السياره عيت تشتغل

سوي لها اشتراك منت خسران شي يمكن البطارية ضعيفة ما وصلت الكهرباء بالشكل الكافي بس جب اشتراك مطنوخ زي حق الدوريات أتمنى اني أفدتك 

فيه فيوز او كتاوت تسوي هالشي وفيه طرمبه

يمكن طرمبة البنزين كمان فضى عليك البنزين وسحبت هوا ووسخ من التانكي اضرب عليها بعصا على التانكي وجرب ان شاء الله تشتغل

شيك على الفيوز حق طرمبة البنزين انا مرة صارتلي في كابريس ورحت شريت طرمبة بنزين ودفعت مبلغ و
بعد ماركبت الطرمبة الجديدة نفس المشكلة وفي الاخير طلع فيوز الطرمبة خربان غيرته ولا كلفني 20 ريال بعد ماشريت 
الطرمبة بـ1000 :) الله يعوض بس ..

اخوي شوف مفتاح الطرمبه اللي في الشنطه ممكن قافل
تلقاه فوق الرفرف داخل الشنطه وغالبا لونه احمر

يا الطرمبه او الفيوز فقط
شيك عليهم
ولا تنسى بعد ما تنحل المشكله
تعلمنا وش حلها وايش صار معاك
زي ما نفيدك فيدنا بالي صار معك

اطلع لم التقوى لقطع الغيار خذ طرمبة بنزين كامله بعوامتها بقيمه 450 ريال ممكن تلاحظ فرق سعر ب 30

وفك التانكي وغير العوامه بطرمبتها مره وحده ووريح راسك
لتشغيل الفورد شوف فوق راس المكينه يم البخاخات فيها ماصوره بها راس مثل الكفر نسم له شوي بس وخر عيونك
لانه بيرش بنزين وشغل اذا اشتغلت السيارة وطفت غير الي ذكرته لك فوق

الله يعطيكم الف عافيه كلكم 

توي راجع الحين من الورش 

وبعد طووول لفه وقلق ورطوبه وحر 

شيك على علبه الفيوزات وشغال فيوز الطرمبه  قال عبها بنزين ان ما اشتغلت خلاص الطرمبه خربانه 

عبيتها 5 لتر ولا اشتغلت 

خليتها وبجيه بكره لما فتح عشان اغير طرمبه وشكلي بغير العوامه معها 

مشكورين

شيك على ماذكرت لك اياه بالاعلى

اما الطرمبة فلا تقبل الا كامله فك تركيب فقط وتشبك الفيش والليات وسعرها 450 كامله بعوامه جديدة اصلية وفلتر
والطرمبه واصلية 200% اضمن وعمر اطول

الله لايهينك بالتاكيد بشيك عليها ماجينا هنا الا ندور النصيحه

مشكورين والله لايحيجكم للورش 

اذا كانت الطرمبه هي سبب هذه المشكله فالتفسير المنطقي لخرابها هو انك فضيت تانكي البنزين تماما وهذا الشي يتعب الطرمبه وتخرب بسرعه معاك
واظن ان مو هذه اول مره يفضى معك تانكي البنزين
يعني تكررت معاك كم مره الين خربت الطرمبه
لان دائما لما الطرمبه تسحب كامل البنزين يكون في شوائب وغبار وبعض العوالق تدخل في الطرمبه وتعدمها لك
هذا ان كان سبب مشكلتك الطرمبه
عشان كذا انا انصح الاخوان لا يخلون البنزين ينزل تحت الربع
دائما احس شي يخلونه فوق الربع اول ما ينقص يعبون
وانا الحمدلله دائما فوق النص منها محافظه على الطرمبه ومنها احتياطا عشان ااذا انقطعت محطات امامي بالطريق
عموما ما زلنا متابعين لمشكلتك الين تنحل ونعرف السبب الرئيسي اذا هو طرمبه او غيره
بالتوفيق وعساها تطلع شي بسيط غير الطرمبه ويريحك مخباك

فعلا طلعت الطرمبه وعجزت القى طرمبه بعوامه كامله امس 

المهم ركبت الطرمبه ورحت للمحطه وعبيت السياره فل وفجاه كل الي عبيته انصب في الزفلت 

برجع للحمار بكره واشوف 



............


السياره كانت تشتغل من ثاني او ثالث دقه سلف , لكن بعد ماغيرت الطرمبه صارت تشتغل من اول دقه وجربت اكثر من مره 

مع اني غيرت بواجي واسلاك بواجي و و و عشان هذا الموضوع 

شكلك وديتها عند واحد حمار يركبلك اياها
رجعها له وقله المره الجايه بجيك بسيارة شرطه اذا ما صلحتها زين

معروفة مشكلتك من البدايه لاني معاشر الفورد تقريبا 10 سنوات موديلات قديمه ولين 96

المشكلة في تسريب البنزين يوجد قفيز ( كلبس) داخل الليات بلاستيك يمسكها من جهه الطرمبة حقت البنزين ويوجد ربله بين التانكي والطرمبه ويوجد ايضا وزن وتركيب المجرى لدخول البنزين اي اختلال فيهم بيسبب تسرب بنزين وليتك من قام بفكها شغلتها فقط مسمارين مقاس 15 وقفيز بلاستيك ينفك فقط لاغير وماتاخذ معك نص ساعه لانك اول مره

ارجع للي ركبه لك ولاتطلع لين يتاكد لك انها مستحيل تسرب

ومبروك عليك حل المشكله وياليتك ماشريت الا كامله سعرها رخيص واصلية سواء من وكلاء فورد او اي محلات لها صيت او حتى في الوكاله نفسها نفس السعر