بعد ٥سنوات مكدة اكتشفت أن سيارتي فيكتوريا وليست شاص
28
6
إضغط هنا للإخفاء
قبل ٥سنوات تقريبا تم تعييني خارج مدينتي على بعد ٨٠٠كم
و كان معي وانيت حوض و افكر قلت مالي إلا موتر سفر فورد كامري المهم صالون
جاني واحد من الزملاء و عرض علي موتره فيكتوريا ٢٠٠٠سعودي طلع الموتر نظيف و حليل و الحمد لله شريته و كان وردة راحت الأيام و أنا عاد احب البر و ما اصبر عنه و أنا بالطريق رائح و إلا جاي لازم انزل للبر أنا و العائلة و قربعت بالموتر قربعة و صدمت عليه مرتين و صرت انزل عليه أحيانا إلى ٣٠ كيلو صحرا بس أني حبيت الموتر و تعلقت فيه لانه مريح بالخط و عملي لكني أجرمت فيه أجرام لدرجة أن أخوي يقول موترك هذا شاص ما هو فورد و كنت صراحة ما ارحمه صحرا نفود حصى شعبان خطوط بتاع كله لين استسلم المسكين و طاح عند الباب و كل هالمدة اللي هو معي و أنا مصادق الورشات كلها و حطيت فيه ما يقارب عشرين ألف على غير فايدة كلما صلحت شئ خربت أشياء
أخيرا بعد هالعذاب المتبادل أصدرت قرار إحالته إلى التقاعد المبكر نظرا لعجزه الصحي هههههه و الحمد لله وفقني الله بموتر شبيه و خليت عشيري القديم عند الباب و كلما طلعت ناظرته بنص عين من الجفاء و يسر الله بيعته و هو عند الباب بمبلغ لا باس به من دون أي تعب .
الخلاصة : أني تأدبت و عرفت أن موتر الديرة للديرة و موتر الخط للخط و موتر البر للبر و لو أشوف الربيع جنب الخط طول الرجال ما نزلت صحرا
و الحمد لله الموتر سالك معي و لا فيه أي مشاكل اللهم مصاريف استهلاكية
و توي عرفت أن موترك أن صنته. صانك و أن خنته خانك
الله يبارك لي فيه و يبارك للقراء في حلالهم و مواترهم
هذه خلاصة تجربتي و شكرًا لكم
إبلاغ
الردود
0
0
قبل 10 سنه و 4 شهر