروليك لاني علمت انه من 2003 الموتر كله متغير بجوده عاليه والهيدرويك افضل..
المهم وحوالي اربع سنين ماعانيت منه بشي نهائي.. ويوم اجرب سيارات ربعي فكتوريا بالمساعدي اعرف فايدة الهيدروليك,,
وقدر الله وصدم فيه اخوي وتحرول الموتر وقرشته وطقيت بنفسه بالضبط 2006 هيدروليك
وهاااتك ياسفريات وروحات وجيات ولاشكى من شي واربع سنين ماتصلح فيه شي ابدا غير الاستهلاكيات.. ويروح بحادث وهالمره معي والحمد لله.

وسوس لي واحد من العيال قال جرب الياباني ووقع الاختيار على الاكور 2013 وكاله بنظام تأجير على بنك..
المهم انها موتر اعتماديه وجوده واداء افضل من الفكتوريا ولاكن.. الراحه في الاسيات فقدتها فرق السماوات عن الارض وانا الخطوط اللي امسكها ماهي شوي فوق الالف كيلو تقريبا للمشوار الواحد..
ياشباب والله ما اظن في السيارات مثل الراحه في سواقت الفكتوريا .. كل ما يون ظهري اتذكر الفكتوريا كني على سرير مسافر الله اكبر عليه والليونه اللي في جعبته..
والحين الموتر قطعوه ماعاد به وكاله وقد تدبست مع البنك في الهوندا وخسرت اقصاد سنتين ولابه مجال للتراجع بدون خساير..

ولا حلاتها بفكتوريا من 2009 وطالع وتدعي على من ظلمك.

اللي ابي اوصل له نصيحه للي يفكر يشري سياره لاحد يقوله موتر طويل ولا نفسيات ولا قرقر واجد والله ياللي جرب الراحه في ذاك الموتر هو اللي يفهم على ..
اشتره وانت مغمض وان كان معك فكتوريا نصيحه لاتبيعه الا واحد انظف منه .. ياجماعه واحد من الفوردات نويت انفظه مره حملت من الوكاله قطع غيار استهلاكيه الين امتلت الدبه والاسيات الخلفيه من باب الفسقه ماتعدا الحساب 1900 ريال ..

اهم شي لجيت تشتري اشتر سعودي ما مشى اكثر من 200 الف وان ماكان به هيدروليك ركب له من الوكاله ولا الملحم او تشليح.. تصرف يالذيب..

تدرون وش اتمنى.. اتمنى عدد 2 فكتوريا 2011 جديده واحد استخدمه والثاني اطربقه في البايكه عن الخاطر.
اعذروني على الاطاله,, واللي ما استفاد من موضوعي يسامحني..

إبلاغ

سيارات للبيع

فقدت الراحه ..

الردود