وعليكم السلام ورحمة الله وبركاته
شوف على حسب استخدامك وموديل 2015 بيتغير شكله

وعليكم السلام
والشهر مبارك عليك وعلينا
انا اعرف السياره كويس من ناحية المواصفات والفئات 
السياره ممتازه وعمليه جدااا ومكينه قويه من موديل 2012 الى 2014 قوتها 360 حصان 
لكن السياره فيه شوي قساوه من الخلف بحكم كبر الجنوط مقاس 20 لكن مع الوقت راح تتعود عليها 
لذا انصحك ومن تجربه بالاتي:
غماره ونص ما انصحك فيه ابدا لان اللي بيركب خلف راح يتضايق وعزل الهواء مو كويس بحكم ان الابواب الخلفيه تفتح عكس,وبالبيع قليل طلبه وينزل سعره.
الغمارتين افضل واجمل كشكل وفسيح وخاصه في الخلف .
طبعا كلا الفئتين تجي صندوق قصير وطويل ,,لذا انتبه تشتري صندوق طويل ,,لان القصير هو المرغوب با البيع ,
نجي للدبل,,انصحك بالدبل ,وما يفرق كقياده عن اللي بدون دبل , واذا تقول مو راعي بر وما احتاجه ,لكن صدقني راح يجي اليوم اللي تحتاجه ,,احينا يوقف الواحد بالسفر للراحه او الصلاة وتكون المنطقه رمليه وبكذا هذا وقته,,حتى بالبيع  من الصعب تجد حد يشتري بدون دبل واحسب انه راح ينزل حول نص القيمه بعد سنتين.
وبا النسبه للون افضل لون وهو المطلوب (الفضي)  
والسعودي افضل من الخليجي بحيث انه يجي فيه سلم صعود بالباب الخلفي ودفلوك
والديكور الداخلي لموديل 2013 اجمل من الموديلات السابقه كا 2012 ونازل 
لكن اذا تبغى النصيحه شوف لك موديل 2013 دبل ,بتحصله من 100 الى 110 الاف حسب النظافه ,,لان موديل 2015 راح يتغير جذريا
وبكذا مشي نفسك بواحد مستعمل وبعد 8 شهور اشتر الموديل الجديد
وانصحك تجرب قبل تشتري افضل 
والله يكتب لك الخير
واي استفسار حاضرين

قريبي معاه غمارة ونص و اشوف شكله مقبول اكثر من غمارة او غمارتين و في حالات الضرورة فيه مساحة يركبوا في النص غمارة الخلفية

السيارة مريحة داخل المدينة ومع المطبات لكن مع الخطوط ما جربتها

تتحمل كرف مهو صاحي

ابرز عيوبها الازارير و الطارة والديكورات الداخلية تتقشر بسرعة و قريبي بدلها مرتين على الضمان و الان رجعت يعني حاول تركب عازل عشان تخفف و تحافظ على الداخلية اطول مدة ممكة

مبروك مقدما

انا اشوف انك تقارن السيارة مع سلفارادو او السيرا وتشوف النقاط لصالح مين 
والله يوفقك بس اسال عن الشكل هل بيتغير في موديل 2015

بارك الله فيكم يا اخوان وجزاكم الله خير 
فيه واحد عطاني ديس لايك مادري شفيه 
عموما من له راي اخر يتفضل مشكور 

بالنسبه للشكل راح يتغير يا اخ كينج على ما سمعت بس راح تزيد الاسعار عن موديل 2014 

السيارة مع احد الجيران غمارتين ويمدحها جدا

- الله يكتب لك الخيرة وشوف الشكل الجديد لو ما اعجبك انت الحكم

الموتر ممتااز 
الجديد مكينته 5.0 اقوى من القديمة 5.4 ب40 حصان + اريح في المشي 

بالنسبة لي لو باخذ باخذ حوض طويل 
لكن بما انك منتب راعي بر واغلب استخدامك خطوط ومدينة خذ حوض قصير سواء غمارة ولا غمارتين 

الدبل وجوده في سيارة زي هذي مطلب مهم لانك ممكن تحتاجه 

الغمارة ونص بعد سنة من الاستخدام بتبدا تسمع اصوات الربلات والهواء وهذا طبيعي
وحلها اما على الضمان في الوكالة يسوون لك وزنيات للبيبان 

ولا تروح لاي سمكري يوزنه لك وانت واقف 

اذا مكينة ايكوبوست نازلة عند التوكيلات انصحك وبشده انك تاخذه 
وهي حد علمي انها نازلة 

سته سلندر بقوة الثمانية سلندر + اقل صرفية + قوة سحب هائلة تقارن بفئة 2500 في الترك الامريكي

لايفوتك

موفق

الاخ naac هل ال 6 سلندر ايكوبوكس يجي دبل غمارتيين 

ايه يجي غمارتين 
بس مادري هو نزل اكيد ولا لا 

الفورد الغمارتين سيارة اعتمادية ،، وانصحك بالدبل بشدّة ،، يبي يجي يوم
تحتاجه .. 

وياليت اذا عندك زيادة فلوس تلقي نظرة ع اخيه المتوحش الخرافي "رابتر"
:) 

الاخ naac 
بالنسبه لل 6 سلندر ايكوبوكس مانزل ولاهو موجود بموقع الشركه 
الاخ bmw 
مشكلة الغمارتيين دبل ب 150 الف سعره غالي مره ام غماره ونص ب 132 الف 
والغمارتيين بدون دبل ب132 الف وانا متحير بينهم 
ويعطيكم العافيه على الردود 

اذا بتتغاضى عن بعض المواصفات خذ XL قزاز تماتيك 
سعره مناسب واقرب فئة للـ XLT

أو شف لك مستورد نظيف 2011 أو 2012

بالنسبة للايكوبوست كمحرك نازل عالموستنج بس ما دري اذا نزل عندنا في الـ F150

وعلى فكرة بعض الاشياء ممكن تفيدك في هالسيارة

الحوض الطويل في الغمارتين والغمارة = تحمل وزن أكبر + كرونة Heavy Duty للأعمال الشاقة 
نسبتها فوق 3.73 يعني عزم أفضل وانت محمل أو قالص مقطورة 
ويجي مبردين قير وكالة 

ودفرنس مشروك 

طبعا هذي مواصفات موتري امريكي والسعودي مايفرق عنه

والغمارتين الحوض الطويل مثل حوض الغمارة ونص 6 قدم يعني مب ذاك الطول
الغمارة والغمارة ونص الطويل 8 قدم يعني فرق كبير

هذي معلومة ممكن تفيدك

احس اني كثرت عليك هههههههه

اذا بغيت تعرف الدفرنس الكبير عندك طريقة سهله 
طل من تحت الموتر وشف غطا الدفرنس 

اذا عشر مسامير فهو عادي 
اذا 12 مسمار فهو Heavy Duty


الزبده ان الموتر كفو وخدوم واداءه ممتاز والافضل في فئته

خذ الغمارة ونص مدام انك تقدر على قيمته للمعلومية موتر بطل وما عليه كلام تسارعه من 0 الى 100 ب 7.5 ودفرنسه قوي 
ويجي فيه ديف لوك وكاميرا حلفية 
الزبدة مواصفاته افضل من السيرا بكثير وسعره ارخص 
انصحك بالون الفضي أو العنابي أو الأزرق لا تاخذ ابيض يطلع كنه حق شركة الكهرباء 
في النفوذ يطربك بس يعيبه جنطه 20 
وبالنسبة للراحة اريح من السيرا خصوصا ورى ومجرب 
وبالنسبة للدبل لا تاخذ بدون دبل اي سيارة بيك اب امريكي ما تنفع الا بدبل لأن الموتر ثقيل ولو نزلة جنب الخط ممكن تحتاجه
زي ما قال احد الاخوان 

الاخوة ماشاء الله أفادوك
وعند قريبي واحد مثله , صراحه موتر بطل وقوي ماشاء الله
واذا نويت وبتشتريه قبل ما تختار اللون , شوف اللون الازرق , راااائع جداً عليه

والله يكتب اللي فيه الخير [: