أضف سؤال أو موضوع جديد          

متى بتنتبه للي قدامك

up 7 down 11
abo tawfiq 372
قبل 7 سنه و 4 شهر



بسم الله الرحمن الرحيم 



كيف حال الشباب عساكم بخير , الله يبلغكم رمضان وانتم بصحه وعافيه بإذن الله.

طبعا داري ان العنوان غريب شوي بس لا تلوموني هاذا واقعنا للاسف , القصه هاذي صارتلي 

قبل يوم تقريبا , المهم كنت واقف بسيارتي قدام المطعم ومعي اثنين من الشباب نزل واحد منهم 

يطلب وكذا , وانا جالس اسولف مع خويي الا اسمع حكه من اول الصدام الخلفي لاخره ,

طبعا كنت موقف بطريقه مايله شوي بحكم ان جميع السيارات مايله لجهه المطعم يعني زي كذا ( \ ) 

فهمتو علي , المهم الا اسحب على خويي وهو يسولف وانزله و اشر له بيدي بحكم اني شفته يطالع جهه 

الشارع يبي يمشي المهم يوم بغى يمشي ميل وجهه شوي وشافني وينزل الطاقه واقوله خير منت شايف السياره

قالي( وش ) قلتله ي الحبيب حاكلي الصدام من اول لاخره ( طبعا هو كان معطيني فيس انه ما درى وش الي سواه )

يعني بالعربي ما شافني انا وقتها انجلطت يعني سياره كبيره ولمباتي شغاله ومني ساد على احد ولا مضايق احد

بالموقف ومبعد عن الشارع العام ذا كله سبحان الله ما شاف ذا كله , المهم قالي اصبر بوقف واجيك واطالع 

فيه وشفته بعد عني شوي والحقه برجلي واشوى انه وقف ما حط رجله ( طبعا نسيت اقولكم الرجال كبير 

مو كبير مره يعني تقريبا اظنه عدا ال40) ، المهم وقالي والله ما حسيت فيها قلتله كيف ما حسيت فيها واقوله

تعال شف سيارتك البويه تقشرت طبعا انا اول ما نزل قلتله ( وش كان بيضرك لو انك رجعت ريوس

 شوي  ) وتقولي ما حسيت . الرجال بدا يمشي وشفته يعرج عرجه قويه ، الله يشفيه 

ويكون بعونه  ، وقتها استحيت شوي وقعدت اقوله على مهلك يا عم ، الرجال الله يجزاه خير قالي اكثر

من مره ( الي تامر فيه انا حاضر ) وصراحه قهرني فيها لانه ما اعتذر، من اول ما نزل وهو يقولها 

حسسني انه مستقعد له او بطالبه بشيء وانا والله ما نيتي شيء من ذا كله وقلتله لا تحسبني اني ادور وراك

حق او بطالبك بشيء بس كان ودي افهم ليش ما تنتبه ، هاذي المره الحمدالله عدت على خير

طيب المره الجايه لا سمح الله يمكن تصير مصيبه اكبر من كذا وقتها وش بتقول
 
 ( والله ما انتبهت , والله ما شفتك ) ؟؟؟؟؟؟؟؟؟؟؟

طبعا واحنا واقفين عند سيارته قاعد يقولي الحكه الحكه ذي من اول وذا اللي لهدني زياده يعني كنه 

يقول انت تتبلاني ناظرت فيه وقلتله طيب تعال لسيارتي ونشوف وش صار طبعا لقيت اثار بويته 

والبويه عندي صار فيها مخش طويل يمكن من اول الصدام الين نصه بس البويه الحمدالله ما تقشرت 

ولا الحساسات ما جاها شيء وذا من فضل الله سبحانه وتعالى  .

ونجي لاخر القصه اللي للاسف توضح  عدم وجود اي مبالاه للي سواه اخونا , وانا جالس اتفحص

الصدام قعد يناظر ويقولي بسيطه , هاذي مشيتها له , يوم قلتله الحمدالله ما صار شيء ( طبعا الى الان

استناه يعتذر ) اداني ظهره ومشى طبعا وقتها قفلت معاي ووقفت اناظر فيه وبغيت اتقابع معاه بس

شفته يعرج ( الله يشفيه ويكون بعونه ) وانا اهدي نفسي واقول عيب علي اتقابع مع واحد كبر ابوي

وربي مقدر عليه الابتلاء هاذا ، المهم واركب سيارتي واخذنا طلبنا وعينا من الله خير .

طبعا يا اخوان انا عارف انه بعضكم يمكن يقول هاذي حكه كدي كدا ومكبر السالفه ، طبعا يا اخوان

ارجع واقول مو لهدتني الحكه وفي الاخيير ذا حديد لكن اللي قهرني وش كان بيصيرله لو رجع شوي

وانا اتحدى اي واحد فيكم انه تنحك سيارته ( لاسمح الله ) وبيقعد عادي ولا كانه صار شيء , اكيد 

راح ينقهر وينلهد حتى لو هي حكه كبر ظفري , لكن ما اقول الا حسبي الله على الناس اللامباليه

ويعتبرون الامور كلها ( بسيطه ) وما يحترمون الناس ويستكثر الاعتذار حتى .

يا اخوان اذا وصلت الشغله لدرجه حكيت السياره او صدمتها لا سمح الله , اقلها اعتذار ياخي مو ضارك

شيء لو قلت ( معليش ) .  

على العموم الله يكون بعون الرجال ويديه الصحه والعافيه ان شاءالله .

ومعليش حبايبي عندي تعليق بسيط على موضوع الاخ ( ابو جود ) الي صدمه راعي الكابرس 

طبعا انا مؤيد لكلام بعض الاخوان انه غلط يوم مشى وترك صاحب الكابرس لكن اسمحو لي برائيي 

في موضوع الهوك ( انه يتسبب بزياده قوه الحوادث كلنا ندري بالشيء ذا ) لكن انا اعارض صراحه 

الاخوان الي قامو على اخونا ابو جود انه غلطان على صاحب الكابرس ( بغض النظر عن قصه انه سحب  عليه )

لكن قصدي انه ما تسبب بالحادث انا عن نفسي اشوف ان ابو جود ماله اي دخل في التسبب

بالحادث لاننا كلنا نعرف انه ما احد يسرع وسسط الزحمه خاصه اذا الطريق يكون موقف قدامك سواء 

دق فرامل بقوه ولا بشويش لو اخونا راعي الكابرس كان منتبه ما صار الي صار وهو على العموم 

مكتوب ومقدر والله يكون في عون صاحب الكابرس وتكون ان شاء الله دفعه بلاء عنه .

وصراحه انا بدات افكر جديا اني اركب الهوك بعد الي صار ، يصير يتادب بعض الناس اللامباليه 

لاحظو وش قلت ( الناس اللامباليه ) لانه كلنا يمكن نتعرض لمواقف خارجه عن ارادتنا واحيانا

يصير ظرف طارئ لا سمح الله , لكن نحاولل ننتبه قد استطاعتنا .

انا عارف ومتاكد ان كلامي ذا ما راح يعجب كثير من الاخوان لكن
 
هذا رائيي في موضوع الهوك  وحبيت اوصله لكم .

وفي الاخير لا تنسون اذا شفتو انسان الله مبتليه لا تنسون الدعاء :

( الحمدالله الذي عافانا مما ابتلى به خلقه وفضلنا على كثير ممن خلق تفضيلا )

طبعا بينك وبين نفسك لا احد يبقعها ويقولها قدامه .

الله يوفقكم جميعا واعتذر على الاطاله .

في امان الله .

اخوكم : ابو توفيق







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


صحيح صار الواحد يسوق وهو خائف من السيارات اللي يرمي يمين و اللي يرمي يسار تروح مبسوط ترجع البيت زعلان 


up 5 down 1
alnitak 22
قبل 7 سنه و 4 شهر



السواقه عندنا بالسعوديه على البركه تحصل السيد الايمن يمشون 120 واليسار يمشون 100

واللوحات الارشاديه واي شيء تابع للمرور اخر اهتمام السائق

لاكن مااقول الا اخر المصايب

واللي يعيش بالسعوديه يحتسب الاجر لان السعوديه تكفير ذنوب اللي بيجلس فيها من سوء التنظيم ومن كل شيء

لامن مستشفيات لامن شيء ابد بس على الشاشات خذ العلم الطيب بس راجعهم تعاف حياتك

بس على قولة اخواننا الهنود

الله فوق !!


up 6 down 3
amear 1347
قبل 7 سنه و 4 شهر



بخصوص الهوك وموضوع ابو جود انت صادق لو راعي الكابرس منتبه ما كان صار الي صار هذا اولا ثانيا نقول زي ما قلت انت يا راعي الموضوع عساه دفع بلا عنه راعي الكابرس وتمنع عنه أشياء اكبر !

ثالثا بخصوص حكتك انا اقول عوافي يا رجال بسيطة ! انا مرة كنت موقف بمواقف عند بندة موقف نظامي ويجيك ذاك الشايب يوقف جنبي ويفتح الباب على سيارتي قلت خلني انزل أشوف الأضرار (بنفس الوقت ماكنت ابي من الشايب شيء) انزل البوية محكوكة لكن قلت عوافي بسيطة ان شاء دفع بلا ومشيت والشياب جاني قبل لا امشي قل امر الي تبيه انا حاضر قلت رح مسامحك يا عم ومشيت وانا مرتاحة نفسي لا انا حقدت ولا انا دعيت ومبسوط ! 


up 2 down 3
fahad11-11 160
قبل 7 سنه و 4 شهر



والله شي يقهرر .. 
مثل يوم وقفت عند محطه قداام كامري والمكان واسع وماني مقفل عليه ولا شي..
وحسبت حساب ان الادمي يمديه يطلع بالراحه .. 
دخلت المحطه واخرج الاقي الصدام حقي محكوك وصاير اسود البويه البيضا راحت 
وراعي الكامري مو موجود قد مشى .. يعني لهدرجه ما فيه حيل يلف الدكسون او يرجع شوي على وراء
بس ناس ما تفكر .. 
وان شاء الله دفعه بلا وحكه بسيطه مو مشكله اهم شي العافيه وكل شي يتعوض صح الواحد ينقهر بس الله يعين


up 3 down 1
أبو غاليه ... 770
قبل 7 سنه و 4 شهر



وش ذا الموضوع إلي مال أم أمه داعي 
بغيت اتقابع معك وشوي وتقول مريض الله يشفيه 
الله يشفيك أنت الظاهر إنك نفسية أو تبغى تروينا إنك قوي 


up 2 down 12
mohammed shareef. -21
قبل 7 سنه و 4 شهر



ما اقول الا الله يعينكم يا اهل الرياض طبعاً انا جاي من ابها للرياض عند الاهل والله شي يرفع الضغط الليلة بس هايلكس في احد التقاطعات داخل بتعريضه وانواع قطع الاشارات والله فيه بعض الاشارات واقف لحالي كلهم مشوا ههههههههههههههه
ومريت شارع التخصصي انواع الاصوات والازعاجات واحد راعي موستنج حوالي الساعة وحدة بالليل مركب اعتقد نفاث f16 الله يهديه ازعاج واصوات لا وبعد مبسوط مافيه احد ما جاكره 
لكن اقول الله يعينكم


up 5 down 0
لطااااام 77
قبل 7 سنه و 4 شهر



من شاف مصيبة غيره هانت عليه مصيبته طيب شوف وش حصل معي ماشي في امان الله فوق الكبري رايح الدوام ماشي ٨٠وماسك اليمين
يجيني واحد صاحب كورولا 2010وصدمني من الخلف بسرعة 140طبعا انكب الشاي ورقبتي كانت بتروح فيها لولا لطف الله الرجال حاصت السياره عليه وطلع الايرباق وانعدمت الواجهه مره من قوة الصدمه سيارتي مارضيت توقف الا بالقوه
لكزس2000يقول ابغى الحق اوصل مدارس وجلس يبكي وماعنده رخصه والسياره ايجار بسم اخوه رحنا للمرور الخطا عليه١٠٠٪قلي الله يخليك ماعندي حق الفطور والله قلته ياخي عفيت عنك لوجه الله بس ياخي تخيل بالسرعه ذي راح تقضي على اسره 
اوتيتم اطفال انتبه والعوض على الله


up 4 down 0
mohammed8989 243
قبل 7 سنه و 4 شهر



يبن الحلال وسع صدرك الحين والله في زمنا ذا حرام تشتري وكالة اقعد اقصد سنين ومحافظ على سيارتي عشان يبقى مظهرها كويس وبرضوه لين جيت ابيعها لينها على يدي ونظيفة وتجيب لي قيمة ويجون ناس مثل هذولي يخسرونك وينكدون عليك تلقاك مرة ترش صدام مرة رفرف مرة باب ... السواقة عندنا ماعاد تنبغى بريال


up 2 down 0
a.ibrahem 3167
قبل 7 سنه و 4 شهر



ياخوي ترى الأمور تساهيل وانت عارف انها حكه وماتسوى
لكن مو معناته ان الحق معك تفرض قوتك وانك بغيت تتقابع معه ومدري ايش
ان طالت وطالت دق على نجم وعلى التامين وخلصنا ولا توصل الى مده اليد

ومو معناته انه أخطاء انك تبيه يعتذرلك ويبوس يدك ولم يحسسك انه ضعيف
وهو ممكن مستهتر لكن ماحس بغلطه الا يوم وقع الحادث
فالافضل ان تمسك اعصابك وتحترم الأشخاص حتى لو كانو مخطين


up 5 down 0
راجح المسعري 141
قبل 7 سنه و 4 شهر



يارجال خلها ع ربك

فيه ناس تقفل ع ناس صدق وهم جيران بعد

انا وقفت سيارتي جمب البيت بحيث ان فيه قدامي مكان سياره وخلفي كذلك فيه مكان سيارة

المهم واصحى امس واحصل اثنين مقفلين علي

والله ياناس انهم ملحمين صداماتهم بسيارتي بحيث مقدر اطلع الا اذا دقيتهم يعني اضغط ع صداماتهم عشان اخذ مساحة

بالقوة طلعت سيارتي 

لكن مشيت حالهم دقيت سياراتهم بس مابينت شي يعني ماتخدشت لابوية ولاشي


المشكلة اني ماعرفهم ولا ادري وين ساكنين خخخخخخخخخ


up 2 down 0
coco13 893
قبل 7 سنه و 4 شهر



شكراً على ردودكم 

لكن والله للأسف أن في بعض العقليات مدري كيف تفكر يعني الحين 

صرت غلطان عشين بس فكرت مجرد تفكير اني اتقابع معاه صرت انا 

الغلطان وما احترم الناس وأبي أوريكم قوتي  هههههههههههههههه 

والله انتو غريبه 

وطبعا بالنسبه للأخ ( محمد شريف ) انا اترفع عن الرد عليك بمثل

طريقه ردك 

وصراحة ردك يبين اخلاقك العاليه ياخي كن زي اسمك ( شريف ) 

وعلى فكره ترا انا نفسيه ﻻ عادك تقرأ مواضيعي 
 



up 1 down 0
abo tawfiq 372
قبل 7 سنه و 4 شهر



وتصحيح لك يا أخ محمد شريف انا راجعت الموضوع يوم 

قريت انك تقول اني قلت على الرجال ( مريض ) يعني بس لو 

تلاحظ مجرد ملاحظه اني ما قلت عليه ( مريض ) لكن انت 

مريض هاذي لا شك فيها ( والرجل الي في مثل حاله 

الرجل الي حكني يسمى ( مبتلى )  روح تعلم كيف ترد 

و تقول كلام ماله أساس 



up 1 down 0
abo tawfiq 372
قبل 7 سنه و 4 شهر



ههههههههههه
مجنون هالشعب
كل قصة بالمنتدى 
الردود تكون شي  ثاني 
يعلقون على اي موضوع وقصة بأنه سبق وقد حصلت له نفس القصة ههههههههه

على العموم يا صاحب الموضوع  ياليت تنتبه  للأخطاء الاملائية بالمرة الجاية

وانا من وجهة نظري اعتذر ولا ما اعتذر زي بعض
ان بغيت تسامح جزاك الله خير واحتسب الاجر 
وان بغيت حقك بالنظام تاخذ حقك اذا لك شي
ولا لك فتحة فم على الرجال الثاني 
خل اعرج ولا اعتذر



up 3 down 1
fahad728 42
قبل 7 سنه و 4 شهر



وقف و نزل لك و قالك ما انتبهت

و كررها لك كم مره اللي تبيه انا حاظر

وش تبي بعد

يحب رأسك أو يترجاك أو ينزل يبوس رجولك

قالك ما انتبهت واللي تبي أنا حاظر

و عمرك بعمر عياله وش تبي بعد


up 5 down 1
أبو عبدالله ...... 163
قبل 7 سنه و 4 شهر



يبدو لي اني لو اشرح من هنا لبكره ما راح يفهم

أغلب الشعب الإيطالي ويا أخ أبو عبدالله وش دراك 

عن عمري عشين تحكم علي أنه بمثل عمر أوﻻده

وثانيا وش ابي بفوزه دام اعدملي شيء أكون 

دافع حر دمي فيه ويقول ( الي تامر فيه انا حاضر ) 

و ﻻ حتى فكر انه يعتذر 


up 2 down 2
abo tawfiq 372
قبل 7 سنه و 4 شهر



 تصحيح :بفوزه = بفلوسه


up 1 down 2
abo tawfiq 372
قبل 7 سنه و 4 شهر



هذآ ارحم من اللي يلحم فيك ومسوي مستعجل وبعدين آذا صار حادث ينزل يقولك جاها شي؟


up 0 down 2
بسدك 1365
قبل 7 سنه و 4 شهر



ب المختصر ﻻ تضيق صدرك على دنيا ب تخليها


up 0 down 0
جنوون الشوق 12
قبل 7 سنه و 4 شهر