قصتي مع الفورد

42 33

لايمكنك التصويت حتى الحصول على 20 نقطة على الأقل
إضغط هنا للإخفاء

ابو يزيد 000 8714
قبل 9 سنه و 12 شهر

السلام عليكم ورحمة الله وبركاته

كيفكم عساكم طيبين ان شاء الله

هذي قصه تذكرتها وقلت اذكرها لكم لاني طفشان :)

السالفه يوم كنت 2 ثانوي ايام الطيش والله هدانا له الفضل والمنه

طبعا كانت ايامها معي فكتوريا 2003 بحري وكان لونها نادر وراد امريكا

ذاك الوقت شفت فلم اكشن و مطاردات واكشن وكذا

وابو يزيد تهيض هههههههههههه

وقالت الوالده رح جب من البقاله خبز وسنوديش وطبق بيض

وقلت تحت امرك

ويوم ركبت الفورد , الا ويركبني ابليس لعنت الله عليه هههههه

ويقوم ابو يزيد ويعطيك ذاك التدعيس >> قلبتها ددسن المسكينه

ما تسمع الا انننننننننننن انانانانانانان انننننننننننننننننننننننننننننننننننننننن

شوي الا والوالد طلع من البيت وانا عاد رحت فيها ههههههههههههههههههههه

ويقول صبحتك , صبحتك , فكو لحيك من منشبه , فجرت ام المكينه ههههههههههه

واقوله عيت تمشي بنت الكلب ما ادري وش فيها >> عطيته من كيسي عشان اخرج من الموضوع

وقال الوالد انزل نزلوا في كرشك :(

وانا قبل انزل قلت لازم ارقع الموضوع عشان اخرج نفسي , واحط القير على N

قلت يمكن اطلع من الموضوع , ويحسبني ابي احطها بالدي وخليتها على ال إن وما مشت

قال تعال هنا , وانا قربت منه ودخلت راسي في السياره

قال تشوف الطبلون زين , وانا اسوي نفسي ما اشوف

واقول وين , وقال هنا دفعوبي عن وجهك , طالع هنا

الا وضضضضضضضضضضضضضربه على الراس كان بينفك راسي هههههههههههههههههههههه

قسم بالله كان بيوقف قلبي من الخرعه

ويقول ثور انت ثور , حاطه على الان وتقول ليه ما تمشي هههههههه

تبغا ادخل خشمك في الطبلون هاه ؟؟

وانا اقول والله ما دريت وكذا , جيت بأكحلها و عميتها :)

ونزل من السياره وقال هي على مهلك

وانا اقول ابشر , وركبت السياره , واعشقها على الار , وادق الريوس بسرعه الا والوالد يصيح علي يقول بشويش حسبي الله عليك هههههههههه

وارجع بشويش وامشي بشويش لين اللفه ويوم شفته دخل للبيت

وعطها ذاك الدرفت من على اللفه

وتحوس علي يمين و اردها شمال بقوووووووه واعزز لنفسي واقول كبير يا البوليسي كبيييييييييييييير

وتهج علي هههههههههههههههههههههههههه

وتتجهه لعماره تحت الانشاء

وكان عندها تراب بطحا وانا اقول لا اله الا الله >> أبو يزيد يتشهد عشان الشيخه اللي في استه :)

قلت بس الحين بركبها و اتقلب واكععععععع فرمله >> كانت رجولي بتطلع من الشبك الامامي هههههههه

وأصدم من باب السايق على التراب وصقع راسي في القزازه حقت الباب

وانا للآن ماني مصدق اني نجوت من الانقلاب باعجوبه

ورجولي تتنافض محلها , وافتح الباب الا وهو ما يفتح , واتذكر اني صاقع اصلا بالتراب

مع الارتباك ما عاد ادري ويني انا فيه , واقدم الا والسياره ناشبه , وادعس وقعدت تفر محلها لين ما طلعت , وانزل اشوف الباب فيه شيء

وطلع انعفط من الوسط , وادخل السياره واشوف القزاز , بينشب عشان العفطه , وانزل القزاز ووالله نزل , وقلت الحمد لله

رحت للبقاله واخذت الطلبات ورجعت للبيت , وجيت ارفع القزاز الا ونشب القزاز عيا يطلع :(

ياولد من هنا من هناك , ما فيه امل , واطالع يمين يسار في احد , طبعا تعرفون ذيك النظره البوليسه ههههههه

وافتح الباب واقعد اشوته هههههههههههههههه

واضرب الباب واسبه واسوي له حركات مثل اللي بالافلام وارفسه وادور >> قلبت ياشباب جاكي شان وقتها ههههههههههههههههههههه

الا وجيرانا طلع انه كان يشوفني وانا اتضارب مع الباب ههههههههههههههههههههههههههههههههههههه

يلعن ام الاحراج بس , واسوي نفسي ما شفته , واركب السياره , وانزل راسي تحت :)

عساس اني ادور شيء عند رجولي بالسياره وانا اغطي وجههي من الاحراج هههههههه

عاد مثل النمله من الاحراج

على العموم عيا يطلع القزاز , وخليته وسلمت امري لله سبحانه

دخلت البيت ونمت ومن بكره يوم صحيت وكانت صلاة جمعه , قومني الوالد وانا ما اشوف الطريق

ونزلني معه حتى نزلت بقميص نوم وقلت طيب بتوضأ , قال الوضوء ان شاء الله بالمسجد , قلت امرنا لله

طلعنا , وشاف السياره فيها عفطه في الباب و القزاز مفتوح , وقال ما شاء الله تبارك الله

وانا نسيت و اصلا ما ادري وش السالفه لاني باقي ما صحيت ههههه

الا والوالد الله يهديه يستلمني عند باب البيت وهاتك تكفيخ

وانا فاغر , ماغير اعطيه خدودي عشان يلفعني هههههههههههههههههههه

توي ما فتحت عيوني ههههه

ووالله استوعب انه يلطمني هههههههههههه , و افرك واحط رجلي

وحلفت بالله اني ماعاد ادرفت , وقلت الله لا يوفقه من فلم , خلاني اتهيض , حسبنا الله ونعم الوكيل

وابشركم عقلت شوي بعدها , بعد التلطيم اللي جاني خلاص , قلت توووبه هههههه

فنصيحتي للجميع , والله الفورد و الكابريس و السيارات الدفع الخلفي

ماتنفع لشخص عمره 21 وتحت , والله ما تنفع له , حتى ولو عاقل

ترا ابليس ما مات , والدفع الخلفي يهيض , واللي معاه سياره دفع خلفي يعرف كلامي , خصوصا لو سار له موقف وهو صغير

وبس هذي القصه , وجا طاريها لاني سرت اتذكر ايامي مع الفورد , لاني شريت فورد حاليا :)

أتمنى عجبتكم وغيرت جو شوي عليكم

تحياتي للجميع اخوكم ابو يزيد

إبلاغ

الردود