X نصيحه من اخوكم ابو يزيد خصوصا لطلاب الثانوي والمتوسط X

السلام علكيم ورحمة الله وبركاته

كيفكم عساكم طيبين

ومثل كل مره , دعوه في ظهر الغيب لجميع طلاب وطالبات السعوديه بان الله يوفقهم في اختباراتهم و يسهلها عليهم و يفتحها في وجيههم

موضوعنا اليوم مهم

الا وهو اخر يوم من الاختبارات

بأذكر لكم سالفتي ايام الطيش بالثانوي >> الله عداها على خير

الوالد كان معطيني فورد 2003 وكنت اذا حطيت رجلك على ربع الدعسه يفز ما شاء الله

المهم خلصنا اخر اختبار وطلعنا ذاك اليوم بدري

وقلت للثنين من زملاي الغالين على قلبي

قسم بالله ما تردوني , قالوا خير وش عندك , قلت الفطور اليوم على حسابي عشان اليوم اخر اختبار

و احلى فلافل لاحلى زملاء :) , وقالوا مدامك حلفت فتوكل على الله

وقلت لهم يالله اركبوا وركبوا معي , وطبعا اليوم اخر يوم من الاختبارات والاحساس خيالي ولا يوصف , كأني بأطير من الفرح

وفيني طاقه اعوذ بالله , لو تقولي امشي على الجدار مشيت

المهم وجيت طالع من عند المدرسه الا وأشوف ذولاك الطلاب الكثيرين

وانا معي فورد واليوم اخر اختبار و طاير من الفرحه وفيني نشاط زايد والفورد من زمان ما فز

واقولهم يجي ؟؟ , وواحد قال ياولد تعوذ من ابليس , واللي ورا قال عطها خير وورنا عزمها , مع ان اللي ورا عاقل ودافور لكن شكله مثلي لعب براسه ابليس هههههه

المهم

ويوم اني اقرب من اللفه والطلاب يشوفوني

واعطيها ذاك الدرفت واطلع على الشارع الوسيع

ويمين ويسار ويمين ويسار وهاتك تنطيل

وأحس إني محد قدي

وراسي فيه زي الشيء احسه مثل اشعاع التلفزيون ابو قزازه القديم , عرفتوه , اللي يجي ورا مثل الصندوق , هذا جاء براسي من الشيخه ,و يسمونه ( انتفخ راسه )

المهم

ازيد اخذ يوتيرن وازيد ارجع لهم

واخمس بالفورد ذيك المره لين ما سرت اشوف الا دخان ابيض ولا ادري وين اتجاهي

واضغظ فرمله و بنزين وخليتها تحوس محلها

المهم إني كنت متهور و لا اذكر الاحداث بالتفصيل لاني ما اذكر الا وانا جوا السياره واشوف الوان قوس قزح من التخميس ههههه

فجأه الا والحراره ارتفعت :(

على طول مشيت ودخلت بأول لفه قريبه

ونزلت اشوف الكبوت ولقيت مافيه مويه بالرديتر

واعتذرت من الزملاء وقلت ماعليكم بأفطركم المره الجايه

والاول قال افلقني اذا زدت ركبت معك يا ثور

والثاني قال والله انك كنق وهاتك تعزيز هههههه الله يصلحه بسس

المهم ما ادري الا و جوالي يدق

الا وواحد اعرفه من المدرسه يقول ترا الدوريه تدورك حاول تخبي السياره باقرب دخشه , نحاها تدور عند المدرسه وتسال عن فورد كان يفحط

وقلت أما عاد , يالله يالله مع السلامه , واشغلها وادخل بها حاره واوقفها قدام بيت فخم عشان ما يشكون هههههه واقفلها وارجع البيت تكسي :)

مشت الايام

و بدأ الترم الثاني , واحنا نسولف , قالوا تعرف فلان بن فلان , قلت ايه اعرفه من بعيد , قالوا هذا مات في اخر يوم من الاختبارات

قلت لا حول ولا قوة الا بالله , وكيف مات

قالوا كان يفحط وهجت عليه السياره وصقع عامود من على بابه ومات وقتها

المهم والله ياني تكدرت واعرف ان الطالب هذا ما شاء الله عليه كان ذكي و ممتاز وما توقعتها منه لانه مو راعي الحركات هذي

فقسم بالله ان الله ذاك الوقت نجاني سبحانه بأعجوبه

وخلا الحراره ترتفع علي عشان لا اتهور واجيهم ماشي 140 ولا 160 وافحط

لان الادرينالين وقتها كان عندي مرتفع ومفلل

ولا كنت افكر الا باللحظه اللي انا فيها

ولا افكر وش بيسير ولا حطيت احتاملات قدامي ولا شيء

فوالله , إن الله نجاني بأعجوبه واكيد ان الوالده الله يحفظها دعت لي

ولاّ انا كنت ناوي ارجع لهم بشوط ما ينوسوه في حايتهم

كنت ابجي طاير واوريهم اني طاره واسير بينهم معروف

الله يصلحني بس

والحمد لله اني رجعت لامي سالم

ولا كان الحين امي تبكي علي ليل ونهار

و ابوي ما بيسامح نفسه ابدا لانه عطاني سياره و سار هو سبب في موتي

فأحمد الله ليل ونهار انه لطف بي ذاك الوقت

ولا كان الحين ابو يزيد ماضي وانتهى

ولا احد يذكره

فخلاصه موضوعي

انتهبوا على اخوانكم وعيالكم

خصوصا اخر يوم من الاختبارات

فاللي عند اخوه سياره او ولده سياره

يحاول ياخذها منه قبل اخر يوم اختبارات

لانكم تعرفون اخر يوم اختبارات يكون في الواحد طاقه وما يفضي الطاقه الا بالسياره من تفحيط و درفت و سرعه جنونيه

فحاولوا تاخذون المواتر منهم , ولا تقولون لهم عشان لا يلعب براسك ابليس وتدرفت فيها

لا لا

لا تقول كذا , انت الحين دخلت فكرة الدرفت براسه وهو ما كان يفكر فيها + وضحت له انك ما تثق فيه

فلا تقول له كذا

قوله سيارتي بكره الصباح بياخذها قريبنا فلان بفلان لان عنده موضوع ضروري وانا باخذ سيارتك اذا تسمح واباخذك اذا طلعت من المدرسه

اتوقع انها فكره افضل

وثانيا : اخر يوم اختبارات يكثرون اللي يفحطون عند المدارس , فلوا كنت تتأخر على اخوك او ولدك , فحاول بقدر الامكان اخر يوم من الاختبارات لا تتاخر عليه , والمفروض ما تتأخر عليه في ايام الاختبارات كامله , لان دايم يكون فيها تفحيط , ويا كم من مفحط قتل اشخاص وهو يفحط , والى الان ما يعرفونه ..

حتى بعض اخوياك يجون عندك ويقول اركب يا رجال كلها كم نطله و بنفطر ونوصلك بيتك وانت تعرفهم زين , وتقول ياالله يارجال ما ورانا شيء واليوم الوضع اوكيه واخر يوم , فما وراي شيء وخلنا نفلها , و اذا ركبت معهم و قدر الله و دخلت في عامود ترا قسم بالله العظيم انهم ما راح بينفعونك

وايضا راح يكثر التوجيهه في الوات ساب والبلاك بيري ( فيه تفحيط بالشارع الفلاني و الطاره الملقب بكذا كذا موجود وعليه تفحيط خيالي او فيه خشه لسته طارات و الحقوا و ترا ما فيه حكايم

وتروح تتفرج واخرتها تنصدم او ينصدم خوي عزيز عليك ويموت وتنتهي حياتك او حياته بلحظه , ووقتها راح تقول لا عادها الله من لحظه ولا ابوها ولا ابو الطلعه اللي خلت حياتي كلها نكد

فأنتبهوا يا شباب

وحتى اللي معه سياره ويقرا موضوعي

حبيت اقوله : ترا والله العظيم ما كنت راعي درفت ولا شيء , وكنت طيب وخجول جدا جدا وحساس ههههه , يعني ما كنت راعي درفت ابدا ابدا ولا احب التفحيط , (( انسان لطيف :) )), صح كنت احب اشوفه بس ما احب افحط , ونحاني اقسم لك بالله اني ماكنت متوقع هالشيء مني , وليومك هذا ما ادري كيف درفت وقتها , فأنتبه وانا اخوك , حاول تكون بعقلك و تفكر باللي راح يسير وتحط قدامك جميع الاحتمالات , اذا متت , بتقطع قلب امك او ابوك عليك , وانت بتكون في عداد الموتي , ووقتها ما راح ينفعك شيء يوم انك بقبرك لحالك بالظلام الموحش, وبتكون منتحر , فلا تفرط بحياتك عشان متعه (( لحظيه ))

انا يوم شفت الجمهور اللي هم الطلاب , جاني شعور الله لا يرده من شعور وخلاني ادرفت فيمكن يجيك الشعور هذا فانتبه منه وابعد عنه بقدر المستطاع

لان حياتك يا غالي اكبر من هالاشياء التافهه

ملاحظه :

كنت اعرف واحد كان مثقف جدا إسمه خالد العمري , كلامه مسطر من ذهب , وعنده معلومات من كل النواحي , ومتفائل ما شاء الله عليه, اذا قعدت معه وكنت متحطم , يرفع معنوياتك ويشجعك , كان متفائل على الاخر , طبعا الكلام قبل سنه , وكان يقولي إن شاء الله أول ما اخلص الدبلوم أبغا احقق حلمي يابو يزيد , وقلت وشهو حلمك ؟ قال حلمي يابو يزيد إني اكمل دراستي بأمريكا إن شاء الله , هذا حلمي من 3 سنوات , حلمي وامنيتي إني اسافر واتعلم ثقافات شعب يحترم الانسان ويطبق ما كان الاسلام عليه قبل 1400 سنه , ابغا اتعرف على ثقاقات وشعوب مختلفه , ابغا اعيش التجربه , وارجع معي اعلى شهاده , افرح فيها قلب ابوي وارفع راسه , لانه قالي لو ما شملتك البعثه وعد مني انك تروح و انا بدفع كل ريال لين ما تخلص دراستك,ابغا اروح و اكتسب كم هائل من المعلومات و ارجع وانا رافع راس ابوي وامي , هذا حلمي يابو يزيد

هذي كانت اخر محادثه معه الله يرحمه ويسكنه فسيح جناته , وسبب موته ولد عمته , كانوا بالبيت اخر الليل , وجت رساله على جوال ولد عمته , يقولون فيها ان فيه تفحيط بأحد الاحياء والطارات كبار ومعروفين , ونشب الرجال في خالد إنه يجي معه , مع ان خالد ما كان مؤيد الفكره نهائيا , لكن عشان يرضيه راح معه , تفرجوا بالتفحيط , وجت شبكه دوريات , والناس كلها هجت و هم ركبوا سيارتهم من نوع كورلا , و كانوا مسرعين عشان بيشردون , طلع لهم جمس من القديمه موديل 95 و 99 ابو حديد , وصدمهم من على الابواب , ومات خالد رحمة الله عليه, وولد عمته اللي هو السبب , جاله كسور و طلع من المستشفى بعد 5 اسابيع ,

شفتوا ان ما راح احد ينفع احد , مات سبب و سار ماضي , 75% نسوه , انتهت حياته , وضاعت احلامه , و هو بعمر الزهور ما كمل 21 سنه , ضاعت حياته بسبب انه راح مع ولد عمته في ذاك اليوم , لو انه تعوذ من ابليس وقال ماني برايح , والله يستر عليك , وحياتي اغلى من الاشياء, وخلا ولد عمته يقول له والله انك نفسيه والله انك شايب , وخلاه يقول اللي يقول

كان الحين عاد بأمريكا , و يراسلني كل يوم على كل شيء اكتشفه او تعمله من حضاراتهم

عسا الله يرحمه و يدخله الفردوس الاعلى ويسامح من كان السبب

اتمنى تكون الفكره وصلتكم

واسأل الله ان يكفيكم شر الحوادث و يوفقكم في اختباراتكم حبايبي ويوفق الجميع

تحياتي لكم/ اخوكم : ابو يزيد

http://www.youtube.com/watch?v=K_HasrgjNr4&feature=youtu.be