الفلسفه الببغائيه الموجوده عندنا

11 7

لايمكنك التصويت حتى الحصول على 20 نقطة على الأقل
إضغط هنا للإخفاء

abo tawfiq 372
قبل 10 سنه و 4 شهر

بسم الله الرحمن الرحيم ....

اخبار الشباب عساكم طيبين ، انا صاحي للحين ومافيني نوم فقلت خلني اكلمكم عن

موضوع نعاني منه معاناه ما يعلمها الا الله ، الي هي فلسفه بعض الناس اذا جيت تستشيرهم

في شراء سياره او جوال او شيء ، وتساله  وتاخذ شوره فيها ويعطيك من ذا الكلام الي ماله 

اساس من الصحه طبعا اعطيكم مثال ، انا احد ملاك  ( فورد اكسبلور 2006 ) امريكي

طبعا الاغلبيه من الشعب المحترم لما تسال عن ذا الموديل بالذات من 2006 الى 2010 او 2011

ما اذكر متى وقف الشكليه حقت الموديل ذا المهم انه يجيك فلسفه من ناس اعوذ بالله توصل لدرجه

انه ممكن يطير من راسك فكره السياره ذي ويحشي راسك بالكلام المو صحيح واسمحولي اني

اقول احيانا يعطيك من الرخيص ، طبعا انتو للحين مستغربين وتقولون ذا طيب عقله براسه

ويعرف خلاصه او تقولون طيب من قاله يستشير ذا الادمي ( الفلسفه ) الى اخره .......

طيب زي ما قلنا اغلب الشعب هنا يقولون ان الاكسبلور ذا ما يستحمل وانه مداوم في الورش

والكلمه الي دائما اسمعها ان ( قيره يخبط ) وما يستحمل وما ينفع ،وبعض الاخوان يجي ينزل

موضوع ويسال عن السياره ويجوك ناس مطفين النور ويقولوله وخر عنها تراها حقت ورش

وقيرها يخبط وووو ، تجي تساله انت جربتها ؟؟؟؟؟؟؟؟؟

يقولك )))))))))) لا (((((((((((((

بس سمع خويه يقول انه يخرب وخويه مو داري عن السياره برضه هو سمع 

من واحد يقربله وكل واحد سمع من واحد وعلى هالحال وسرى الليل وحنا ما سرينا 

وحطوفي بالكم انهم ولا واحد من ذولا جربو السياره ، وكمان انا اش دراني خويك 

ذا وش كان يخترع في السياره وخلى قيرها يخبط تلاقيه يدرفت ولا يفحط به ولا ساحب

على الزيت حق القير بعدين يجي ويقول السياره ذي يخبط قيرها وما تنفع اكيد ما تنفع واحمد

ربك ان السياره ما تتكلم ولا كانت نطقت وقالت ارحمني والمصيبه يجيك الببغاء ذا ( الفلسفه )

يدرعم في الموضوع ويقوله ابعد عنها ومدري ايش ما تنفع خذ بدالها ...... والمشكله برضه 

ما جرب ولا وحده من البدائل الي نكب فيها اخونا ذا وللاسف خوينا ياخذ بكلامه ويسحب على السياره 

وياخذ سياره ما تناسب احتياجاته والسبب الفلسفه ذا .

وياما ناس نزلو مواضيع عن الاكسبلور ( الموديل ذا بالذات 2006 -2011) يستفسرون عنه 

واقرا موضوعه واقرا التعليقات الفلسفيه الببغائيه ( متعوب عليها الكلمه ) وما اعلق عليه 

لاني اخاف اني اقوله رائي في السياره وياخذ وحده مضروبه ويدعي علي ليل نهار 

ولا يجيني ويقولي انت السبب ( سواء في المنتدى او حتى الزملاء ) لاني ما اعرف 

طريقه سواقته ولا اعرف اذا كان من النوع المهمل او من النوع الي يلعن امم امم السياره 

ويحطها براسي اني شورت عليه فيها وتعرفون الناس هنا اغلبهم ما يصدق يسوي مصيبه 

ويدور احد يحطها فيه والسبب هو في الاول والاخير .

طبعا اقولكم عن السياره واغلب المشاكل الي صارتلي :

اول ما شريتها كان وقتها الجو شتوي وكنت اداوم عليها الصبح والحراره 

اتش وبحكم دوامي ايامها ما يمديني اخرج كثير فكلمت الوالد يوديها الوكاله او مركز متخصص 

ويشوفلي وش فيها واظنه اللديتر او شيء من اشياء الماء المهم انه مصمم لاجواء امريكا 

وما يناسب جونا وغيرته بقطعه تناسب جونا وبسم الله مشاءالله ليومنا ذا ما ارتفعت االحراره عن النص 

واسافر عليها والوالد كان يسافر احيانا عليها مسافه 1100 او 1000 كيلو في الظهر وحتى 

انا ياما سافرت في الظهر عليها والحمدالله من احسن ما يكون ، طبعا في مشكله صارتلي 

مره او مرتين وكانت كلها في الظهر اني السياره فجاءه ماتقبل دعسه البنزين وتنتفض بقوه 

والامبير حق ضغط المكينه تحسه ينزل ينزل الين يقرب يطفي واطفي السياره واخليها 

شوي واشغل والحمدالله من احسن ما يكون ووديتها كم ورشه وقالولي احتمال طرمبه البنزين 

او الصفايه حقت البنزين او انه في هواء دخل التانكي وسوا الحوسه ذي كلها على 

العموم سميت بالله وما صلحت ولا شيء من الي قالوه بس اني شريت المحلول 

حق تنظيف التانكي والحمدالله ما شفت المشكله ذي مره ثانيه وانشاءالله ما تمر مره ثانيه 

علي المهم ومن المشاكل ايضا احيانا المروحه اذا طولت على السياره يعني تقعد مشغلها اربع ولا خمس

ساعات ومشغل المكيف احيانا وبرضهاغلب اوقاتها في الظهر المروحه يزيد صوتها وتحس ان 

عزم المكينه طايح وتقعد ثواني وتختفي طبعا سالت عنها في الوكاله قالولي انه طبيعيا

والعيب ذا موجود في الاكسبلور وما منها خوف وقالولي اذا جاتك اضغط البنزين بشويش

الين تحس انها راحت وكمل طريقك وانتهينا .

وقبل رمضان ضرب الكمبرسر حق المكيف وصلحته والحمدالله المكيف من احسن ما يكون

وخذها قاعده السياره تحافظ عليها تحافظ على جيبك مع اني صراحه اعتبر نفسي داهكها حبتين 

من ناحيه مشاوير والسفرات بس الحمدالله  ما شفت اني احتاجت الا القطع المعروفه 

الاستهلاكيه ، والقير ياخر احيانا لما تعشق او تنقز السياره فيك نقزه خفيفه

بالريوس بس مشاءالله التعشيقات تمام واحيانا تطلع صوت حنه من جهه الكفر الامامي

اليسار لما تحط الريوس او تحطها في البي وروحت للورش وكل واحد يتفلسف 

الي يقول بطيخه القير وووو ، وانا قلت دام القير تعشيقاته تمام وما ياخر في النمر

انشاءالله ان اموري في السليم ، والقطع يعني اشوفها مقبوله نوعا ما يعني الكمبرسر اخبر

اذا ما خاب ظني انه باكثر من1000 والشمعه حقت الكشاف ب 40 او 45 ريال ( الوحده )

والمكيف الجهه الي جهت الراكب بارد اكثر من جهه السائق بشيء بسيط وسالت عنها 

قالولي السبب في البوابه حقت توزيع الهواء انها معلقه نتيجه فصل البطاريه ( على كلام

اصحاب الورش ) وانها موجوده في الاكسبلور بشكل عام وحلها انك تفك الطبلون وتنظف الثلاجه

والتصلح البوابه حقت التوزيع وانا كنت بصلحها بس يوم قالي ان بس قيمه شغل يده يمكن اكثر

ال500 وان السياره تاخذ من يومين الى ثلاث ايام في الورشه قلت في نفسي انه ماله داعي 

للفه ذي كلها خلي السياره  عندي والمشكله تافهه زي كذا والحمدالله دامه يبرد من جهتي وما عليه

 وانا اولى اني ادفع المبلغ ذا على نفسي اواستغله في شيء احسن من كذا ولا اخسره في مشكله 

زي ما قلت ( تافهه ) زي ذي .

هاذي تجربتي باختصار فالاكسبلور الامريكي  وصراحه ما افكر اغيرها واذا جاتني  

فكره اغيرها ان الله قدر لي افكر اخذلي اكسبديشن الي اكبر منه .

واذا عندكم اي استفسار انا حاضر لكن ارجع واقول انا ما انصح اي احد فيها 

اذا كان ادمي مهمل للزيوت او القطع الاستهلاكيه فانا  اقولك ابعد ابعد ابعد عنها 

اما اذا كان ادمي محافظ وعنده عائله صغيره وماهو حق درفت والكلام الفاضي ذا 

اقوله استخير الله وشاور نفسك واذا ناسبتك السياره دور النظيف ولا تاخذ المكروف والمهربد .

وباذن الله راح يعيش معك .

طبعا اعذروني يا اخوان بس حاب انبه ان الكلام ذا كله من تجربتي بالسياره والمشاكل الي صارتلي 

فيها واكيد لاحظتو اني كتبت كلمه (احيانا ) اكثر من مره لان المشاكل بعضها الا الان 

ما صارت مره ثانيه وانشاءالله ما تجيني ولا اشوفها وعلى العموم الوسوسه مهي كويسه

اذا سمح الله وصار شيء توديها مركز فحص ويشوفلك وش فيها وانتهينا .

طبعا انا متاكد ان الموضوع ما راح يعجب كثير من الببغاوات وعلى فكره مو بس الاكسبلور

الي يسبون فيه في سيارات كثيره ما طيح سوقها الا حضره الببغاوات الي معتمدين على 

كلمه ( سمعتها من فلان ) وانتو ادرى بالسيارات ذي.

على العموم ذا رائي الشخصي وتجربتي في السياره انشاءالله اني افدتكم 

واعذروني على طول الموضوع بس انه كلام في قلبي وحاب اوصله من اخ لاخوانه 

والي استفاد من الموضوع ياليت يدعي لي وللمسلمين .

ان اصبت فبفضل الله سبحانه وان اخطات فمن نفسي والشيطان واعتذرعن الاخطاء الاملائيه .  

في امان الله ....





اخوكم : ابوتوفيق 

إبلاغ

الردود