حياكم الله وان شاء الله تستفيدو

15 5

لايمكنك التصويت حتى الحصول على 20 نقطة على الأقل
إضغط هنا للإخفاء

abo tawfiq 372
قبل 9 سنه و 9 شهر

بسم الله الرحمن الرحيم ..

اخبار الشباب عساكم بخير ..

ان شاء الله افطرتو زين وان شاء الله فطور العافيه للجميع ,,,

المهم يا حبايبي اليوم قبل اذان المغرب بساعه او اقل المهم وانا اشوف السفره تنحط

قدامي وانا استنى بفارغ الصبر انه ياذن جيعانين ياخي ( المهم تراكم مثلي لا احد يسوي 

فيها انه مو مسوي مثلي ) تذكرت كشاف سيارتي انه قبل يمكن حول الاسبوعين او اكثر

فكيت الشمعه لانها انحرقت وروحت محل القطع ادور مثلها ويالله لقيتها لاني اغلب 

المحلات ما عندهم نفس الارقام الي موجوده على الشمعه وانا معبطه وقتها الا ابي نفسها 

ولا رقم ما يختلف لان زي ما انتو عارفين ذا كهرب وما ينلعب وغير كذا لو زدت في 

او نقصت في بعض الارقام حقت الشمعه راح ياثر في قوه الاناره حقت الشمعه نفسها 
 
او راح تكون وحده قويه والثانيه ضعيفه والعكس صحيح فمالك الا تبدل الشمعتين 

وصراحه شفت سعرها شوي لكم عليه فشلت من راسي قصه اني ابدلهم الثنتين 

وليش اتفسق واشتري ثنتين وعندي وحده شغاله ولا فيها شيء الحمدالله .

المهم نرجع للموضوع وين وصلنا اصبرو ( برجع اقرا الموضوع واشوف وين وقفنا )

امزح امزح نكمل يوم نقول يالله لقيت نفس الشمعه المهم واشتريها واحطها في الدرج

وصلت البيت وقلت ما فحالي اركبها الحين وكل يوم على هالكلام لدرجه اني جاتني

شغله وضروري اسافر لها وانا جالس ارتب اغراضي قلت شوي بنزل اسويها والحمدالله

سافرت وخلصت شغلتي ومع الاسف (((( ما سويتها )))) .

تعرفون الكسل وما يسوي المهم اليوم زي ما قلتلكم ما كان باقي الا ساعه او اقل على المغرب

وبينما انتم تنتظرون الفطور نزل ابو توفيق وقعد يشتغل في السياره (( فيس يصيح )).

وصراحه قلت بما اني كنت ساحب على السياره المده ذي كلها قلت خلني ادلعها 

وافك الكشاف بالمره واغسله لانه شهب شوي بسبب انه له فتره مفتوح من جهه 

الشمعه واعدمته الوصاخه والغبار .

المهم والله وانزل تحت السياره ولقيت الكشاف وحاولت افكه وقعدت ادور مساميره

وطلعت كلبسات غريبه شوي علي المهم وقعدت بشويش اضغط عليه بالمفك واظني

وان شاء الله ما يكون ظني صحيح اني كسرت كم كلبس ونقول ان شاءالله ما يكون

انكسرت المهم وبالقوه طلعت الكشاف طبعا الهرجه ذي كلها بعد ما فكيت الحامي الي فوق

الكفر الي من جهه الكشاف المهم بعد مافكيته غسلت الكشاف وبغيت انشفه بالاستشوار

وياليتني ما سويته بالاستشوار لاني وانا جالس انشفه العاكس الي وسط الاسطب

سود من جهه فتحه الشمعه والحمدالله اني لحقته وطفيت الاستشوار ورجعت نظفته بالماء

و حطيته في السطح وان شاء الله بكره ارجعله يكون نشف من الشمس .

طبعا يا اخوان صراحه الشغله والله هي صح شوي متعبه لكن والله حلوه ويكفيك

انه تشتغل بيدك مو توديها للمحلات ويتشرطون عليك وشوف كم ياخذون عليك

وطبعا اذا سووها لك مزبوط ولا اعدمولك اياه فالواحد انا افضل انه يعتمد على

نفسه وعلى قولتهم ( كل دقه بتعليمه ) يعني المره ذي قدر الله انه سود العاكس

الداخلي بسبب الاستشوار ان شاء المره الجايه اذا فكيت الكشاف الثاني ما اقربه

على الاستشوار وعادي وفي الاخير والله الشغله وناسه ومخمخه وبيني وبينكم اغلب

الورش للاسف خاصه بعض العماله الي يكون من زمان عايش في البلد تلاقون بعضهم

يجيبون اخوانهم او ابنائهم وهم في المرحله المتوسطه او الثانويه ويعلمه معه على الشغله 

وبعضهم يمكن يعلمهم على سيارات خلق الله ويعدمونها لهم ويمكن شغلات بسيطه زي ذي 

لكن تلاقيهم يكسرون لك الكلبسات كلها او بعضهم يكسرون القاعده حقت الكشاف

والشيء الي يقهرك انهم ( اغلبهم ) ما عدا من رحم ربي ما يقولك انه كسر او خرب 

يركبلك اياها وتحاسبه وهو ساكت والمشكله اذا اكتشفت وش سوا جحدك عيني عينك

طبعا انا ما اقولكم فكفكو مكينه ولا قير وزبطوه بنفسكم لان ذي الاشياء يحتاجلها خبره 

مو اي احد يسويها بس انا قصدي الشغلات البسيطه زي ذي تفك اسطب ولا تركب لي صغير

ولا تركب سير يعني شغلات مهي معقده او يبيلها خبره والله اخبر قبل كم سنه كان معي كابرس

وانقطع علي السير وكنت وقتها واقف في محطه باخر الليل المهم واتركها وارجعلها الصبح 

ووناديت واحد من حقين الورش يسويه لي تعرفون وش سوا ؟؟؟؟؟؟؟؟؟؟؟؟

ارسل معي اخوه مدري ولده والله بزر ما يجي نص طولي وباين عليه دوبه متعلم 

لاني الورشه ذي ياما روحتلهم وما كان الولد ذا موجود طبعا لما اقولكم انه ولد صغير

لا يفهمني البعض اني استنقصه او مستحقره لا والله مو قصدي كذا بس والله يرزقهم 

من واسع فضله بس قصدي شوفو الولد الصغير ذا ماشاءالله عليه حتى وقتها استحيت شوي

واقول في نفسي ذا كبري ما اعرف اغير سير وذا ماشاءالله عليه يعرف .

على العموم ذا الكلام الي في قلبي وحاب اوصلكم اياه من اخ لاخوانه .

وابنزل صور الشغل الي سويته وبعد الصور بوضح كل صوره وش فيها 

وسامحوني ما صورت وانا اشتغل لان الجوال ما كان معي وكنت حايس شوي 

ولا تنسو قول ماشاءالله ...........


سامحوني يا اخوان الصور مهي راضيه تنزل معي 

وما نزلت إلا الصور الأربع ذي 

الصوره الاولى شكل الكشاف وواضحه الكلبسات الثلاث

الصوره الثانيه ركزو شوي راح يوضح السواد

الي سواه الاستشوار بالعاكس

الصوره الثالثه شكل قاعده الكشاف من الداخل 

وكمان يبين معكم الحامي الي فكيته وكمان

 مكان الكلبسات حقت الكشاف

الصوره الرابعه شكل قاعده الكشاف من الخارج 










موفقين ان شاء الله 





اخوكم : ابو توفيق 

إبلاغ

الردود